“Sapwellime Ahnsou Lelehr!”

“Sapwellime ahnsou lelehr en mweselsang sampah wet oh ketilahng rehn Seme.”​—SOHN 13:1.

1. Ni ahnsoun Sarawien Pahsohpa kerendohr nan pahr 33 C.E., tohn kahnimw en Serusalem tohto kin peidekihpene duwen dah, oh dahme kahrehda?

NI AHNSOU me Sises papidaisla nan pahr 29 C.E., e tepida kekeid nan ahl me pahn kahluwalahng sapwellime “ahnsou” en pwoula, kaiasada, oh linganla. Met iei ahnsoun spring en 33 C.E. Wihk keite dower powe mwurin irail tohn Mwoalen Kopwung Lapalap (Sanhedrin) en mehn Suhs akan tuhpene pwehn wiahda ahr pilahn en kemehla Sises. Sises rong duwen arail pilahn, mwein sang Nikodihmas, pwe ih emen tohn Mwoalen Kopwung Lapalap me kin kompoakepahnki Sises, oh Sises eri mweselsang Serusalem oh kohlahng wasakis me kereniong sapwtehn, palio Pillap en Sordan. Ni kerenlahng imwiseklahn Sarawien Pahsohpa, aramas tohto kohsang nan wehi kan oh kohlahng Serusalem, oh aramas tohto tepida peidekihpene nanpwungarail duwen Sises. Re wia soangen peidek kan duwehte met: “Dahme kumwail lemeleme? Ohlo pahn iang sarawi wet, de soh?” Samworo lapalap ako oh Parisi ko ahpw koasoanediong aramas akan: ma emen nanpwungarail ese wasa me Sises ketiket ie, a en pakair ong irail.​—Sohn 11:47-57.

2. Dahme Mery wia me kahrehong aramas akan en lingeringerda, oh sang Sises eh pasepeng me utungada wiewiahn Mery kin ni sansal kasansalehda me e kin mwahngih duwen “sapwellime ahnsou”?

² Nan Nisan 8, rahn weneu mwohn Pahsohpa, Sises ahpw ketiketseli karanih kahnimw en Serusalem. E ahpw ketilahng Pedani​—wasa me kompoakepah keren kan Marda, Mery, oh Lasarus kin koukousoan ie—​mpen mwail riau dohsang Serusalem. Met ni soutik en Ni Alem, ahnsoun Sapad, oh Sises mihmihte wasao. Mandahn rahno ni soutik, Mery doadoahngki soangen leh me inenen pweilaud ong Sises, ahpw sapwellime tohnpadahk kan uhwong wiewia wet. Sises sapengki irail: “Kumwail dehr kedirepwki lihet! Kumwail mweidong en nekidala dahme e ahnekio ong ni rahn me I pahn seridi. Me semwehmwe kan pahn kin mihmihte rehmwail ahnsou koaros, a ngehi sohte pahn mihmi rehmwail ahnsou koaros.” (Sohn 12:1-8; Madiu 26:6-13) Sises ketin mwahngih me ‘sapwellime ahnsou lelehr en mweselsang sampah wet oh ketilahng rehn Seme.’ (Sohn 13:1) Rahn limau sang met oh e pahn “tounmeteikihla eh mour pwe en komourala aramas ngeder.” (Mark 10:45) Ihme kahrehda, soahng koaros me Sises kin wia oh sapwellime padahk kin kasalehda me e wehwehki me ah ahnsou en ketiket nin sampah mwotomwotlahr eri soahng koaros e kin wia ni madamadau en karuwaru. Mehn kahlemeng mwahu ehu ong kitail nin duwen kitail pil kin kasikasikong imwin koasoandi wet! Tehk duwen dahme Sises wia mandahn rahno.

Rahn me Sises Ketilong Nan Serusalem ni Roson en Powehdi

3. (a) Iaduwen Sises ketilong nan Serusalem nan Rahn Sarawi ni Nisan 9, oh iaduwen pali moron en pokono mwekidki ih? (b) Dahme Sises padahkiong irail Parisi kei me kin kompilainki duwen pokono?

