Piter Tuhong Kornilius

IEI wahnpoaron Piter me kesihnenda mwo, oh irail kan me mi limwah iei kompoakpah kan. Ahpw dahme kahrehda ohlo poaridi mwohn Piter? E konehng ih en wia met? Ke ese ihs ih?

Ohlo adaneki Kornilius. Ih emen sounpei lapalap en Rom. Kornilius sohte ese Piter, ahpw e aleiehr kehkehlik en luhkehdo ih nan ihmwe. Kitail pahn kilang dahme wiawi.

Keieun werek en Sises kan mehn Suhs tohr, ahpw Kornilius kaidehn emen mehn Suhs. Ahpw e kin poakong Koht, oh kapakap ong ih, oh e kin wia soahngen tiahk en kadek tohto ong aramas kan. Eri, ehu mwehrin souwas tohnleng emen pwaradohng ih oh mahsanih: ‘Koht perenkihda me ke wia, oh e pahn sapeng ahmw kapakap kan. Kadarala ekei ohl pwen luhkehdo emen ohl me adaneki Piter. E kin mihmi Soppa nan ihmwen Saimon, me kousoan limwahn sehd.’

Eri, ansouohte Kornilius kadarala ohl kei pwen rapahkihda Piter. Mahnda en rahno, ni ansou me ohl oko kerenlahng Soppa, Piter mi pohn kadoken ihmwen Saimon. Wasao Koht wiaiong Piter en kilangada lapalahn koruk en likou ehu kohkohdihdo sang nanleng. Nan koruko soahngen mahn koaros mie. Nin duen kosonned en Koht, mahn pwukat sohte me kin kang pwehki samin, ahpw ngihlo mahsanih: ‘Pwourda, Piter. Kamehla oh mwenge.’

‘Soh!’ Piter sapeng. ‘I saikinte kang mehkot me samin.’ Ahpw ngihlo padahkiong Piter: ‘Dehr kahdaneki mehkot samin me Koht mahsanih me min.’ Pak siluh met wiawi. Eri ni en Piter kin wapwonki ia wehwehn mehpwukat, ohl ko me Kornilius kadarado lelehr ni ihmwo oh idek ia Piter.

Piter eri doudi sang pohn ihmwo oh inda: ‘Ngehi ohlo me kumwail raparapahki. Dahme kahrehda kumwail kohdo?’ Ni ansou me ohl oko kawehwehda me tohnleng men padahkiong Kornilius en luhkehdo Piter ong ihmwe, Piter pwungki iang irail kohla. Mahnda en rahno Piter oh kompoakpah kan mwesel kohieilahng ihmwen Kornilius nan Siseria.

Kornilius kapokonpeneiehr ah peneinei iangahki kompoakpe kan. Ni ansou me Piter leldo, Kornilius kasamwo ih. E poaridi mwohn Piter, duen me ke kilang wasaht. Piter ahpw inda: ‘Uhda; Ngehi aramas men.’ Ei, Paipel kasansalehda me sohte pwung en poaridi oh kaudokiong aramas. Kitail en kaudokiong Siohwa kelehpw.

Piter tapiada kapahrek ong irail kan me pokonpene. ‘I ese me Koht pwungki aramas koaros me men papahong ih,’ Piter inda. Oh ni ah wia padapadahk, Koht ketin kadarodo sapwellime ngehn sarawi, oh aramas kan tapiada koasoai ni lokaia tohrohr. Met kapwuriamwei ong tohnpadahk en Suhs kan me iang Piter kohdo, pwehki re lemeleme me kapai en Koht ongete mehn Suhs. Met padahkiong irail me Koht sohte kin kesempwaliki ehu kainok sang ehu de keniken rehn Koht sang ehu. Kaidehn met ire mwahu ehu me kitail koaros en tamataman?