Koht Inoukihdi Ehu Paradais

MET ehu kilel en paradais ele mwein duwehte me Siohwa kasansaleong soukohp Aiseia. Aiseia memour mwehrinte Sonah.

Paradais kin wehwehki “mwetuwel lingan” de “wasahn poudial.” E kin kataman ong uhk duen mehkot kesempwal me kitail kilangehr nan pwuhket? Wasaht duwehte mwetuwel lingan me Siohwa Koht ketin wiahda oh ketikihong Adam oh Ewa, kaidehn? Ahpw iaduen sampah pwon kak wiahla ehu paradais?

Siohwa mahsanih ong sapwellime soukohp Aiseia en intingihdi mehkan me pahn wiawi mwuhr duen paradais ong sapwellime aramas kan. E mahsanih: ‘Kidi en nan wel (wulp) oh sihpw pahn mihpene ni meleilei. Kou pwulopwul oh kisin laion pahn mwengepene, oh kisin seri pahn apwahpwali irail. Pil kisin seri men sohte pahn madakala ni ah pahn mwadong limwahn sineik poisin.’

‘Met sohte kak en wiawi,’ ele mwein ihme tohto pahn inda. ‘Pwehki ansou koaros apwal kin mi nan sampah, oh pahn mie ansou koaros.’ Ahpw medemedewe duen met: Soahngen wasahn kousoan da me Koht ketikihong Adam oh Ewa?

Koht pwilikihdi ira nan ehu paradais. Pwehki ara sapeik ong Koht ih kahrepen ara katiasang ara wasa kasehlel, mahla oh mehla. Koht inoukihdiehr me e pahn ketikihong sapwellime aramas kan me limpoak ong ih soahngohte me Adam oh Ewa katiasang.

Nan paradais kapw kohkohdo sohte mehkot pahn kahrehda kamadak de kawehla. Pahn mie meleilei unsek. Aramas koaros pahn ahniki roson mwahu oh insenamwahu. Pil pahn wasa ehu me diren pwung duen me Koht kupwurehdahr sangete ni tapio. Ahpw kitail pahn sukuhliki mwuhr duen Koht ah pahn ketin kasapahldo mehpwukat.