Irail Sohte Pahn Poaridi

KE TAMATAMAN ahmw kin rong duen mwanakapw silimenet? Ei, irail kompoakpen Daniel kan me sohte men kang mehkan me sohte mwahu ong irail. Mehn Papilon kan kin kahdanekin irail Sadrak, Mesak oh Apedneko. Ahpw kilang irail met. Dahme kahrehda irail sohte men poaridi ong dikadik laud me koaros poaridi mwowe? Kitail pahn rapahkihda kahrepe.

Ke tamataman kosonned ko me pein Siohwa ketin intingihdi me adaneki Kosonned Eisek? Keieun kosonned pwukat ketihtiki: ‘Ke sohte pahn kaudokiong emen koht likin Ngehi.’ Mwanakapw pwukat kin peikiong kosonned wet, mehndahki ma kaidehn mengei ong irail.

Nepukadnesar, nanmwahrki en Papilon, kihpeneiehr aramas kesempwal tohto pwen kawahuih dikadik wet me e kauwadahr. E ahpwtehn kaimwisekela ah padahkiong aramas koaros me: ‘Ni omwail pahn rong ngihlen koronet, arap oh mehn keseng teikan, kumwail pahn poaridi oh kaudokiong dikadik en kohl wet. Mehmen me sohte poaridi oh kaudokiong pahn lekidek ong nan kisiniei ansouohte.’

Ni ansou me Nepukadnesar eseiehr me Sadrak, Mesak oh Apedneko sohte poaridi, e mwakarada kowahlap. E inda me irail en wisikdo. E pil mweidong irail ehu pak ren poaridi. Ahpw mwanakapw pwukat liki Siohwa. ‘Aht Koht me se papahong kak doarekihtala,’ re indaiong Nepukadnesar. ‘Ahpw pil mehnda ma e sohte doarekihtala, se sohte pahn poaridi mwohn dikadik en kohl me komwi kauwada.’

Nepukadnesar ahpw mwakarkihda ni ah rong met. Mie wasahn kisiniei lulul kerenih irail oh e indalahng irail: ‘Kakehlaila kisiniei pak isuh!’ Ih eri ilakih ohl kehlail kan sang rehn sounpei ko en salihdi Sadrak, Mesak oh Apedneko oh koskihong irail nan kisiniei. Kisinieio me inenen kehlail oh mwemwehl, ihme kahrehda ohl kehlail ko mehkihla kisinieio. Ahpw iaduen mwanakapw silimen me re kasediong nan kisinieio?

Nanmwahrkio kilangdihla nan kisiniei, oh masapwehkada. ‘Kitail soh pirehdi ohl silimeno oh koskihla nan kisiniei mwemwehlo?’ e idek.

‘Ei, ihme kitail wia,’ nah ladu ko sapeng.

‘Ahpw I kilang ohl pahmen alialu nan kisinieio,’ e indahda. ‘Irail koaros sohte selidi, oh kisinieio sohte wiaiong irail mehkot. Oh me kapahmeno mwomwen emen koht.’ Nanmwahrkio eri kohieila ekis kerenlang wanihmwen wasa me kisiniei lulul oh ngihl laud likweri: ‘Sadrak! Mesak! Apedneko! Kohieido, kumwail ladu kan en Koht Keieu Ileile!’

Ni arail pidoido, aramas kan koaros kak kilang me sohte mehkot ohla ni paliwarail. Nanmwahrkio eri inda: ‘Kaping en kohwong Koht en Sadrak, Mesak oh Apedneko! E poronehdo sapwellime tohnleng oh doareirailla pwehki irail sohte poaridi oh kaudokiong emen koht likin pein arail Koht.’

Met soh wia mehn kalemeng kasehlel en lelepak ong Siohwa me kitail kak alasang?