Sises Kamwahuiahla oh Kakehleda Me Soumwahu

NI EN Sises kin kakahnseli wasa kan, e kin kakehleda me soumwahu. Rohng en manaman pwukat kohpesangehr nan wasahn kousoan kan oh kahnihmw akan koaros. Ihme aramas kan eri wahdohng ih me mwoatoar oh maskun, oh salengpon, oh soahngen soumwahu teikan. Oh Sises kamwahuiahla irail koaros.

Dauliehr sounpahr siluh sang ansou me Sises pepdaisla rehn Sohn. Oh Sises padahkiong sapwellime wahnpoaron kan me ansou keren e pahn kohdahla Serusalem, wasa me e pahn kamakamala, oh mwuhri mourada sang mehla. Ni ansou pwukat koaros Sises kin kaukaule kakehleda me soumwahu kan.

Ehu rahn Sises padapadahk ni rahn en Sapad. Sapad iei rahn en kommoal ehu ong mehn Suhs kan. Liho me ke kilang soumwahu laud. Sounpahr 18 e sohte kak inenda alu. Ihme Sises doakeki peho pohn pwopwen liho, oh e tapiada kak uhda. Liho kehlaildahr!

Met kahreong kaun en lamalam akan en mwakarada kowahlap. ‘Mie rahn wenou me kitail kak doadoahk,’ emen ngihl laudki ong pokono. ‘Iei rahn oko me kitail kak kohdo oh kakehleda, ah kaidehn rahn en Sapad!’

Ahpw Sises sapeng: ‘Kumwail meid suwed. Kumwail kin sapwadada noumwail donkih pwen nim pihl rahn en Sapad. Eri dah, lih menet, me soumwahu sounpahr 18, soh konehng en kehlailada rahn en Sapad?’ Ahn Sises pasapeng kahreong ohl suwed pwukat en namenekla.

Mwuhri Sises oh sapwellime wahnpoaron ko doulullahng Serusalem. Ni arail lelahng likin kahnihmwen Seriko, ohl maskun riemen rong me Sises pahn doulul wasao. Ira ahpw ngihl laud likwer: ‘Sises, sewese kiht!’

Sises eri likweri ohl maskun ko en kohdo, oh e idek: ‘Dahme kumwa men I en wiaiong kumwa?’ Ira patohan ong: ‘Kaun, kapehdpesang mesaht.’ Sises eri sair mesara, oh ansouohte re kak kilangada wasa! Ke ese dahme kahrehda Sises wiahki soahngen wiewia kapwuriamwei oh kasehlel pwukat? Pwehki e poakong aramas oh men aramas en pwoson ih. Ihme kitail en kamehlele me ni ansou me e pahn kaunda duwen Nanmwahrki sohte emen pohn sampah pahn pwurehng soumwahu.