Tohnleng Men Tuhong Meri

LIH kasehlel menet iei Meri. Ih lih en Israel men, me kin kousoan nan kahnihmwen Nasared. Koht ese lih menet me inenen kasehlel. Ihme kahrehda e poronehdo sapwellime tohnleng Kapriel pwen koasoai ong ih. Ke ese dahme Kapriel kohdo padahkiong Meri? Kitail pahn kilang.

‘Rahn mwahu, kowe meid pai emen,’ Kapriel indaiong Meri. ‘Siohwa ieiang uhk.’ Meri saikinte kilang aramas menet mahs. E ekis perki, pwehki e sohte nohn wehwehki dahme pahn wiawi. Ahpw ansouohte Kapriel kameleileidi ah masapwehk.

‘Dehr masak, Meri,’ e inda. ‘Siohwa kupwur perenki uhk. Ihme kahrehda e pahn wia mehkot kasehlel kapwuriamwei rehmw. Ansou keren ke pahn naineki emen pwutak. Oh ke pahn kahdaneki serio Sises.’

Kapriel eri pousehla kawehwe: ‘Seri menet pahn lapalap, oh e pahn adaneki Sapwellimen me Keieu Ileile. Siohwa pahn kasapwilada ih nanmwahrki, duwehte Depit. Ahpw Sises pahn nanmwahrki kohkohlahte, oh ah wehi sohte pahn mie imwi!’

‘Iaduen met pahn kak wiawi?’ Meri idek. ‘I saikinte pwopwoud. I saikinte ese ohl, eri iaduen ai pahn liseian?’

‘Manaman en Koht pahn tih pohmw,’ Kapriel sapeng. ‘Ihme serio pahn adaneki Sapwellimen Koht.’ Ih eri padahkiong Meri: ‘Tamataman kiseomw lih Elisaped. Aramas kan inda me e mahlahr oh sohlahr kak naineki seri. Ahpw kereniong a pahn neitikihdi emen pwutak. Eri ke ese me sohte mehkot soh kak pahn Koht.’

Ansouohte Meri inda: ‘Ngehi lidu en Siohwa! En wiawi ong ie duen me ke mahsaniehr.’ Tohnlengo eri pidoi kohieila.

Meri mwadang tangala pwen tuhong Elisaped. Ni ansou me Elisaped rong ngihlen Meri, serio me mi nan kapehden Elisaped mwekid oh luski peren. Elisaped eri direkihla ngehn en Koht, oh indaiong Meri: ‘Kowe meid pai nanpwungen lih akan.’ Meri eri mihmi rehn Elisaped sounpwong siluh, oh mwuhri pwurala nan ah wasa Nasared.

Meri kaukauonop pwen pwoudkihda emen ohl me adaneki Sosep. Ahpw ni ansou me Sosep esehdahr me Meri liseianehr, e lemehdahr en dehr pwoudki ih. Tohnleng en Koht ahpw padahkiong ohlo: ‘Ke dehr masak en alehda ahmw pwoud Meri. Pwe Koht me ketikihong serepeino emen pwutak.’ Ihme kahrehda Meri oh Sosep mwuhri pwopwoudla, oh ira awiawih lao seri Sises ipwidi.