Sises Pwurala Nanleng

KADEKADEO rahn kan dower powe, Sises kasansaleongehr ih sapwellime werek kan pak tohto. Ehu pak tohnpadahk 500 kilang ih. Ni ah kin pwarwong irail, ke ese dahme Sises kin koasoai ong irail? Wehin Koht. Siohwa kadarodo Sises sampah pwen padahki duen Wehio. Oh e kin kaukaule wia met pil lela mwehrin ah kaiasada sang mehla.

Ke tamataman dahme wehin Koht? Ei, Wehio uhdahn kopernment en Koht nanleng, oh Sises me Koht ketin pilada pwen nanmwahrki. Duen me kitail sukuhlikiehr, Sises kasansalehdahr me e pahn wia nanmwahrki kasehlel ni ah kamwenge me duhpek, kakehleda me soumwahu, oh pil kamourada me mehlahr akan!

Ihme ni ansou me Sises pahn kaunda duen nanmwahrki nanleng erein pahr kid, ia pahn duen mwomwen mehkan nan sampah? Ei, sampah pwon pahn wiahla ehu paradais lingan. Sohlahr pahn mie mahwin, mwersuwed, soumwahu, de pil mehla. Kitail ese me met mehlel pwehki Koht ketin wiahda sampah pwen wiahla paradais ehu pwe aramas en paieki. Ihme kahrehda nin tapio e ketin wiahda mwetuwel en Ihden. Oh Sises pahn wia mehkan koaros pwe me Koht ketin kupwure en pweida.

Ansou lelehr Sises en pwurala nan leng. Erein rahn paisek Sises kin sansal ong sapwellime tohnpadahk kan. Irail uhdahn ese me e pil pwurehng mour. Ahpw mwohn ah ketiwei e padahkiong sapwellime tohnpadahk kan: ‘Mihmi nan Serusalem lao kumwail ale ngehn sarawi.’ Ngehn sarawi iei manaman roson en Koht, duwehte kisinieng me mwekmwekid, oh me pahn sewese sapwellime werek kan en wia kupwuren Koht. Ni kaimwisekela, Sises mahsanih: ‘Kumwail en kalohk duen Ngehi lela wasa me keieu doh nan sampah.’

Mwehrin Sises mahsanih met, mehkot kapwuriamwei wiawi. E tapiadahr poupoukdala nanleng, duen me ke kilang wasaht. Eri dapok ehu ahpw pwarado pinala ih sang mwohn mesarail, oh tohnpadahk kan sohlahr kak kilang Sises. Sises ketidala nanleng, oh e tapiada kaun sapwellime werek kan nan sampah sang wasao.