Sises Pwulopwul Nan Ihmwen Kaudok

KILANG pwutak pwulopwulo koasokoasoaiong ohl mah ko. Irail sounpadahk kei en ihmwen kaudok en Koht nan Serusalem. Oh pwutako iei Sises. E ekis laudlahr. Met e mahkiehr sounpahr 12.

Sounpadahk ko pwuriamweiki me Sises wehwehki laud duen Koht oh mehkan me intingidi nan Paipel. Ahpw dahme kahrehda Sosep oh Meri sohte mi wasaht? Ia ira? Kitail pahn rapahkihda met.

Pahr koaros Sosep kin wahda ah peneinei kohla Serusalem pwen iang ehu kataman kesempwal me adaneki Passa. Met anahne ren sapal reirei sang Nasared lel Serusalem. Sohte me wereneki sidohsa, oh pil sohte trein. Ni ansouo sohte soahng pwuko. Aramas koaros kin alu, oh irail aluhki rahn siluh sang Nasared lel Serusalem.

Ansouwet ahn Sosep peneinei laudlahr. Mie rien Sises pwutak oh serepein tikitik kan me re anahne apwali. Eri, pahret Sosep oh Meri iangahki neira seri kan mwesmweselwei sang Serusalem ong sapal reirei pwuralahng Nasared. Re lemeleme me Sises ieiang mehteikan kohkohdo. Ahpw ni arail uhdi ni imwin rahno, re diarada me Sises sohte iang irail. Ira rapahki ih rehn kisehra oh kompoakpara kan, ahpw sohte kak diar ih! Ira eri pwurohdohng Serusalem pwen rapahki ih wasao.

Kadekadeo ira diarada Sises wasaht rehn sounpadahk ko. E kin rongerong irail oh peipeidek rehrail. Oh aramas kan koaros pwuriamweikihla wen erpit me Sises ahniki. Ahpw Meri inda: ‘Seri, dahme kahrehda ke wiaiong kiht soahnget? Semomw oh Ngehi salohdahr ni aht raparapahkin uhk.’

‘Dahme kahrehda kumwa raparapahkin ie?’ Sises sapeng. ‘Kumwa sohte ese me I pahn mi nan ihmwen Semei?’

Ei, Sises mwahuki mi wasakis me e kak sukuhliki duen Koht. Kaidehn soahngen lamalam wet me kitail en pil ahniki? Nan arail wasa Nasared, Sises kin kohieila mihting wihk koaros oh iang kaudok. Pwehki e kin ansou koaros rong mwahu, e sukuhliki soahng tohto sang nan Paipel. Kitail en pil duwehte Sises oh idawehn ah mehn kalemeng mwahu.