Inting Ni Did

DAHME wiawi wasaht? Aramas kan wia kamadihpw. Nanmwahrki en Papilon luhkehdor me lapalap kesempwal kid kei en towehda. Irail kin doadoahngki dahl kohl oh dahl silper me kohsang ihmwen kaudok en Siohwa nan Serusalem. Eri, ansouohte, sendinpehn aramas men pwarada oh tapiada inting mehkot ni did en pereo. Koaros ahpw masapwehkada.

Pelsasar, me ah pahpa kahlap Nepukadnesar, ihme nanmwahrki ansouo. Ih weriwer oh likweri nah ohl loalokong kan en kohdo. ‘Mehmen me kak wadek inting wet oh kak padahkiong ie ia wehwehpe,’ nanmwahrki koasoaia, ‘pahn kohwong ih kisakis tohto oh e pahn kasapwilda kaun kasilimen nan ai wehi.’ Ahpw sohte emen ohl loalokong kan kak wadek me intingdi ni dido, de kawehwehda wehwehpe.

Ahn nanmwahrkio nohno rongada mweseiseio oh kohieido nan wasahn mwenge. ‘Menlau dehr masapwehk,’ e padahkiong nanmwahrkio. ‘Mie emen ohl nan omwi wehi me ese koht sarawi kan, Ni ansou me ahmw pahpa Nepukadnesar kin nanmwahrki e kasapwilada ohl menet en wia kaunpen nah ohl loalokong kan koaros. Ede Daniel. Ileklahng ih oh e pahn padahkiong uhk wehwehpen mehpwukat.’

Ansouohte irail eri kahrehdo Daniel. Mwehrin ah kahng ale kisakis sang rehn nanmwahrkio, Daniel tapiada padahkiong irail dahme kahrehda Siohwa ansou ehu kasapwilidi ahn Pelsasar pahpa kahlap Nepukadnesar sang ah nanmwahrki. ‘E nohn aklapalap,’ Daniel koasoaia. ‘Oh Siohwa kaloke ih.’

‘Ah kowe,’ Daniel padahkiong Pelsasar, ‘ese dahme wiawiong ih, oh ke aklapalapte duwehte Nepukadnesar. Ke wahdo sang dahl akan en ihmwen kaudok en Siohwa oh nim sakau ki. Ke kin kapinga koht kan me wiawikihdahr tuhke oh takai, oh ke sohte kin kapinga oh kawahuih Sounkapikada Kasehlel. Ihme kahrehda Koht poronehdo peho pwen intingihdi mahsan pwukat.

‘Iet me intingdiehr,’ Daniel koasoaia: ‘MEʹNE, MEʹNE, TEʹKEL oh PARʹSIN.’

‘MEʹNE wehwehki me Koht kilelehdiehr tohto en rahn akan en omwi wehi oh pahn kaimwisekela. TEʹKEL wehwehki me ke tenekehr pohn mehn tenek oh diarek sohte mwahu. PARʹSIN wehwehki me omwi wehi pahn kohwong mehn Mihd oh Persia.’

Ni ansou me Daniel kaukawehwe, mehn Mihd oh Persia tapiadahr peiong Papilon. Re kalowehdi kahnihmwo oh kamehla Pelsasar. Inting ni dido pweidahr ni pwongohte! Eri dahme wiawiong mehn Israel kan met? Kitail pahn diarada ni ansou mwotomwot, ahpw mahs kitail kilang dahme wiawiong Daniel.