Sises Padahk Pohn Dohl

KILANG Sises mwomwohd wasaht. E padapadahk ong aramas pwukat pohn ehu dohl nan Kalilih. Irail akan me mwomwohd limwah iei sapwellime tohnpadahk kan. E piladahr me 12 pwen wia wahnpoaron akan. Wahnpoaron kan iei sapwellimen Sises tohnpadahk tohrohr kan. Ke ese adarail?

Emen adaneki Saimon Piter oh rie ohl Andru. Iet Seims oh Sohn, me pil pirien ehu. Emen pil adaneki Seims, oh emen Saimon. Wahnpoaron riemen adaneki Sudas. Emen me Sudas Iskariod, oh mehteio Sudas me pil adaneki Daddaeus. Oh pil Pilip oh Nadanael (me pil adaneki Pardolomiu), oh Madiu oh Domas.

Mwehrin ah pwurasang Samaria, Sises tapiada tapin ah kalohk ong aramas: ‘Wehin nanleng kerendor.’ Ke ese dahme wehio? Kopernment ehu sang Koht. Sises me nanmwahrki en kopernmento. E pahn kaunda sang nanleng oh wahdo meleilei ong sampah. Sampah pwon pahn wiahla paradais lingan ehu pahnangin wehin Koht.

Wasaht Sises padapadahk ong aramas kan duen wehio. ‘Iet duen omwail pahn kapakap,’ e kawehwehong irail. ‘Sahmat me ketiket nanleng, mwaromwi en kasarawihla. Omwi wehi en ketido. Kupwuromwi en wiawi sampah, duwehte nanleng.’ Aramas tohto kin kahdaneki kapakap wet ‘Kapakap en Kauno.’ Ekei kin kahdaneki ‘Kapakap en Sahmat.’ Ke kak wia kapakapo pwon?

Sises pil padahkiong aramas duen arail wiewia rehn emenemen. ‘Wiaiong mehteikan duen me ke mwahuki ren wiaiong uhk,’ e mahsanih. Ke kin mwahuki aramas kan en wiaiong uhk mehkan ni kadek? Ihme Sises mahmahsanih, kitail en wiaiong mehteikan mehkan ni kadek. E soh pahn wia mehkot kasehlel ma nan paradais sampah aramas koaros pahn wia duwehte met?