Ipwidi oh Mehla en Sises

Tohnleng Kapriel pekederelahng emen peinakapw kasehlel me adaneki Meri. E padahkiong serepeino me e pahn liseianda oh neitikihdi seri men me pahn kaun nanmwahrki kohkohlahte. Serio, Sises, me ipwidi nan deuen mahn, wasa me silepen sihpw tuhong ih. Mwuhri, usu ehu kahluwa ohl kei sang pali Mese ong kisin serio. Kitail pahn sukuhliki ihs me kahreong irail en kilang usuo, oh iaduen Sises kamourala sang widing en kamehla ih.

Mwuhri, kitail kilang Sises, ni ah sounpahr 12, koasokoasoaiong sounpadahk kan nan ihmwen kaudoko. Sounpahr eisek waluh mwuhri Sises pepdaisla, oh tapiada wia doadoahk en kalohk oh padapadahki Wehio me Koht poronehdo ih sampah pwen wia. Pwen sewese ih nan doadoahk wet, Sises pilada ohl 12 en wia sapwellime werek.

Sises pil wia manaman tohto. E kamwenge aramas kid kei ki mwahmw oh lopwon en pilawa malaulau kei. E kamwahuiahla me soumwahu oh kamourada me mehla. Ni kaimwisekela, kitail sukuhliki duen mehkan tohto me wiawiong Sises ni kaimwisekelahn rahn akan en ah mour, oh ah kamakamala. Sises kalkalohk ki sounpahr siluh elep, ihme PALI 6 orapene ansoukis me reireiki sounpahr ele 34.