Pwutak Emen Meirla Pwupwedi

OKOI! Dahme wiawi wasaht? Pwutak me mi nan pwelo uhdahn

ohla laud? Kilang! Ohl me kohkohdo sang ihmwo iei Paul! Ke kak kilang Timoti? Pwutako pwupwedi sang nan wanihmw tok en powe?

Ei, ihme wiawiehr. Paul kin wia kapkapahrek ong tohnpadahk kan nan Troas. E ese me e sohlahr pahn pwurehng kilang irail ansou reirei pwe e pahn mweselwei pohn apwoat sohp rahn en mwuhri. Ih eri padapadahk lela luhkepen pwong.

Pwutako adaneki Iutikus me mwomwohd nan wanihmw tok, oh meirla. Ih eri pwupwedihla, pali liki sang wanihmw tok me ileilehki posoke siluh! Ihme ke kak kilang dahme kahrehda aramas kan mwomwen pahtouki. Ni en ohlo pwekada pwutako, e duwehte me re lemeleme. E mehlahr!

Ni ansou me Paul kilang me pwutako mehlahr, e wendi pohn ih oh poaloapene. Ih eri inda: ‘Dehr insensuwed. Soahng koaros mwahu!’ Oh mehlel! Pwutako mwahula. Met manaman ehu! Paul kapwurehdo mour en pwutako! Aramas akan koaros ahpw perenda kowahlap.

Irail koaros pwurodahla nan pere powe oh wia kisin sak. Paul kaukaule kapkapahrek lao ni menseng. Ahpw met ke pahn pwungki me Iutikus sohte pwurehng meirla! Eri, Paul, Timoti oh kisehra kan me ieiang ira douda pohn apwoat sohp. Ke ese iawasa re seilok ie?

Met kaimwisekelahn seilok en kalohk kasiluh en Paul, oh e pahn pwurelahng ah wasa. Ni seilok wet Paul kousoan sounpahr siluh nan kahnihmwen Episos. Ihme kahrehda seilok wet reirei sang ah seilok kariau.

Mwehrin ah mwesel sang Troas, sohpo sop Miletus ansoukis. Pwehki Episos ihte mwail kei doh wei, Paul eri ilekilahng ohl mah kan en nan mwomwohdiso ren kohdo Miletus pwe ih en kak padahk kamwurmwur ong irail. Mwuhri ekis, ansou me sohpo pahn mweselehr, irail koaros uhdahn pahtoukihla ahn Paul kohieisang rehrail!

Kadekadeo sohpo peidi Siseria. Eri ni ansou me Paul kin koukousoan nan ihmwen tohnpadahk Pilip, soukohp Akapus kaesehki Paul. E koasoaia me Paul pahn selidi ni ah pahn lela Serusalem. Oh met mehlel, ihme wiawiehr. Mwehrin ah mihmi nan imweteng sounpahr riau nan Siseria, irail eri kadarala Paul Rom pwen kopwung wasao mwohn kaun en Rom Sihser. Kitail pahn kilang dahme wiawi ni arail seiloklahng Rom.