Timoty Men Sewese Aramas kan

Timoty iei pwutak men me kin perenki sewese aramas kan. E kohla wasa tohto pwehn sewese meteikan. Pwehki met, e ahneki soangen mour me uhdahn kaperen. Ke men rong duwen met?—

Timoty tikida nan kahnimw ehu me adaneki Listra. Ni ahnsou me e tikitik, eh nohno kahlap Lois oh eh nohno Iunis tepida padahkihong ih duwen Siohwa. Ni Timoty eh kekeirda, e men sewese meteikan ren sukuhlki duwen Siohwa.

Ni ahnsou me Timoty pwulopwulte, Pohl idek reh ma e men iang ih kohla kalohk nan wasa teikan. Timoty nda: ‘Ei!’ Timoty onopadahr en kohla sewese meteikan.

Timoty iang Pohl kohla ni kahnimw ehu nan Masedonia me adaneki Deselonika. Pwehn lel wasao, ira anahne alu reirei oh iangada sohp. Ni ara lella wasao, ira sewese aramas tohto ren sukuhlki duwen Siohwa. Ahpw ekei lingeringerda oh song kaloke ira. Eri, Pohl oh Timoty anahne kohkohlahsang wasao oh uhd kalohk nan wasa teikan.

Sounpwong kei mwuri, Pohl peki rehn Timoty en pwuralahng Deselonika oh tehk ia iren riara Kristian kan wasao. E uhdahn anahne eimah pwehn pwuralahng kahnimw kepero! Ahpw Timoty pwurala pwehki e pwunodki ia iren rie Kristian ko wasao. E pwurodo wahdohng Pohl rohng kaperen. Riara Kristian ko nan Deselonika kin uhdahn nannanti!

Timoty iang Pohl doadoahk sounpar tohto. Mie pak Pohl ntingihdi me Timoty me keieu mwahu en kadarala pwehn sewese mwomwohdiso kan. Timoty kin poakohng Siohwa oh poakohng aramas akan.

Ke kin poakohng aramas oh men sewese irail ren sukuhlki duwen Siohwa?— Ma iei, ke kak ahneki soangen mour me uhdahn kaperen, duwehte ahn Timoty mour!