Sises Kin Ahnsou Koaros Peik

Ia duwe, e kin ahnsou koaros mengei en peikiong ahmw pahpa nohno?— Ekei pak e kin apwal. Ke ese me Sises kin peikiong Siohwa oh pil eh pahpa nohno?— Eh mehn kahlemeng mwahu kak sewese iuk ken peikiong ahmw pahpa nohno mehnda ma apwal. Nna, kitail pahn sukuhlki duwen met.

Mwohn Sises mihmi pohn sampah, e kin mihmi rehn Semeo, Siohwa, nanleng. Ahpw pil mie ahn Sises pahpa nohno pohn sampah. Adara Sosep oh Mery. Ke ese ia duwen ara wiahla eh pahpa oh nohno?—

Siohwa ketin ale mouren Sises nanleng oh ketikihong nan kapehden Mery pwehn kak ipwidi oh mour pohn sampah. Met wia manaman kapwuriamwei ehu! Sises kekeirda nan kapehden Mery duwehte seri pwelel teikan ar kin kekeirda nan kapehden arail nohno. Mpen sounpwong duwau mwuri, Sises ipwidi. Ih mwomwen Mery oh eh pwoud, Sosep, wiahla ahn Sises pahpa oh nohno pohn sampah.

Ni ahnsou me Sises sounparte eisek riau, e wia mehkot me kasalehda ia uwen eh kin poakohng Semeo, Siohwa. Met wiawi ni ahnsou me Sises oh eh peneinei wia seiloak reirei ehu ong Serusalem pwehn iang Pahsohpa. Ni arail pwurpwurodohng imwarail, Sosep oh Mery sohte kak diarada Sises. Ke ese ia wasa e mihmi ie?—

Sosep oh Mery mwadang pwuralahng Serusalem oh rapahki Sises. Ira uhdahn pwunodikihda pwehki ira sohte kak diarada ih. Ahpw mwurin rahn siluh, ira diarada ih nan tehnpas sarawio! Ke ese dahme kahrehda Sises mihmi nan tehnpas sarawio?— Pwehki nan wasao, Sises kak sukuhlki duwen Semeo, Siohwa. E poakohng Siohwa oh men esehla ia duwen eh kak kaperenda ih. Pil ahnsou me e laudehr oh wialahr ohl emen, Sises kin peikiong Siohwa ahnsou koaros. Sises kin peik mehnda ma e apwal oh e anahne lokolok pwehki eh kin wia met. Ia duwe, Sises pil kin peikiong Sosep oh Mery?— Ei, Paipel mahsanih me e kin wia met.

Dahme ke kak sukuhlki sang ahn Sises mehn kahlemeng mwahu?— Ke anahne peikiong ahmw pahpa oh nohno mehnda ma e apwal. Ia duwe, ke pahn wia met?—