Sises Nan Mwetuwel

MWEHRIN arail pidoi sang pere powe, Sises oh sapwellime wahnpoaron kan kohla nan mwetuwel en Kedsemane. Irail kin kohdo wasaht ansou ngeder mwowe. Sises met padahkiong irail en pepehd mwasamwasahn oh kapakap. Ih eri kohieila ekis dohla, oh poaridi ong nan pwel oh kapakap.

Mwuhri Sises pwurohdo wasa me wahnpoaron ko mi ie. Dahme ke lemeleme e diar irail wiewia? Irail memeir! Pak siluh Sises padahkiong irail en pepehd, ahpw ehu ehu pak e pwurohdo e diar irail memeir. ‘Iaduen kumwail kak meir ni ansou duwehte met?’ Sises mahsanih met ni kaimwisekelahn ah pwurohdo. ‘Auao lelehr me I pahn kohwong nan pehn ai imwintihti kan.’

Ansouohte irail kak rong ngihlen pokon ehu. Kilang! Ohl akan kohkohdo weuwa kedlas oh mehn poak kan! Oh irail pil weuwa mehn ser ni pwongo. Ni arail kerendo, emen sang nanpwungen pwihno keido limwahn Sises. Ih eri metik ih, duen me wiawi nan kilel wet. Ohlo iei Sudas Iskariod! Dahme kahrehda e metik Sises?

Sises idek reh: ‘Sudas, ke pangiehkihla metik ehu?’ Ei, metiko wia kilel ehu. E kasaleong iengen Sudas kan me menet iei Sises, ohl me irail anahne. Imwintihti kan en Sises eri kaakwei mwowe pwen parokedi ih. Ahpw Piter sohte men mweidong irail en ale Sises ni soh pei. Ih eri pwekada nah kedlas me e weuwa oh pele ohl me keieu kereniong ih. Kedlaso kereniong lel mwoangen ohlo ahpw sere oh lepuksang salonge. Ahpw Sises sair salongen ohlo oh kamwahuiahla.

Sises padahkiong Piter: ‘Kapwureiong nan deue kedlasen. Ke lemeleme me I sohte kak peki rehn Semei en kadardihdo tohnleng kid pwen doare ie?’ Ei, e kak! Ahpw Sises sohte peki rehn Koht pwen kadarodo tohnleng kan, pwehki e ese me ansou lelehr me e pahn kohwong rehn ah imwintihti ko. Irail eri kahluwala ih. Kitail pahn kilang dahme wiawiong Sises met.