³ Rahn Sarawi, Nisan 9, Sises ketilong nan Serusalem ni roson en powehdi. Ni eh kerenlahng kahnimwo​—e ket pohn ahs emen, nein ahs pwul men oh met kapwaiada kokohp en Sekaraia 9:9​—pali moron en aramas akan me iang pokono ahpw irepehkihdi ar likou kan nanialo, a ekei pelehdi rahntuhke kei oh pil irepehkihdi nanialo. Re ahpw ngisingiski ar koul, ndinda, “Koht en ketin kupwuramwahwih me ketiket kohdo ni mwaren Kauno! Parisi kei me iang pokono ahpw patohwanohng Sises, en ketin angiangihada mahs sapwellimen Sises tohnpadahk kan pwe re en nennenla. Ahpw Sises ketin sapeng, “Kumwail en ese pwe ma re pahn nennenla, takai pwukat pahn uhd pein lokaiahda.”​—Luk 19:38-40; Madiu 21:6-9.

4. Dahme kahrehda tohn Serusalem pwon mworoangada ni ahnsou me Sises ketilong nan kahnimwo?

⁴ Wihk kei mwowe, aramas tohto me iang pokon wet pein kilangada Sises kaiasada Lasarus. Aramas pwukat kin padahkiong meteikan duwen manaman wet. Kahrehda, ni ahnsou me Sises ketilong nan Serusalem, tohn kahnimwo pwon mwoarongada oh idihdek, “Ihs ohl menet?” A pokono ahpw kin sapengkin irail, “Soukohp Siseso met, mehn Nasaret wehin Kalili!” Parisi ko kilang dahme wiwiawi, irail nsensuwedla nda nanpwungarail: “Pwe met tohn sampah koaros kin idawehnla.”​—Madiu 21:10, 11; Sohn 12:17-19.

5. Dahme wiawi ni ahnsou me Sises ketilong nan Tehnpas Sarawio?

⁵ Nin duwen Sises, Sounpadahk Lapalap, kin kalap wia ni ahnsou me e kin mwemweitla Serusalem, e ketilong nan Tehnpas Sarawio oh padahk ong aramas akan. Aramas maskun kei oh nehtuk kei kin kohla rehn Sises oh ih eri ketin kakehleirailda. Samworo lapalap ako oh sounkawehwe kan en Kosonnedo ahpw lingeringerda ni ar kilangada manaman ako me Sises ketin wiewia oh pwutak kan ahr wie weriwerki nan Tehnpas Sarawio ndinda, “Kaping ong ih me kisehn kadaudok en Depit!” Re uhwong Sises oh ndinda: “Komw karonge dahme seri pwukat wie patopatohwan?” Sises ketin sapeng irail, mahsanih, “Iei, I rong. Eri dah? Kumwail sohte mwahn kin wadek mahsen en Pwuhk Sarawi me mahsanih, ‘Komw ketin aleier kaping unsek sang ni ewen seri kan oh sang rehn me kin wie dihdi kan’?” Sises eri pousehla wie padapadahk, ahpw e kin kasawiahda dahme aramas akan kin wiewia nan Tehnpas Sarawio.​—Madiu 21:15, 16; Mark 11:11.

6. Iaduwen sapwellimen Sises mwekid kan ahnsouwo kin weksang sounpwong kei mwowe, oh pwekihda?

⁶ Sapwellimen Sises mwekid kan ahnsou wet kin weksang sounpwong weneu samwalahro! E ketidalahng Serusalem ong nan Sarawien Impwal “ahpw e ketidahla ni rir.” (Sohn 7:10) Ahnsou koaros e kin kak tangasang aramas me kin rapahki ih pwehn kemehla ih. Ahpw met, e ketidala ni sansal ong kahnimwo​—wasa me kosonned kohda en raparapahki ih oh selidi! Ahpw, Sises pil sohte kin pakairkihda me Ih me Mesaia. (Aiseia 42:2; Mark 1:40-44) Ni mehlel, e sohte kupwurki aramas akan en koasoi duwen ih de wia pakair kan duwen ih oh dahme e kin wia (keieu soahng kan me sohte mehlel). Ahpw met, pokono pakapakairseli ni sansal me ih me Nanmwarki oh Sounkomour​—Mesaiao—​oh e kaweidih ni kehlail irail kaunen pelien lamalam kan ahr pekipek kan en padahkiong pokono en nennenla! Dahme kahrehda e weksang mahso? Pwehki “awao leledohr me Nein-Aramas pahn linganla,” nin duwen me Sises pakairki mandahn rahno.​—Sohn 12:23.

