Timoti—Sewespen Paul Kapw

MWANAKAPW pwulopwul me ke kilang wasaht rehn wahnpoaron Paul iei Timoti. Timoti kin kousoan rehn ah peneinei nan Listra. Ah nohno adaneki Iunis oh ah nohno kahlap Lois.

Met kasilipak en ansou me Paul pwarek Listra. Sounpahr ehu de laud sang mwowe, Paul oh Parnapas keieu kohdo wasaht nan ehu ara seilok en kalohk. Oh ansouwet Paul pwurohdo iangahki kompoakpe Sailas.

Ke ese dahme Paul indindaiong Timoti? ‘Ke mwahuki iang Sailas oh Ngehi?’ e ideidek. ‘Ke kak sewese kiht ni aht pahn kalohk rehn aramas akan nan wasa doh kan.’

‘Ei,’ Timoti sapeng, ‘I mwahuki iang.’ Eri ansou mwotomwot mwuhri Timoti pwilikihdi ah peneinei oh iang Paul oh Sailas mweselwei. Ahpw mwohn kitail pahn sukuhliki duen arail seilok, kitail kilang dahme wiawiong Paul. Ele sounpahr 17 dower powe sang ni ansou me Sises pwarwong ih pohn ahl me kohlahng Damaskus.

Tamataman, Paul kohdohng Damaskus pwen kaloke tohnpadahk kan en Sises, ahpw ansouwet pein ih wiahlahr emen tohnpadahk! Mwuhri ekei imwintihti kan pilahniehda pwe ren kamehla Paul pwehki re sohte mwahuki ah padapadahki duen Sises. Ahpw tohnpadahk teikan sewese Paul pitila. Irail kihong ih nan lapalahn kopwou ehu oh kadaridi ih likin kehl en kahnihmwo.

Mwuhri Paul kohla kahnihmwen Andiok pwen kalohk. Iei wasaht me werek kan en Sises tapin adanekihla Kristian. Paul oh Parnapas eri pekederesangehr Andiok oh tapiada ara pidek en kalohk ong wehi kan me doh. Ehu kahnihmw me re pwarek iei Listra, wasa me Timoti kin kousoan ie.

Met, sounpahr ehu mwuhri, Paul pwurohdo Listra ni kariaun ah seilok. Ni ansou me Timoti iangala Paul oh Sailas mweselwei, ke ese iawasa irail kohla ie? Kilang nan map wet, oh kitail pahn sukuhliki ekei wasa kan.

Keieu, irail kohlahng kahnihmw keren ehu, Aikonium, oh doulul kohlahng kariaun kahnihmw me adaneki Andiok. Mwehrin mwo re kohdahla Troas, oh doulula Pilipai, Dessalonaika oh Peroea. Ke kak kilang Adens nan map wet? Paul pil kalohk wasao. Mwuhri ekis re mi sounpahr ehu elep kalkalohk nan Korint. Kadekadeo irail sop ansou mwotomwot nan Episos. Irail eri pwurala iangala apwoat sohp ong Siseria, oh sang wasao sapalla Andiok, wasa me Paul mihmi.

Ihme Timoti iang seilok oh sapal mwail epwuiki kei pwen sewese Paul kalohki “rohngamwahu” oh tapiada mwomwohdiso en Kristian tohto. Ni ahmw pahn laudla, ke mwahuki wiahla emen ladu lelepak en Koht duwehte Timoti?