Ihs Me Ahmw Koht?

DAHME kahrehda peidek wet, ‘Ihs me ahmw Koht?’ kesempwalki?— Pwehki aramas kin kaudokiong koht tohtohie. (1 Korint 8:5) Ni en wahnpoaron Pohl alehdier manaman sang rehn Siohwa pwehn kamwahwihala ohl emen me sohte kin kak alu, aramas ako ahpw tapiada weriwer oh nda: “Koht akan wie aramasalahr oh ketidohr rehtail!” Aramas ako men kaudokiong Pohl oh pil kompoakepah Parnapas. Re ahpw kihong eden Pohl Erimihs a Parnapas Seus. Ahd pwukat iei eden koht likamw ekei.

Ahpw Pohl oh Parnapas sohte mweidohng irail en kaudokiong ira. Ira ahpw tangalahng pokono oh nda: ‘Kumwail wetweisang soahng soh katepe pwukat oh wekiong Koht ieias.’ (Wiewia 14:8-15) Ihs “Koht ieias,” me ketin kapikada mehkoaros?— Iei ih Siohwa, “Kaun lapalap en mehkoaros nin sampah.” Sises patohwanohng Siohwa, “komwihte Koht mehlel.” Eri ihs kelehpw me warohng ale kaudok?— Siohwa kelehpw!​—Melkahka 83:18; Sohn 17:3; Kaudiahl 4:11.

Pali laud en aramas pil kin kaudokiong koht teikan likin ‘Koht mehlelo.’ Re kin kalapw kaudokiong soahng kan me wiawihdahsang tuhke, takai de mete. (Eksodus 32:3-7; Lipai 26:1; Aiseia 44:14-17) Ekei aramas kin kilangdahng ohl oh lih me ndand kan duwehte koht ekei. E pwung en wiahki irail met?—

Mwurin Sohl eh wiahla wahnpoaron Pohl, e ntingihedi met: ‘Koht suwed en sampah wet kin karotongehla madamadau en irail akan me sohte kin pwoson.’ (2 Korint 4:4) Ihs koht menet?— Iei Sehdan me Tepil! Sehdan kin kahrehiong aramas tohto en kin kaudokiong aramas oh pil soahng tohto teikan.

Dahme Sises mahsanihong Sehdan ahnsou me e kasonge ih en poaridi oh kaudokiong ih?— “Siohwa omw Koht kelehpw me ke pahn kaudokiong, oh ong ih kelehpw me ke pahn papah.” (Madiu 4:10, NW) Eri Sises ketin kasalehda ni sansal me Siohwa kelehpw me warohng ale kaudok. Kita wadekpene duwen mwahnakapw kei me ese duwen met. Adarail kan iei Sadrak, Mihsak oh Apedneko.

Irail mwahnakapw en Ipru pwukat wia mehn Israel kei me wia sapwellimen Koht wehi me sella nan Papilon. Nanmwarki en sahpwo me adaneki Nepukadnesar kauwada lapalahn sansal ehu me wiawihkihda kohl. Ehu rahno e nda me ahnsou me ngilen keseng pahn wiawi, koaros anahne poaridiong sansalo. E nda: “Mehmen me sohte pahn poaridi oh pwongih sansalo pahn mwadang lekdeklahng nan kisiniei mwehl.” Dahme ke pahn wia ma kowe mwo?—

Pali laud en ahnsou, Sadrak, Mihsak oh Apedneko kin kapwaiada soahng koaros me nanmwarkio kin nda. Ahpw re sohte poaridiong sansalo. Ke ese dahme kahrehda?— Met pwehki kosonned en Koht mahsanih: ‘Kumwail sohte pahn ahneki emen koht tohrohr mwohi. Kumwail sohte pahn wiahiong kumwail dikedik en eni de sansal en mehkot pwehn poaridiong.’ (Eksodus 20:3-5) Eri Sadrak, Mihsak oh Apedneko peikiong kosonned en Siohwa a kaidehn dahme nanmwarkio nda.