Wiewia Kommwad Ehu​—Mwuri: Mehn Kasukuhl kan en Komour

7, 8. Iaduwen sapwellimen Sises wiewia kan nan Nisan 10, 33 C.E., kin duwehte dahme e wia nan Tehnpas Sarawio ni Pahsohpa en pahr 30 C.E.?

⁷ Ni ahnsou me Sises ketilong nan Tehnpas Sarawio, Ni Ehd, Nisan 10, e wia mehkot me poahsoankihda dahme e mahsanihada mwurin souwas en rahn en mwowe. E tepihada ‘kasareieisang loale irail koaros me netinet oh pwapwain dipwisou wasao. E ahpw pil wekidedi en sounkawilian mwohni ko ar tehpel kan oh en sounnetiki mwuroi ko ar mehn mwohd kan. E pil sohla mweidohng aramas en wahseli mehkot nan Tehnpas Sarawio.’ E ahpw mahsanihong aramas ako, “E ntingdi nan Pwuhk Sarawi me Koht mahsanih, ‘Imwei pahn adaneki imwen kapakap rehn tohn sampah koaros.’ Kumwail ahpw wiahkihla dewen loallap akan!”​—Mark 11:15-17.

⁸ Dahme Sises wia ahnsowo duwehte dahme e wia sounpar siluh samwalahro ni ahnsou me e ketila nan Tehnpas Sarawio ni Pahsohpa en pahr 30 C.E. Ahpw, kadeik me Sises wia ahnsowo me kehlail sang mahs. E kadanekihla irail sounnet akan nan Tehnpas Sarawio “loallap akan.” (Luk 19:45, 46; Sohn 2:13-16) Aramas pwukat kin netikihong aramas akan mahn akan en meirong ahpw nohn pweilaud. Eri, irail samworo lapalap akan, sounkawehwehn kosonned akan, oh aramas lapalap akan rong duwen dahme Sises wia oh irail pwurehng rapahki ahl akan en kemehla ih. Ahpw, irail sehse iaduwen irail pahn kemehla Sises, pwehki aramas koaros kin men rongorongete sapwellime padahk kan oh sohte men katiasang sapwellime padahk kan.​—Mark 11:18; Luk 19:47, 48.

9. Padahk dahieu me Sises wiahda, oh dahme e luhke ong aramas akan me rongorong eh padahk nan Tehnpas Sarawio?

⁹ Ni Sises pousehla padapadahk nan Tehnpas Sarawio, e mahsanih: “Awao leledohr me Nein-Aramas pahn linganla.” Ei, e ese me rahn kei me luwe mwohn e pahn pwoula. Mwurin e kawehwe duwen weren wihd anahne mehla mwohn e pahn kapwarehda war tohto​—met kin rasehng ahnsou me Sises pahn pwoula pwehn kak kihong aramas akan arail koapworopwor en kak ale mour soutuk—​Sises luhke aramas akan me rongorong sapwellime padahk, mahsanih: “Mehmen me men papah ie, e uhdahn pahn idawehn ie, pwe wasa me I pahn mi ie, e pil pahn mi ie. Oh Semei pahn ketin kawauwihala me kin papah ih.”​—Sohn 12:23-26.

