Irail Kan Me wiahla Sapwellimen Sises Tohnpadahk

IHS me wia sapwellimen Koht ladu me keieu mwahu?— Ke pwung, Sises Krais. Ke leme kitail kak duwehte ih?— Paipel mahsanih me e ketikihda mehn kahlemeng pwe kitail en idawehn. E pil ketin luke kitail en wiahla sapwellime tohnpadahk.

Ke ese ia wehwehn en wia sapwellimen Sises tohnpadahk?— E kin pidada soahng kei. Keieu, kitail anahne ale kasukuhl sang reh. Ahpw kaidehn ihte met, kitail pil anahne uhdahn kamehlele dahme e kin mahsanih. Met pahn kahrehiong kitail en wia dahme e mahsanihong kitail.

Me tohto kin nda me re kamehlele Sises. Ke lemeleme irail koaros kin wia sapwellime tohnpadahk?— Soh, pali laud en irail sohte kin wia sapwellime tohnpadahk. Mwein irail kin kohla sarawi. Ahpw tohto irail sohte kin kihong arail ahnsou ren sukuhlki duwen dahme Sises kin ketin padahngki. Irail kante me kin idawehn sapwellimen Sises mehn kahlemeng me wia sapwellime tohnpadahk.

Kita pahn koasoiapene duwen ekei irail me wia sapwellimen Sises tohnpadahk ni eh ketiket pohn sampah. Emen me tepin wiahla sapwellime tohnpadahk iei Pilip. Pilip kohla pwehn rapahki kompoakepah Nadaniel (me pil adaneki Pardolomiu) me wie mwomwohd pahn tuhke nan kilel wet. Ni en Nadaniel patohdo rehn Sises, Sises mahsanih: ‘Iet ohl emen me kin mehlel, uhdahn ohl en Israel men.’ Nadaniel pwuriamweila oh idek ia duwen Sises eh mwahngih duwen ih.

Sises mahsanih: “I kilanguhkadahte mwohn Pilip eh ekeruhkodo, ni omw mihmi pahn tuhke piko.” Nadaniel uhdahn pwuriamweiki Sises eh mwahngih wasa me e mi ie, kahrehda e sapeng patohwan: “Uhdahn Sapwellimen Kohto komwi! Komwi me Nanmwarkien Israel.”​—Sohn 1:49.

Ekei wiahla sapwellimen Sises tohnpadahk rahn ehu mwohn Pilip oh Nadaniel. Irail pwukat iei Andru oh rie Piter iangahki Sohn, oh mwein rie Seims pil wiahla sapwellime tohnpadahk mwowe. (Sohn 1:35-51) Ahpw mwuhr, irail meh pahmen pwukat pwuralahng arail doadoahk en laid. Eri ehu rahno, ni en Sises ketin alialu limwahn Lehen Kalili, e mahsanihada Piter oh Andru ara kihkihdi ara uhko nansedo. Sises eri mahsanihong ira: “Kumwa kohdo iangiehla.”

Ni eh wie ketiket kohwei, Sises mahsanihada Seims oh Sohn. Ira mi rehn ara pahpa nan pwoht pwoat oh kamwakamwahwihala arail uhk ko. Sises pil ketin luke ira en idawehnla ih. Dahme ke pahn wia ma Sises ketin luke iuk en idawehnla ih? Ke pahn mwadangete iangala ih?— Ohl pwukat ese Sises. Irail ese me Koht me ketin kadarodo ih. Kahrehda ni ahnsowohte re pwilikihdi arail doadoahk en laid oh idawehnla Sises.​—Madiu 4:18-22.

Ia duwe, mwurin ohl pwukat arail wiahla sapwellimen Sises tohnpadahk kei, re kin ahnsou koaros wia dahme pwung?— Soh. Mwein ke pahn tamanda me ohl pwukat akamaikihda ihs nanpwungarail me keieu lapalap. Ahpw re kin rong Sises oh nantihong wekidala arail madamadau. Ma kitail kin men wiahda wekidekla kan nan atail mour, kitail pil kak wiahla sapwellimen Sises tohnpadahk.

Sises kin ketin luke soangen aramas koaros en wiahla sapwellime tohnpadahk. Ehu pako, kaun pwulopwul kepwehpwe men patohdo rehn Sises oh idek ia duwen eh pahn kak ale mour soutuk. Ni en kaun menet patohwanohng Sises me e kin kapwaiada sapwellimen Koht kosonned kan sangete ni eh tikitik, Sises ahpw mahsanihong ih: “Kohdo oh iangiehla.” Ke ese dahme wiawi?—

Ni en ohl pwulopwulo esehda me en wia sapwellimen Sises tohnpadahk kesempwalsang kepwehpwe, e uhdahn nsensuwedla. E sohte wiahla sapwellimen Sises tohnpadahk pwehki e poakohng nah mwohni laudsang eh poakohng Koht.​—Luk 18:18-25.

Mwurin Sises eh ketin kalohk kereniong sounpar ehu elep, e ketin pilada sapwellime tohnpadahk 12 pwehn wiahla wahnpoaron kei. Wahnpoaron ko iei ohl ekei me e ketin kadarala pwehn wia doadoahk kesempwal ehu. Ke ese adarail?— Kitail pahn song en esehla adarail kan. Kilang irail nan kilel wet oh song nda adarail. Mwuri song wadlikihla.

Mwuhr emen rehn wahnpoaron 12 ko suwedla. Iei ih Sudas Iskariot. Mwurin mwo, emen tohnpadahk pilipilda pwehn wiliandi ih oh wiahla wahnpoaron. Ke ese edeo?— Ede Madaias. Mwuhr, Pohl oh Parnapas pil wiahla wahnpoaron kei ahpw ira sohte iang wia kisehn wahnpoaron 12 ko.​—Wiewia 1:23-26; 13:43.

Nin duwen me kitail sukuhlkier nan Irelaud 1, Sises kin ketin nsenohki seri kan. Dahme kahrehda e kin ketin wia met?— Pwehki e mwahngih me irail pil kak wiahla sapwellime tohnpadahk kan. Seri kan kin kak nda soahng kan me kak kahrehiong me laud kan en rong oh men sukuhlki duwen Sounpadahk Lapalapo.

Lih tohto pil wiahla sapwellimen Sises tohnpadahk. Ekei irail iang ih seiloak ni eh ketila pwehn kalohk nan kahnimw teikan. Mery Makdala, Sohanna oh Susana iang wia met. Mwein re pil iang sawas oh kaunopada sapwellime konot oh lopwor sapwellime likou kan.​—Luk 8:1-3.

Ke men wiahla sapwellimen Sises tohnpadahk?— Tamanda me en ndahte me kitail wia sapwellime tohnpadahk sohte itar. Ahnsou koaros atail wiewia kan anahne kasalehda me kitail sapwellime tohnpadahk, kaidehn ihte ahnsoun mihting en Kristian kan. Ke kak medewehda ekei wasa kan me e kesempwal atail wiewia kan en kasalehda me kitail wia sapwellime tohnpadahk?—

Kitail anahne wia met nan imwatail. Pil ehu wasa iei nan sukuhl. Kitail en dehr manokehla me pwehn wiahla sapwellimen Sises tohnpadahk, kitail anahne kahlemengih ih ahnsou koaros oh wasa koaros me kitail mi ie.