Kasalehda Omw Kin Kekeirda

“Pwerisekiong oh poadidiong wiewia soahng pwukat, pwe aramas koaros en kak kilang omw kekeirda.”—1 TIM. 4:15.

1, 2. Dahme kitail ese duwen mouren Timoty ni eh pwulopwul oh pil wekidekla kan ahnsou me e karanih sounpar 20 samwa?

NI AHNSOU me Timoty wia kisin pwutak, e kin kousoan Kalesia me mi pahn kaundahn Rom mahs, me met mi nan Turkey. Ekei mwomwohdiso kan en Kristian wiawihda wasaht sounpar eisek samwa mwurin Sises eh pwoula. Ni ahnsowo, Timoty, eh nohno oh eh nohno kahlap wiahla Kristian kei oh tepidahr iang doadoahk en Kristian nan mwomwohdiso. (2 Tim. 1:5; 3:14, 15) Timoty kin perenki eh mour nin duwen Kristian pwulopwul men. Ahpw soahng kan tepida wekidekla.

² E tepida ni keriaun ahn wahnpoaron Pohl eh mwemweitla wasao. Ni ahnsowo, Timoty ele kereniong sounpar 20 samwa. Erein en Pohl mwemweit, ele nan Listra, e kin kilang me Timoty kin “keniken rehn me pwoson akan koaros” nan mwomwohdisohn wasao. (Wiewia 16:2) Timoty kin kasalehda koahiek laud. Eri, pahn kaweid en sapwellimen Koht manaman, Pohl oh elder kan nan wasao pwil pehrail pohn Timoty oh kihong ih doadoahk tohrohr nan mwomwohdiso.—1 Tim. 4:14; 2 Tim. 1:6.

3. Soangen pwukoa tohrohr dah me Timoty alehdi?

³ Timoty ale luhk tohrohr ehu pwehn kin iang wahnpoaron Pohl seiloak. (Wiewia 16:3) Medewehla ia uwen en Timoty eh peren! Nan pahr en mwuri kan, Timoty pahn iang Pohl oh ekei pak iang meteikan seiloak pwehn wiliandi wahnpoaron ko oh wia soangen pwukoa kan me re kihong ih. Pohl oh Timoty wia doadoahk en seiloak me kin sewese laud Kristian ko en kakehlaka arail pwoson. (Wadek Wiewia 16:4, 5.) Eri, Kristian tohto esehla Timoty pwehki eh kekeirda nan eh papah Koht. Mwurin e iang Timoty doadoahk erein sounpar eisek samwa, wahnpoaron Pohl ntinglahng mehn Pilipai ko duwen Timoty: “Ihete me duwehte ngehi me kin nsenohkin kumwail. . . . Eri, pein kumwail ese ia uwen katepen eh wiewia kan, oh duwen kiht, ih oh ngehi, pwe se kin doadoahkpene pwehki rongamwahu, rasehng pahpa men oh nah pwutak.”—Pil. 2:20-22.

4. (a) Pwukoa laud dahieu me Timoty alehdi? (b) Dahme kitail kak idek duwen en Pohl koasoi nan 1 Timoty 4:15?

⁴ Ni ahnsou me Pohl ntinglahng mehn Pilipai ko, e kihong Timoty pwukoa laud ehu, iei en idihada elder kan oh sounsawas kan. (1 Tim. 3:1; 5:22) E sansal me Timoty wialahr Kristian sounapwalih men me likilik. Ahpw nan kisinlikouohte, Pohl pil panawih Timoty en kasalehda eh kin kekeirda pwehn sansal mwohn koaros. (1 Tim. 4:15) Ia duwen, e sou sansalehr duwen en Timoty eh kin uhdahn kekeirda? Eri, ia wehwehn en Pohl koasoi, oh ia duwen atail kak paiekihda eh kaweid?

Ia Duwen Atail Kin Kasalehda Atail Kekeirda nin Duwen Kristian

5, 6. Ia duwen mwakelekel en mwomwohdiso en Episos eh mihla nan keper? Ia duwen Timoty eh kak pere mwomwohdiso wet?