10. Ia kupwuren Sises ong kalokolok mwohn e pahn pwoula me awiawih ih?

¹⁰ Sises medemedewe duwen kalokolok laud e pahn lelohng ni ahnsou me e pahn pwoula rahn pahieu sang ahnsowo, oh e mahsanih: “Ahnsou wet ngeniet pahtoulahr; a dahme I pahn nda? Semei, komwi dehr ketin mweidohng awa wet en kodohng ie.” Ahpw dahme Sises pahn lelohng, e sohte kak pitsang. Ihme e mahsanih met, “pwe iei kahrepen ei kohdo, pwe I en lelohng nan awahn lokolok wet.” Mehlel, Sises kin pwungki sapwellimen Koht koasoandi. E kin nantihong kapwaiada kupwuren Koht lao lel e pahn pwoula nin duwen meirong en tomw. (Sohn 12:27) Sises kin wia mehn kahlemeng mwahu ong kitail​—nin duwen emen me uhpaiong kupwuren Koht ni unsek.

11. Dahme Sises padahkiong pokono me ahpwtehn rongada ngihl ehu peidihdo sang nanleng?

¹¹ Pwehki Sises sohte men kauwehla mwaren Seme ni ahnsou me e pahn pwoula, e kapakapki met: “Maing Semei, komwi ketin kalinganahla mwaromwi.” Pokon me mih nan Tehnpas Sarawio inenen pwuriamweikihla pwe re rong ngihl ehu me peidihdo sang nanleng, me mahsanih: “I kawauwihlalahr edei, oh I pahn pwurehng kawauwihala.” Sises, Sounpadahk Lapalapo, eri kawehwe ong pokono dahme kahrehda irail rong ngihl wet, oh iaduwen e pahn pwoula, oh dahme kahrehda irail anahne en ahneki pwoson. (Sohn 12:28-36) Ni kaimwiseklahn rahn riau en eh mour, Sises kin inenen kedirepw. Ahpw, rahn kesempwal ehu pahn wiawi ehu rahn.

Rahnen Kadeik akan

12. Iaduwen irail kaun en pelien lamalam akan song en kasapwungehki Sises Ni Are (Nisan 11), oh ia imwilahn met?

¹² Ni Are, Nisan 11, Sises pil ketilong nan Tehnpas Sarawio, e ahpw ketin pwurehng wia sapwellime padahk. Ahpw, pwihn en uhwong kan mihmihte nan Tehnpas Sarawio. Irail samworo lapalap ako oh kaunen mehn Suhs ako wiahiong ih peidek pwoatet me pid dahme Sises wia rahn mwoweo: “Ni manaman en ihs me komw ketin wiewiahki soahng pwukat? Ihs me ketikihong komwi manaman wet?” Sises, Sounpadahk Lapalap, kasarohdi irail ahnsou me e sapeng irail, oh e padahkiong irail karasaras siluh ni sansal​—karasaras riau me pid duwen mwetin wain ehu oh pil ehu karasaras me pid duwen kamadipw en kapwopwoud—​mehpwukat kin kasansalehda ia uwen suwed aramas pwukat me kin uhwong Sises. Kaun en pelien lamalam ko lingeringerda oh irail men parokedi Sises. Ahpw, re masak pokon en aramas akan, pwehki aramas akan kin wiahki Sises soukohp men. Eri, irail ahpw song en kasapwungehki Sises ni sapwellime mahsen kan pwe re koapworopworki me e pahn mahsanih mehkot pwehn mie kahrepe re kak parokedi ih. Ahpw, ahnsou me Sises kin sapeng irail, re sohte kak nda mehkot.​—Madiu 21:23–22:46.

13. Ni Sises ah kin padahk ong aramas akan me kin rongorong, kaweid dahieu e ketikihong irail me kin pid irail sounkawehwehn Kosonnedo oh Parisi kan?

