Wehio Nenepesang

KE ESE dahme kahrehda ohl menet kin tehrpesang ah likou? Siohwa mahsanih ong ih en wia met. Ohl menet iei emen soukohp en Koht adaneki Ahaisah. Ke ese dahkot soukohp? Ih aramas men me Koht padahkiong mehkan me pahn wiawi mwohn mehpwukat wiawi.

Ahaisah wasaht kin koasoaiong Seropoam. Seropoam iei emen ohl me Solomon idihada pwen kowaki doadoahk en kauwada ihmw akan. Ni ansou me Ahaisah tuhong Seropoam pohn ahlo, Ahaisah wia mehkot kapwuriamwei. E alehda likou reirei me e likouki oh tehrpesang ong ni kis 12. Ih eri padahkiong Seropoam: ‘Alehda 10 ahmw.’ Ke ese dahme kahrehda Ahaisah kihong Seropoam me 10?

Ahaisah kawehwehda me Siohwa pahn kihsang wehio Solomon. E inda me Siohwa pahn kihong Seropoam kainok 10. Met wehwehki me kainok riaute me pahn luluwe rehn nain Solomon pwutak Rehopoam.

Ni ansou me Solomon rong dahme Ahaisah padahkiong Seropoam, e inenen mwakarada. E song en kamehla Seropoam. Ahpw Seropoam tangwei oh rukala Isip. Mwehrin ansoukis Solomon mehla. E kin kakaun sounpahr 40, oh nah pwutak Rehopoam uhd wiliandi ih nanmwahrki. Ni ah mihmi Isip Seropoam rongada me Solomon mehlahr, ih eri pwurohdohng Israel.

Rehopoam kaidehn nanmwahrki mwahu men. E pil suwed ong aramas kan duwehte seme Solomon. Seropoam oh ekei ohl kesempwal kan kohieila rehn Nanmwahrki Rehopoam oh peki reh en mwahu ong aramas kan. Ahpw Rehopoam sohte men rong. Ni mehlel, e lemei sang mahs. Aramas kan eri kasapwilada Seropoam en nanmwahrki pohn kainok 10, ahpw kainok riau en Pensamin oh Sudah kin mi pahn kaunda en Nanmwahrki Rehopoam.

Seropoam sohte men nah aramas kan en kohla Serusalem oh kaudok ong Siohwa nan ihmwen kaudoko. Ih eri wiahda kou kohl riemen oh padahkiong aramas kan en kainok 10 en wehin paliepeng ren kaudokiong. Sohte pwand sahpwo direkihlahr mwersuwed oh pepei.

Pil mie kahpwal tohto nan wehin kainok riau en palieir. Sounpahr limau mwehrin Rehopoam nanmwahrkihlahr, nanmwahrki en Isip kohdo oh peiong Serusalem. E wahwei sang dipwisou kesempwal tohto nan sapwellimen Siohwa ihmwen kaudok. Ihme ansou mwotomwot mwuhri ihmwen kaudoko kin duwehte ansou me e kaukawada.