Sises Ketido Duen Nanmwahrki

ANSOUKIS mwehrin ah kapehdpesang mesen ohl maskun riemeno, Sises kohieido nan ehu kisin kahnihmw limwahn Serusalem. Ih eri padahkiong sapwellime tohnpadahk riemeno: ‘Kohieila nan kahnihmwo oh kumwa pahn diar emen donkih pwulopwul. Sapwadada oh kahredohng ie.’

Ni ansou me re kahrehdo donkiho ong ih, Sises eri douda powe. Ih eri dake donkiho ong wasakis mwotomwot lahng Serusalem. Ni ah kereniong kahnihmwo, pokon kalaimwun ehu kohieido kasamwo ih. Kereniong irail koaros kihsang arail sekid en liki oh pwilikihdi pohn ahlo. Ekei lepukada tehn painih. Irail eri pwilikihdi mehpwukat pohn ahlo, oh ngisingis indahda: ‘Koht kapaiada nanmwahrkio me ketido ni mwaren Siohwa!’

Mahs iei tiahk en nanmwahrki kapw en Israel kan en dake emen donkih pwulopwul kohlahng nan Serusalem pwen kasaleong ih aramas kan. Ihme Sises wiahdahr. Oh irail aramas kan kasansalehda me irail pwungki Sises en wia arail nanmwahrki. Ahpw kaidehn aramas koaros pwungki ih. Kitail kak kilang met ni en Sises pidelong ong nan ihmwen kaudoko.

Ni ihmwen kaudoko Sises kakehleda me maskun oh mwoatoar. Ni en seri kan kilang met, irail ngisingis oh kapinga Sises. Ahpw met kahreong samworo ko en mwakarada, oh irail patohan ong Sises: ‘Ke ese dahme seri ko indahda?’

‘Ei, I ese,’ Sises sapeng. ‘Kumwail sohte wadek nan Paipel wasa me inda: “Sang nan auwen kisin seri Koht pahn ketikihda kaping?”’ Ihme seri ko eri kaukaule kapinga sapwellimen Koht nanmwahrki.

Kitail men pil duwehte seri pwukat, kaidehn? Ekei aramas pahn song en katokiedi kitail sang koasokoasoaia duen wehin Koht. Ah kitail pahn nantiongete padahkiong mehteikan duen soahng kasehlel kan me Sises pahn wiaiong aramas.

Ansou me Sises ketiket sampah e saikinte lel ansou me e pahn tapiada ah kaunda. Iahd me ah kaunda pahn leldo? Sapwellimen Sises tohnpadahk kan men ese. Kitail pahn wadek met ekis mwuhr.