¹³ Pwehki irail Sounkawehwehn Kosonnedo oh Parisi kan kin kose me dene me re kin padahk duwen Sapwellimen Koht Kosonnedo, Sises kangoange aramas me kin rongorong: “Sounkawehwehn Kosonnedo oh Parisi kan, iei irail me ahneki manaman en kawehwehda Kosonned en Moses. Eri, kumwail uhdahn pahn kin peikiong oh kapwaiada mehkoaros me re pahn kin padahkihong kumwail; a kumwail dehr alasang ar wiewia kan; pwe re sohte mwahn kin kapwaiada dahme re kin kapahrengkihwei.” (Madiu 23:1-3) Ia uwen kehlail kadeik wet mwohn wehi pokon! Ahpw, Sises saikinte nek. Met iei kaimwiseklahn rahn e pahn mih nan Tehnpas Sarawio, ihme ni eimah e kasalehda arail sapwung kan​—kadeik irerekla duwehte ngilen nansapwe.

14, 15. Kadeik kehlail dah kei Sises kadeingkihda irail sounkawehwehn Kosonnedo oh Parisi kan?

¹⁴ Pahn pak weneu Sises mahsanih met, “Meid suwediong kumwail, sounkawehwehn Kosonnedo oh Parisi kan!” Sises kariala irail pwehki re kin ritingedihsang aramas akan wenihmwen Wehin Koht, sohte kin mweidohng aramas akan en pedolong nan Wehin Koht. Mwalaun pwukat kin senserekseli nansed oh seiloakseli nan sahpw pwe en wekidohng lamalam en aramas emen ong ni arail pelien lamalam en mehn Suhs, ahpw mwuri, dahme re kin wia kin kahrehong irail mehla soutuk. Irail kin pohnsehsehla “padahk kesempwal kan en Kosonnedo, duwehte pwuhng, kalahngan oh mehlel,” ahpw irail kin nsenohki meirongkihong Koht eisek kis ehun arail dipwisoun sampah. Ni mehlel, mwomwen re kin kamwakelehte “likin neirail kep oh dahl akan, a loale inenen diren dipwisoun kul oh samin,” pwe re kin mwomwehda me re kin sarawi oh kin ekihla ahr kin saminla loalarail. Oh pil irail kin wiahiong soukohp ako sousou kaselel, oh kapwatahda sousoun soukohp ako, pwe irail pahn ndandki ahr doadoahk kaselel kan, mendahki irail me “nein irail ko me kemelahr soukohp ako.”​—Madiu 23:13-15, 23-31.

¹⁵ Sises kadeikada irail kan me kin uhwong ih duwen ahr sohte kin kesempwaliki irair kesempwal kan ni pali ngehn: “Meid suwediong kumwail, sounkaweid maskun kan.” Irail kin wiahla aramas maskun kei pwehki re kin kesempwaliki kohl en Tehnpas Sarawio laudsang mehkan ni pali ngehn en arail wasahn kaudok. Sises pousehla tepida ni keieu kehlail kadeikada irail. “Serpent kei kumwail, oh ipwihpwin serpent kei kumwail! Pala kumwail kak pitsang kadeik en nan Gehenna?” Ei, Sises mahsanihong irail me pwehki re kin nantihlahte ahr wiewia sapwung kan, re pahn mehla soutuk. (Madiu 23:16-22, 33, New World Translation) Kitail pil kak eimah en kalohki Rongamwahu en Wehio, edetehn kitail anahne kasansalehda duwen kaudok likamw akan.

16. Ni arail kin wie mwomwohd pohn Nahna Olip, mehnia kokohp kesempwal me Sises ketikihong sapwellime tohnpadahk kan?

¹⁶ Sises eri kohkohla sang ni Tehnpas Sarawio. Mwurin souwaso, ih oh sapwellime wahnpoaron ko douda pohn Nahna Olip. Ni ahnsou me irail ketiket wasao, Sises padahkiong irail duwen kokohpo me pid duwen kamwomwalahn Tehnpas Sarawio oh kilelo me pahn kasalehda ahnsoun e pahn ketiket nan mwoale nanleng oh pil imwin koasoandio. Kesempwalpen mahsen en kokohp wet kin pil dokedoke atail ahnsou. Ni soutik en rahnohte, Sises pil mahsanihiong sapwellime tohnpadahk kan: “Mwurin rahn riau, duwen amwail ese, Sarawien Pahsohpa pahn wiawi, oh re pahn pangala Nein-Aramas pwe ih en pwoula.”​—Madiu 24:1-14; 26:1, 2.

