Daniel Nan Deuen Laion

OKOI! Likamwete Daniel mi nan ansou apwal. Ahpw laion ko sohte kin wiaiong ih mehkot suwed! Ke ese dahme kahrehda? Ihs me kihong Daniel en mi rehn laion pwukat? Kitail pahn rapahkihda.

Nanmwahrki en Papilon ansouwet iei emen ohl me adaneki Daraius. E kin uhdahn poakong Daniel pwehki Daniel me kadek oh loalokong. Daraius eri pilada Daniel en wia emen kaun nan ah wehi. Met kahreong ohl teikan nan wehio en peirinki Daniel, eri iet me re wia.

Irail kohla rehn Daraius oh indaiong ih: ‘Se pwungkiehr, Maing nanmwahrki, me ke pahn wiahda ehu kosonned ketihtiki me erein rahn 30 sohte emen en kapakap ong emen koht de aramas likin kowe, Maing nanmwahrki. Ma mehmen pahn sapeik ong kosonned wet, ih en lekidek ong nan deuen laion.’ Daraius sohte ese dahme kahrehda aramas pwukat men kosonned wet en wiawihda. Ahpw e lemeleme me met lamalam mwahu ehu, ih eri intingihda kosonnedo. Met kosonnedo sohte kak wekidekila.

Ni ansou me Daniel esehda duen kosonnedo, e kohieila nan ihmweo oh kapakap, duwehte me e kin wia ansou koaros. Ohl suwed ko ese me Daniel sohte pahn uhdi sang ah kapakap ong Siohwa. Irail peren, pwehki likamwete arail pilahn en kamehla Daniel pahn pweida.

Ni ansou me Nanmwahrki Daraius esehdahr kahrepen ohl pwukat mwahuki kosonnedo en wiawihda, e pahtoukihla kowahlap. Ahpw e sohte kak wekidla kosonnedo, ih eri kihda pangoak pwe irail en kaseong Daniel nan deuen laion. Ahpw nanmwahrkio padahkiong Daniel: ‘I koapwoaropwoarki me omwi Koht, me ke kin papahong, pahn doareiuhkala.’

Daraius uhdahn pahtou mehlel, ihme kahrehda e sohte kak meir ni pwongo. Mahnda en rahno e tangala ni deuen laiono. Ke kak kilang ih wasaht. E ngihl laudeda likweri: ‘Daniel, ladu en Koht memour! Koht me ke kin papahong doarehlahr uhk sang laion ko?’

‘Koht poronehdo sapwellime tohnleng,’ Daniel sapeng, ‘oh kakuhpene auwen laion pwe ren dehr kamadake ie.’

Nanmwahrkio ahpw perenda kowahlap. E padahkiong irail en kihsang Daniel sang nan deuen laion. Ih eri parokedi ohl suwed ko me sosong en kamehla Daniel oh kosdihla irail nan deuen laion. Mwohn ohl ko sair pwel, laion ko lusda oh tehrirailpesang.

Nanmwahrki Daraius eri intingihlahng aramas kan koaros nan ah wehi: ‘I kehkehlikiong koaros en wahuneki Koht en Daniel. E ketin wiahdahr manaman lapalap kan. E ketin doarehlahr Daniel sang nan auwen laion ko.’