Siohwa Ketin Wiahiong Samson en Kehlail

Tohto mehn Israel kan pwurehng kaudokiong dikedik kan, eri Siohwa ketin mweidohng mehn Pilisdia kan ren kaunda sapwen mehn Israel kan. Ahpw mie ekei mehn Israel me poakepoakehte Siohwa. Emen rehrail iei ohl emen me adaneki Manoha. Ehu rahno Siohwa ketin kadarala tohnleng men rehn en Manoha pwoudo. Tohnlengo ahpw mahsanihong liho: ‘Ke pahn nainekihda pwutak emen. E pahn kapitasang mehn Israel kan sang rehn mehn Pilisdia kan. E pahn wia Nasaraid men.’ Ke ese ihs Nasaraid kan? Irail wia sapwellimen Siohwa ladu tohrohr kei. Nasaraid kan sohte mweimwei en sehkasang pitenmoangerail kan.

Kedekedeo, nein Manoha pwutako ipwidi, oh e kihong ede Samson. Ni ahnsou me Samson laudla, Siohwa ketin wiahiong ih en uhdahn kehlail. E kak doadoahngkihte peh kan kemehla emen laion. Ehu ahnsowo, Samson kelehpw kemehla mehn Pilisdia 30. Mehn Pilisdia kan kin kailongki ih oh kin raparapahki mwomwen arail pahn kemehla. Ehu pwohngo, ni Samson eh wie memeir nan Kasa, irail kohla ni kehl en kahnimwo oh awih wasao pwe ren kak kemehla ih nimenseng en mandahn rahno. Ahpw ni lukepen pwongo, Samson pwourdahte, kohla poarehng ewen kelen kahnimwo, oh dapengasang ni dihdo. E pwekada kehlo pohn pwopweo oh wa kohdalahng ni kumwen dohlo, me karanih Epron!

Mwuhr, mehn Pilisdia ko kohla rehn Dilehla, serepein men me Samson mwahuki, oh ndaiong: ‘Se pahn pwainkinuhk mwohni silper kid ma ke diarada dahme kahrehda Samson uhdahn kehlail. Se men koledi oh kesehlong nan imweteng.’ Dilehla men naineki mwohni, eri e pwungki dahme irail ndao. Nin tapio, Samson sohte men ndaiong dahme kahrehda e uhdahn kehlail. Ahpw Dilehla ngihtehtehkiong lao e ndahda. Samson ndaiong Dilehla: ‘Pitenmoangei kat saikinte seiseisang pwehki ngehi Nasaraid men. Ma pitenmoangei kat pahn seiseisang, I pahn luwetala.’ Samson wiahda sapwung laud ehu ni eh padahkihong Dilehla met, kaidehn?

Dilehla ahpw mwadangete padahkihong mehn Pilisdia ko: ‘I esehier dahme kahrehda e kehlail!’ Ih eri kamairala Samson pohn neh ko, oh ekerodo emen ohl en sehkasang pitenmoange ko. Dilehla ahpw werda nda: ‘Samson, mehn Pilisdia kan mihmier met!’ Samson ahpw pwourda oh eh kehl ko koaros solahr mi reh. Mehn Pilisdia ko ahpw koledi, oh pwadikasang pwoaren mese ko, oh kesehlong nan imweteng.

Ehu rahno mehn Pilisdia kid kei kohpene nan imwen arail koht Dakon, oh weriwer ndinda: ‘At kohto kihong kihtehr Samson! Wahieido Samson likie! Pwe sen kapailokeseli mahs!’ Irail eri kasihnenihada Samson nanpwungen uhr riau ko, oh kapailokeseli. Samson ahpw patohwanohng Siohwa: ‘Maing Siohwa, komw ketin kapwuredohng ie pil ehu kehlail.’ Ahnsowo, pitenmoangen Samson ko pwurehng reireila. E ahpw doadoahngki eh kehl koaros oh siken uhr en ihmwo. Ihmwo pwon ahpw pwupwudi oh kemehla aramas koaros nan ihmwo, oh Samson pil iang irail mehla.