Sises ‘Ketin Loalloale Irail Lel Ni Imwi’

17. (a) Ni Pahsohpa en Nisan 14, dahme Sises padahkiong wahnpoaron 12? (b) Mwurin Sises padahkiong Sudas Iskariot en kohkohlahsang rehrail, kataman dahieu e tepida wiahda?

¹⁷ Ni erein rahn riau​—Nisan 12 oh 13—​Sises sohte kin kasalehda mwohn aramas akan me e mihmi nan Tehnpas Sarawio. Kaunen pelien lamalam kan kin raparapahki Sises pwehn kemehla ih, oh e sohte men mehkot en kerempwa ih en wia Pahsohpa rehn sapwellime wahnpoaron kan. Nisan 14 (Ni Epeng) kin tepida ahnsou me ketipin kin kihrla​—oh rahno iei kaimwiseklahn rahnen mouren Sises nin duwen aramas men nin sampah. Ni soutik, Sises oh sapwellime wahnpoaron kan kohpene nan ihmw ehu nan Serusalem​—wasa me re kaunopada en wia Pahsohpa. Ni ahnsou me re wia arail Pahsohpa, e wia mehn kasukuhl mwahu ong irail 12 me pid duwen irairen aktikitik ni e widen patehneharail kan. Mwurin e padahkiong Sudas Iskariot (me pwungkier en pangkihla eh Soumwas silper 30​—pweinen ladu men nin duwen Kosonned en Moses) en kohkohlahsang irail, Sises tepida padahkiong irail wahnpoaron kan iaduwen re pahn wia Katamanpen Kamatalahn Krais.​—Eksodus 21:32; Madiu 26:14, 15, 26-29; Sohn 13:2-30.

18. Padahk dah kei Sises ni limpoak padahkiong sapwellime wahnpoaron 11 lelepek kan, oh iaduwen e kaunopada irail pwe e pahn kereniongehr mweselsangehr irail?

¹⁸ Mwurin Katamano, irail wahnpoaron ako tepida akamaikihpene duwen ihs me keieu lapalap rehrail. Sises sohte lipoare irail, ahpw ni kanengamah e padahkiong irail duwen kesempwalpen papah meteikan. Pwehki e kin kalahnganki irail me kin iang ih ni e kin lelohng lokolok kan, e pein wiahda inou ehu rehrail en iang ih kaunda nan sapwellime Wehio. (Luk 22:24-30) Sises pil kihong irail kosonned ehu en limpoakpene nanpwungarail duwehte me e kin poakohng irail. (Sohn 13:34) Ni e ketiket nan pereo, Sises ni limpoak kaunopada irail ong ah pahn kereniongehr mweselsang irail. E kamehlelehong irail duwen e kin kompoakepahnkinirailla, kangoange irail en pwosonla, oh inoukihongirailla me ngehn sarawi pahn sewese irail. (Sohn 14:1-17; 15:15) Mwohn e mweselsang ihmwo, Sises wia pekipek ehu rehn Seme: “Semei, ei ahnsou lelehr, komw ketin kalinganahda Sapwellimomwi menet, pwe Sapwellimomwi menet en pil kalinganahda komwi.” Sises kaunopada sapwellime wahnpoaron kan duwen e pahn mweselsang irail, oh ni mehlel e ‘ketin loalloale irail lel ni imwi.’​—Sohn 13:1; 17:1.

