“Iei Met Nei Pwutak”

NI AHNSOU me seri kan kin wiahda me mwahu, arail pahpa oh nohno kin perenda. Ahnsou me serepein men kin wiahda me mwahu, eh pahpa kin perenki eh kak ndaiong meteikan: “Nei serepein met.” De ma pwutak men me wiahda me mwahu, eh pahpao kin perenki nda: “Nei pwutak met.”

Ahnsou koaros Sises kin ketin wia dahme kin kaperenda Semeo. Ihme kahrehda Semeo kin ketin perenki ih. Ke taman dahme Semen Siseso ketin wia ahnsou me Sises ketiket rehn sapwellime tohnpadahk silimeno?— Koht mahsen sang nanleng ong irail. E mahsanih: “Iei met nei pwutak kompoake me I kin popohlki.”​—Madiu 17:5.

Sises kin ketin perenki wia soahng kan me kin kaperenda Semeo. Ke ese dahme kahrehda? Pwehki eh ketin poakohng Semeo. Ma aramas men kin wia soahng kan ihte pwehki e anahne wia mehpwukat, eri e pahn apwal en wia soahng pwukat. Ahpw ma e kin perenki wia mepwukat, eri e pahn mengei.

Mwohn Sises eh ketidihdo sampah, e kin ketin perenki wia soahng koaros me Semeo kin mahsanih. Met pwehki e kin ketin poakohng Semeo me iei Siohwa Koht. Sises sapwellimanki pwukoa kesempwal nanleng rehn Semeo. Ahpw mie doadoahk kesempwal ehu me Koht ketikihong Sises. Sises anahne ketidihdo sampah pwehn kak wia doadoahk wet. E anahne ketin ipwidi pohn sampah. Sises ketin perenki wia met pwehki Siohwa kupwurki en wia met.

Sises ketin ipwidi nin duwen seri men pohn sampah. Ke ese eden eh nohno?— Ede Mery. Siohwa ketin kadarodo tohnleng Kapriel pwehn koasoiong Mery. Kapriel padahkihong me e pahn nainekihda seri pwutak emen. Serio pahn mwarenki Sises. Eri ihs me ahn serio pahpa?— Tohnlengo nda me Semen serio iei Siohwa Koht. Ihme kahrehda Sises pahn mwarenki Sapwellimen Koht.

Ke leme ia ahn Mery pepehm ong met?— Ia duwe, e nda, “I sohte men wia ahn Sises nohno”? Soh, Mery perenki wia dahme Koht kupwurki. Ahpw ia duwen sapwellimen Koht Ohlo me ketiket nanleng eh kak ketin ipwidi pohn sampah? Ia duwen ipwidi en Sises eh weksang ipwidi en seri teikan koaros? Ke ese?—

Eri Koht ketin wiahda tepin atail pahpa oh nohno Adam oh Ihp pwe ira en kak patpene ni ahl kaselel ehu. Mwurin mwo, seri men kak tepida kekeirda nan kapehden eh nohno. Aramas kin nda me met mehkot kapwuriamwei. I kamehlele me ke pahn pwungki met.

Koht pil ketin wiahda mehkot me inenen kaselel sang met. E ketikihong mouren sapwellime ohlo nan kapehden Mery. Mwohn mwo, Koht sohte kin ketin wia met oh e sohte ketin pwurehng wia. Pwehki wiewia kaselel wet, Sises tepidahr kekeirda nan kapehden Mery duwehte seri teikan arail kin keirda nan kapehden arail nohno kan. Mwurin mwo, Mery pwoudikihda Sosep.

Ni eh lelehr ahnsou me Sises pahn ketin ipwidi, Mery oh Sosep mwemweitla nan kahnimw en Pedleem. Ahpw kahnimwo direkihla aramas. Sohla wasa ong Mery oh Sosep kahrehda ira anahne mi nan dewen mahn akan. Mery eri kaipwidi Sises oh kihdi ih nan dewen kamwenge mahn ehu, duwehte nan kilel wet.

