Sawas Ong Powehdi Masak

KE KIN mengeiki papah Siohwa?— Sounpadahk Lapalapo sohte mahsanih me e pahn mengei en wia met. Pwohng me manda Sises ketin kamakamala, e mahsanihong sapwellime wahnpoaron ko: “Ma sampah kin kailongkin kumwail, kumwail en tamataman me e kailongkin ie mwohn eh kailongkin kumwail.”​—Sohn 15:18.

Piter kin suweiki me e sohte pahn kak kohkohsang Sises, ahpw Sises mahsanih me Piter pahn kahmahmkihla ih pak siluh pwohngo, oh ihme Piter wia! (Madiu 26:31-35, 69-75) Ia duwen met eh kak wiawi?— Met wiawi pwehki Piter masepwehkada oh pil iangahki wahnpoaron teiko.

Ke ese dahme kahrehda wahnpoaron ko masepwehkada?— Pwehki irail sohte wia mehkot me inenen kesempwal. Atail pahn esehla met kak sewese kitail en papah Siohwa sohte lipilipil dahme aramas pahn nda de wiahiong kitail. Ahpw kitail anahne tehk dahme wiawi ni kaimwiseklahn pwohng me Sises ketiket rehn sapwellime wahnpoaron ko.

Keieu, irail ketin wiapene kasarawi en Pahsohpa. Met wia sak kesempwal ehu me kin wiawi pahr koaros pwehn kataman ong sapwellimen Koht aramas akan arail pitsang wia lidu nan Isip. Mwurin mwo, Sises ketin tapiada pil ehu sak me kesempwal. Kita pahn koasoiapene met nan irelaud en mwuhr oh kawehwe ia duwen sak wet eh kak sewese kitail en tamataman Sises. Mwurin sak wet oh pil mwurin e ketin kangoange sapwellime wahnpoaron ko, Sises ketin kahre iraillahng mwetuwel en Ketsemeni. Irail kin kalapw ketila wasao.

Sises ketsang rehrail ahnsoukis nan mwetuwelo pwehn kapakap. E pil mahsanihong Piter, Seims oh Sohn en kapakap, ahpw irail meirla. Pak siluh Sises ketin kelehpwla pwehn kapakap oh pak siluh e ketin pwurodo ih diar me Piter oh meteikan memeir! (Madiu 26:36-47) Ke ese dahme kahrehda irail anahne pepehd oh kapakap?— Kita pahn koasoia duwen met.

Mwowe ekis ni soutiko, Sudas Iskariot iang Sises oh wahnpoaron teikan wia Pahsohpa. Tamanda me Sudas wiahla lipirap men. Ahpw met e pangala Sises. E ese wasa me Sises oh sapwellime wahnpoaron ko kin kalapw tuhpene ie nan mwetuwel en Kedsemeni. Kahrehda Sudas wahdo sounpei ko pwehn salihedi Sises. Ni arail lel mwo, Sises ketin idek rehrail: “Ihs me kumwail raparapahki?”

Sounpei ko nda: “Sises.” Sises sohte ketin masak oh e mahsanih: ‘Ngehi iei ih.’ Sounpei ko uhdahn pwuriamweikihla Sises eh ketin eimah kahrehda irail pweieklahsang oh pwupwudiong nan pwehl. Sises eri mahsanih: ‘Ma kumwail raparapahkin ie, kumwail mweidohng nei wahnpoaron ka en kohkohla.’​—Sohn 18:1-9.

Ni en sounpei ko arail koledi Sises oh salihedi peh ko, wahnpoaron ko masepwehkada oh tang. Ahpw Piter oh Sohn men ese dahme pahn wiawi kahrehda ira idawehn irail ahpw ekis dohlahsang. Irail wahla Sises ni tehnpesen samworo lapalap Kaiapas. Samworo lapalapo ese Sohn kahrehda silepen wenihmwo mweidohng ih oh Piter en pedolong nan kelen tehnpaso.

Samworo ko pokonpene ni tehnpesen Kaiapas pwehn wia karongorong. Irail men Sises en kamakamala. Kahrehda irail wahdo sounkadehde kan me wia kadehde likamw ong Sises. Irail pakere oh pohr mesen Sises. Piter mihmi wasao ni ahnsou me soahng pwukat wiawi.