19. Dahme kahrehda Sises pwunod laud nan Mwetuwel en Ketsemeni?

¹⁹ Mwein ele e daulih lukepen pwong ni ahnsou me Sises oh sapwellime wahnpoaron 11 lelepek kan lella nan Mwetuwel en Ketsemeni. Ih oh sapwellime wahnpoaron kan kin kalap kohla wasao. (Sohn 18:1, 2) Awa kei mwurinte met, Sises pahn pwoula ni mwomwen aramas loallap men. Kapwunod laud wet iangahki madamadauwo me e sohte men kauwehla mwaren Semeo me inenen laud mehlel ong Sises, ihme ni ahnsou me e wia kapakap, pwudowe lao kerediong nanpwel likamwete dingiding en ntahn aramas. (Luk 22:41-​44) Sises mahsanihong sapwellime wahnpoaron ko: “Awao leledohr! Iet Nein-Aramas pengpenglahr rehn me dipan akan.” Ni e mahsanihong irail, Sudas Iskariot leledohr, oh lapalahn pokon iang ih, re wisik kedlahs oh tehtehn pei. Re kohdo pwehn parokedi Sises. E sohte uhwong de tangasang irail. E kawehwehda met oh mahsanih: “Eri, a ia duwen eh pahn pweida mahsen en Pwuhk Sarawi me mahsanih me ih duwen met me pahn wiawi?”​—Mark 14:41-43; Madiu 26:48-54.

Nein-Aramas Linganla!

20. (a) Wiewia suwed dah kei wiaiong Sises mwurinte e selidi? (b) Mwohnte e pwoula, dahme kahrehda Sises likweri: “E imwiseklahr!”?

²⁰ Mwurinte irail selidi ih, aramas akan eri wia karaun likamw duwen ih, kinehiong Sises likamw akan, sounkopwung lipilipilki aramas akan me kadeikada ih oh Pontius Pailet kadeikada ih en mehla, samworo kan oh pwihn en moromor kan me kapailoke ih, sounpei kan pil kapailoke oh kaloke ih. (Mark 14:53-65; 15:1, 15; Sohn 19:1-3) Ni souwas en Ni Alem, Sises pasuredi nin tuhken kamakamo oh lelohng kamedek laud ni ahnsou me toutouwen paliware teisang mete kan nin peh oh neh kan. (Sohn 19:17, 18) Mpen kuloak siluh mwurin souwas en rahno, Sises ketin kapitie laudida, mahsanih: “E imwiseklahr!” Ei, e kapwaiada soahng koaros me e anahne wia nin sampah. Ni e mweidalahr ngene ong Koht, e ketin pwoula. (Sohn 19:28, 30; Madiu 27:45, 46; Luk 23:46) Ni kasiluh en rahn mwurin met, Siohwa ketin kaiasada Sapwellime Ohl. (Mark 16:1-6) Rahn paiesek mwurin e iasada, Sises kohdahla nanleng oh linganla.​—Sohn 17:5; Wiewia 1:3, 9-12; Pilipai 2:8-11.

21. Iaduwen kitail kak kahlemengih Sises?

²¹ Iaduwen kitail kak ‘idawehn oh kahlemengih Sises’? (1 Piter 2:21) Duwehte ih, kitail en ngoangkihte wia doadoahk en kalohki Rongamwahu en Wehin Koht oh katohnpadahkih aramas akan oh ni eimah kalohki Mahsen en Koht. (Madiu 24:14; 28:19, 20; Wiewia 4:29-31; Pilipai 1:14) Kitail en dehr manokehla ia uwen keren ahnsouwo de kitail en dehr uhdi sang atail kasalehong meteikan limpoak oh tiahk mwahu. (Mark 13:28-33; Ipru 10:24, 25) Kitail en mweidong kupwuren Siohwa Koht en kahre atail wiewia kan koaros oh en wehwehki me kitail kin memour “ni imwin ahnsou.”​—Daniel 12:4, NW.

Iaduwen Ke Pahn Sapeng?

• Pwehki Sises ese me ni ahnsou keren e pahn pwoula, dahme met kin dokedoke sapwellime doadoahk nan Tehnpas Sarawio nan Serusalem?

• Dahme kin kasansalehda me Sises ‘ketin loalloale irail lel ni imwi’?

• Sapwellimen Sises wiewia kan ni kaimwiseklahn awa kei en eh mour kin kasansalehda dah duwen ih?

• Iaduwen kitail kak kalemengih Krais Sises nan atail doadoahk en kalohk?

[Kilel]

Sises “ketin loalloale irail lel ni imwi”