Soahng kaperen kei wiawi pwohng me Sises ketin ipwidi. Tohnleng men pwarohng silepen sihpw kei limwahn Pedleem. E padahkihong irail me Sises aramas kesempwal men. Tohnlengo nda: “I wadohng kumwail rohng kaperen mehlel pwoat, me pahn kaparanda aramas koaros. Pwe pwongpwong wet Sounkomouro ipwidiongkumwailehr.”​—Luk 2:10, 11.

Tohnlengo padahkihong silepen sihpw ko me re pahn diar Sises eh wie wonohn nan dewen kamwenge mahn ehu nan Pedleem. Eri, ni ahnsowohte tohnleng teikan nanleng iang tohnlengo kapikapinga Koht. Tohnleng ko koulki, “Kaping ong Koht — oh mwehi kapohl nin sampah ong aramas akan me e kin ketin kupwuramwahwih!”​—Luk 2:12-14.

Mwurin tohnleng ko kohkohla, silepen sihpw ko kohla Pedleem oh diarada Sises. Irail padahkihong Sosep oh Mery soahng mwahu koaros me re rongehr. Ke kak medewehla uwen Mery eh peren ni eh pwungki en wia en Sises nohno?

Mwurin mwo, Sosep oh Mery wahla Sises nan kahnimw en Nasaret. Iei wasao me Sises ketin tikida ie. Ni eh ketin laudla, e ketin tapiada sapwellime doadoahk en kalohk. Met wia kisehn doadoahk me Siohwa Koht kupwurki sapwellime Ohlo en wia pohn sampah. Sises ketin perenki wia doadoahk wet pwehki e ketin poakohng Seme nanleng.

Sohn Sounpapidais papidaisiala Sises nan pillap Sordan mwohn eh ketin tapiada sapwellime doadoahk nin duwen Sounpadahk Lapalapo. Mehkot kapwuriamwei eri wiawi. Ni en Sises eh ketida sang nan pihlo, Siohwa mahsanih sang nanleng: “Kowe, me iei nei pwutak kompoake, me I kin kupwurperenki.” (Madiu 3:17) Ke sou kin peren ni ahnsou me ahmw pahpa oh nohno kin nda me ira poakepoake iuk?— Kitail pil kak kamehlele me Sises pil ketin peren.

Sises kin ketin wia dahme pwung ahnsou koaros. E sohte kin ketin mwomwehda me ih emen tohrohr. E sohte kin ketin padahkihong aramas akan me ih Koht. Tohnleng Kapriel padahkihong Mery me Sises pahn mwarenki sapwellimen Koht Ohl. Pein Sises pil mahsanih me ih sapwellimen Koht Ohlo. E sohte ketin padahkihong aramas me e loalokong sang Semeo. E mahsanih me Semeo “lapalapasang” ih.​—Sohn 14:28.

Sises pil kin ketin wia doadoahk me Semeo ketikihong ih ni ahnsou me e ketiket nanleng. E sohte kin patohwanohng Semeo me e pahn wia mehkot ahpw mwuhr e uhd wia ehu soahng tohrohr. E kin ketin poakohng Semeo. Ihme kahrehda e kin rong dahme Semeo kin mahsanih. Eri ni en Sises ketidihdohng sampah, e kin ketin wia dahme Seme nanleng kupwurki en wia. E sohte kin ketin doadoahngki sapwellime ahnsou ong ehu soahng tohrohr. Ihme kahrehda Siohwa kin ketin perenki sapwellime Ohlo.

Kitail sou pil kin men kaperenda Siohwa?— Eri, kitail anahne kasalehda me kitail uhdahn kin rong Koht duwehte me Sises kin ketin wia. Koht kin mahsen ong kitail sang nan Paipel. E sohte konehng en mwomwehda me kitail kin rong Koht ahpw uhd kamehlele oh wia soahng kan me uhwong Paipel. Ia ahmw madamadau ong met?— Tamataman me kitail pahn perenki kaperenih Siohwa ma kitail kin uhdahn poakohng ih.