Emen lidu serepein me wia silepen wenihmwo me mweidohng Piter oh Sohn en pedolong, kasawihada Piter oh nda: “Kowe, ke pil iang Sises.” Ahpw Piter kahmahmki me e ese Sises. Mwuri ekis, pil emen serepein kasawihada Piter oh ndaiong irail me kesikesihnen mwo: “Lahp menen pil iengen Sises.” Piter pil pwurehng kahmahmki me e ese ih. Mwurin ahnsoukis, pwihn ehu kilangada Piter oh nda: “Uhdahn kowe emen irail.” Met kesiluh en Piter eh kahmahm oh nda: “I sehse ohlo.” Piter pil kaukihla me e mehmehlel, oh Sises ketin sohpeidohng ih.​—Madiu 26:57-75; Luk 22:54-62; Sohn 18:15-27.

Ke ese dahme kahrehda Piter likamw?— Pwehki e masepwehk. Ahpw dahme kahrehda e masepwehkada? Dahme e sohte wia pwehn kak lamalam kehlail? Medewe duwen met. Dahme Sises ketin wia me kihong ih lamalam kehlail?— E ketin kapakapohng Koht, oh Koht ketin sewese ih pwehn kak sapwellimaniki lamalam kehlail. Oh tamataman me pak siluh Sises mahsanihong Piter en kapakap, pepehd oh mwasamwasahn. Ahpw dahme wiawi?—

Ehuehu ahnsou pwukat, Piter meirla. E sohte kapakap oh e sohte mwasamwasahn. Kahrehda e sohte onopada ni ahnsou me Sises ketin poarpoardi. Ahnsou me irail keme Sises oh koasokoasone irail en kemehla ih, Piter ahpw masepwehkada. Ahpw dahme Sises mahsanihong sapwellime wahnpoaron ko en kasik awa kei mwowe?— Sises mahsanihong irail me sampah pahn kailongkin irail duwehte eh kailongkin ih.

Kita kak medewe me mehkot kak wiawihong kitail me duwehte dahme wiawihong Piter. Ia duwen ma ke mihmi nan peren sukuhl ni ahnsou me meteikan kin kauwe aramas me sohte kin kawauwih pilaik oh sohte kin iang Krismas. Eri, ia duwen ma emen idek rehmw: “Mehlel me ke sohte kin kawauwih pilaik?” De mwein ekei pahn nda: “Se rong me ke pil sohte kin iang Krismas!” Ke pahn masepwehkada oh sohte lokaia mehlel?— Ke pahn pil likamw duwehte Piter?—

Mwuri, Piter inenen nsensuwedkihla eh kahmahmkihla me e ese Sises. Ni eh kilangadahr dahme e wiahdahr, e kohieila liki oh sengiseng. Ei, e koluhla oh pwurehng idawehn Sises. (Luk 22:32) Medewe mahs met. Dahme pahn kak sewese kitail en dehr masepwehkada oh nda mehkot me duwehte me Piter wia?— Tamataman, Piter sohte kapakap, pepehd oh mwasamwasahn. Eri, dahme ke lemeleme kitail anahne wia pwehn idawehn Sounpadahk Lapalapo?—

Kitail anahne kapakapohng Siohwa pwehn ale sawas. Ke ese dahme Koht ketin wiahiong Sises ni ahnsou me e kapakapo?— E ketin kadarala tohnleng men pwehn kakehlahda Sises. (Luk 22:43) Sapwellimen Koht tohnleng kan kak sewese kitail?— Paipel mahsanih: ‘Sapwellimen Siohwa tohnleng kin sinsile irail kan me kin wauneki ih, oh kin kapitirailsang soahng keper kan.’ (Melkahka 34:7) Ahpw kitail anahne wia mehkot laudsang kapakap pwehn ale sawas sang rehn Koht. Ke ese dahme kitail pil anahne wia?— Sises ketin padahkihong sapwellime tohnpadahk kan en pepehd oh mwasamwasahn. Ia duwen atail pahn kak wia met?—

Kitail anahne rong kanahieng nan mihting en Kristian akan oh tehk dahme kitail kin wadek sang nan Paipel. Ahpw kitail pil anahne kaukaule kapakapohng Siohwa oh peki sawas pwe kitail en kak papah ih. Ma kitail pahn wia mepwukat, kitail pahn kak ale sawas pwehn powehdi atail masak. Eri kitail pahn peren ma kitail pahn kak padahkihong meteikan duwen Sounpadahk Lapalapo oh Semeo.