Nanmwarkio uhdahn lingeringerda, kahrehda e wahdo pwutak en Ipru silimeno mwowe ni ahnsowohte. Ih eri idek: ‘Mehlel me kumwail sohte pwongih ei koht kan? Eri I pahn kihong kumwail pil ehu ahnsou. Ni amwail pahn rong ngilen keseng, kumwail pitipit poaridi oh pwongih sansalo. A ma kumwail kahng, kumwail uhdahn pahn lekdeklahng nan kisiniei mwehl. Ia duwe, kumwail lemeleme me mie koht emen me pahn kak doareikumwailla?’

Eri, dahme pwutak pwukat pahn wia? Dahme ke pahn wia ma kowe mwo?— Re ndaiong nanmwarkio: ‘At Koht me se kin papah pahn kak kapitkitala. Ahpw ma e pil sohte ketin wia, se sohte pahn pwongih omwi koht kan, oh se sohte pahn pil poaridihsang sansal kohl me komw ketin kauwadahro.’

Nanmwarkio uhdahn lingeringerda. Ih eri nda: ‘Saunda kisinieio pwe en mwehl pak isuh laudsang mahs.’ Ih eri ndaiong nah ohl kehlail kan en salihedi Sadrak, Mihsak oh Apedneko oh keseiraillahng nan kisiniei mwehlo! Kisinieio uhdahn kehlail kahrehda nein nanmwarkio ohl ko mehla! A ia duwen pwutak en Ipru silimeno?

Sadrak, Mihsak oh Apedneko pwupwudiong nan werengen kisinieio. Ahpw re kesihnenda! Re sohte mwasikala. Oh re solahr sensel. Ia duwen met eh kak wiawi?— Nanmwarkio kilang nan kisiniei mwehlo oh masakada dahme e kilang. Ih eri idek: ‘Ia duwe, kitail soh salihedi ohl silimen oh keseiraillahng nan kisiniei mwehlo?’ Nah ladu ko eri sapeng nda: ‘Ei maing nanmwarki.’

Nanmwarkio eri nda: ‘I kilang meh pahmen me alialuhseli nan kisinieio. Sohte kisin mwasikala kis rehrail.’ Ke ese ihs me kapahmeno?— Iei sapwellimen Siohwa tohnleng men. E perehla mehn Ipru silimeno pwe ren dehr mwasikala.

Eri ni nanmwarkio eh kilang met, e kohla ni wenihmw en kisiniei mwehlo oh likwerlahng irail: “Sadrak Mihsak, oh Apedneko! Kumwail me kin papah Koht Wasa Lapalahpie, kumwail pedoido!” Ni arail pedoido, koaros kak kilang me re sohte mwasikala. Sohte kisin pwohn ediniei kis rehrail. Nanmwarkio eri nda: ‘Kapinga Koht en Sadrak, Mihsak, oh Apedneko me ketin kadarodo sapwellime tohnleng pwe en kapitala ohl pwukat pwehki irail sohte kin poaridi oh pwongih emen koht tohrohr pwe arail Kohtohte.’​—Daniel irelaud 3.

Kitail kak sukuhlki ehu mehn kasukuhl sang dahme wiawio. Pil nan atail ahnsou, aramas kan kin wiahda dikedik oh sansal kan pwehn kaudokiong. Ehu dikseneri koasoia: “Pilaik pil sarawi duwehte lohpwu.” Sansal kan kak wiawihkihda tuhke, takai, mete de pil likou. Tepin sapwellimen Sises tohnpadahk kan sohte kin wia mwekid en kaudok ong kaunen Rom. Emen soupoad me adaneki Daniel P. Mannix nda me met duwehte “sohte kin kawauwih pilaik de iang nda inou en uhki wehi.”

Eri dahme ke medewe, mie wekpeseng ma sansal ehu wiawihkihda likou, tuhke, takai de mete ong Koht?— E pahn pwung ma ladu en Siohwa men pahn kaudokiong soangen sansal wet?— Sadrak, Mihsak oh Apedneko sohte wia met oh Siohwa kupwurperenkin irail. Ia duwen ahmw pahn kak alasang irail?—