Sises Ipwidi Nan Deuen Mahn

KE ESE ihs me kisin seri pwelelet? Ei, ih me Sises. E ahpwtehn ipwidi nan deuen mahn. Nan deuen mahn iei wasa me mahn akan kin nekinek ie. Meri kin pwilikihdi Sises nan mehn kamwenge mahn, wasa me re kin wudekihdi kenen mahn akan mwenge pwe ren kang sang ie. Ahpw dahme kahrehda Meri oh Sosep mi wasakis me mahn akan mi ie? Met kaidehn wasa me konehng seri en ipwidi, kaidehn?

Soh, kaidehn. Ahpw iet kahrepen ara mihmihki wasaht: Kaun en wehin Rom, Sihser Aukustus, wiahda kosonned ehu me aramas kan koaros en pwuralahng kahnihmw oh wasa me re ipwidi ie pwe ren pwurehng intingihdi adarail nan pwuhk en wehi. Eri, Sosep ipwidi nan Pedlehem. Ahpw ni ansou me ih oh Meri leldo wasao, sohlahr pere nan ihmwen keiru. Ira eri kohieila nan wasahn apwali mahn. Oh ni rahnohte Meri kaipwidi Sises! Ahpw, duen me ke kilang wasaht, serio me insenamwahu.

Ke kak kilang silepen sihpw kan kohkohdo pwen kilang Sises? Irail mihmi nan mohs apwahpwali neirail sihpw, oh marain lingan ehu sereda irail. Met tohnleng men! Silepen sihpw ko eri masapwehkada kowahlap. Ah tohnlengo inda: ‘Kumwail dehr masak! I wahdohng kumwail rohngamwahu. Rahnwet, nan Pedlehem, Kraist me Kaun ipwidiehr. E pahn doarehla aramas akan! Kumwail pahn diar ih kidikidkipene likou oh mi ni deuen kamwenge mahn.’ Ansouohte tohnleng tohto kohdo oh tapiada kapinga Koht. Ihme ansouohte silepe ko eri mwadang kohieila pwen rapahki Sises, oh met irail diaradahr ih.

Ke ese dahme kahrehda Sises me nohn kesempwal? Ke ese ihs me uhdahn ih? Tamataman, nan keieun poadoapoad en nan pwuhket kitail koasoaia duen sapwellimen Koht keieun Ohl. Menet kin iang Siohwa doadoahk ni kapikadahn lahng oh sampah oh audepe kan koaros. Eri, menet iei Sises!

Ei, Siohwa alehda mour en sapwellime Ohl sang nan lahng oh kapidelong nan kapehden Meri. Ansouohte serio tapiada kakairada nan kapehden liho duwehte me seri teikan kin kakairada nan kapehden arail nohno kan. Ahpw ni mehlel seri menet uhdahn sapwellimen Koht. Ihme mwuhri Sises ipwidi nan deuen mahn nan Pedlehem. Ke kak kilang met kahrepen peren laud me tohnleng ko ahniki oh padahkiong aramas kan me Sises ipwidiehr?