Pohn Dohl en Olip

ANSOUWET Sises mi pohn Dohl en Olip. Ohl pahmen me iang ih iei kisehn sapwellime wahnpoaron ko. Irail pirien kei, Andru oh Piter, oh pil Seims oh Sohn. Ihmwen kaudok en Koht nan Serusalem ihme ke kak kilang ekis dohwei.

Rahn riau dower powe sang ansou me Sises dakehlohng donkih pwulopwulo nan Serusalem. Met Ni Are. Ni menseng en rahno Sises mi ni ihmwen kaudoko. Iei wasao me samworo ko song en parokedi Sises pwen kamehla ih. Ahpw irail masapwek pwehki aramas tohto mwahuki Sises.

‘Kumwail duwehte sineik oh nain sineik!’ Sises kahdaneki irail kaun en lamalam pwukat. Sises eri mahsanih me Koht pahn kaloke irail pwehki arail wiewia suwed. Mwehrin mwo Sises kohieila pohn Dohl en Olip, oh iei ansou irail wahnpoaron pahmen pwukat tapiada peidek reh. Ke ese dahme irail idek rehn Sises?

Wahnpoaron ko kin wia arail peidek ong mehkan nan ansou kohkohdo. Irail ese me Sises pahn kasohrwei sang me suwed sampah. Ahpw irail pil men ese iahd me met pahn wiawi. Iahd me Sises pahn ketido pwen kaunda duwen Nanmwahrki?

Sises ese me sapwellime kan nan sampah sohte pahn kak en kilang ih ni ah pahn ketido. Met pwehki e pahn ketiket nanleng, oh irail sohte pahn kak en kilang ih wasao. Ihme Sises padahkiong sapwellime wahnpoaron kan duen soahng kan me pahn wiawi sampah ni ansou me e pahn tapiada kaun duen Nanmwahrki sang nanleng. Ia ekei soahng pwukat?

Sises mahsanih me e pahn mie mahwin lapalap en sampah, aramas tohto pahn lehkla oh soumwahu, kakairada en dihp oh suwed, oh rerrer en sampah. Sises pil mahsanih me rohngamwahu en wehin Koht pahn kalohkseli wasa koaros nan sampah. Kitail kilangehr soahng pwukat wia kakairada nan atail mwehi? Ei! Oh kitail ese me ansouwet Sises kakaun nanleng. Ansou keren e pahn kasohrwei me suwed koaros nan sampah.