⁵ Kitail tehk audepen 1 Timoty 4:15. (Wadek 1 Timoty 4:11-16.) Mwohn e ntingihdi mahsen pwukat, Pohl seiloakla Masedonia ahpw e peki rehn Timoty en mihmi Episos. Dahme kahrehda? Ekei nan kahnimwo tepidahr kahrehiong saminimin nan mwomwohdiso pwehki padahk likamw kan me re kin wiahda. Timoty anahne pere mwakelekel en nan mwomwohdiso. Ia duwen eh pahn wia met? Ehu, sang ni eh pahn wiahda mehn kahlemeng mwahu pwe meteikan en alasang.   

⁶ Pohl ntinglahng Timoty: “Wia mehn kahlemengih ehu ong irail kan me pwoson, ni omw koasoi, ni omw tiahk, ni omw limpoak, ni omw pwoson oh mwakelekel.” E pil nda: “Pwerisekiong oh poadidiong wiewia soahng pwukat, pwe aramas koaros en kak kilang omw kekeirda.” (1 Tim. 4:12, 15) Kekeirda wet kin kohsang en Timoty eh kin kasalehda nan eh mour me e ahneki nanpwungmwahu rehn Koht, ahpw kaidehn pwukoa laud me e ahneki. Ih soangen kekeirda wet me Kristian koaros anahne kasalehda.

7. Dahme tohnmwomwohdiso koaros anahne wia?

⁷ Duwehte rahnwet, mie soangsoangen pwukoa kan nan mwomwohdiso. Ekei kin papah nin duwen elder kan de sounsawas kan. Meteikan kin iang doadoahk en kalohk nin duwen pioneer kan. A pil ekei kin perenki wia pwukoa en sounapwalih me kin seiloak, wia doadoahk en Bethel, de doadoahk en misineri. Elder kan kin iang wia padahk kan nan mihting tohrohr de kapokon kan. Ahpw, Kristian koaros—ohl, lih, oh me pwulopwul kan—ahneki koahiek en kasalehda arail kekeirda ni arail kin papah Koht. (Mad. 5:16) Ni mehlel, duwehte Timoty, Kristian kan me ahneki pwukoa tohrohr anahne kasalehda ong koaros arail nanpwungmwahu rehn Koht.

Wia Mehn Kahlemeng ni Koasoi

8. Ia duwen atail koasoi eh kin pidada atail kaudok?

⁸ Ehu me Timoty anahne wia mehn kahlemeng iei sang ni eh koasoi. Ia duwen atail kak kasalehda atail kekeirda nan atail koasoi? Atail koasoi kan kin kasalehda soangen aramas dah kitail. Sises mahsanih: “Pwe ewen aramas kin kapwadewei audepen nan kapehde.” (Mad. 12:34) Seims rien Sises pil pohnese dahme atail koasoi kak wiahiong atail kaudok. E ntingihdi: “Mie mehmen me kin lemeleme me e poadidi ong pelien atail lamalam? Ma e sohte kin powehdi lowe, eri eh poadidi sohte katepe oh e kin pitih pein ih.”—Seims 1:26.

9. Ia duwen atail koasoi kin wia mehn kahlemeng?

⁹ Atail koasoi kak kasalehong meteikan nan mwomwohdiso ia uwen atail kin kekeirda nan atail papah Koht. Eri, Kristian koahiek kan sohte kin koasoi ni soh wahu, kansensuwed, kauwe oh kamedek ahpw re kin nantihong kakehlaka, kamweit, kansenamwahwih oh kangoange meteikan. (Lep. Pad. 12:18; Ep. 4:29; 1 Tim. 6:3-5, 20) Atail kin onopada en koasoi pwehn utungada sapwellimen Koht koasoandi ileile kan oh duwen atail kin men mour pahrekiong koasoandi pwukat kin kasalehda atail poadidiong Koht. (Rom 1:15, 16) Irail me mohngiong pwung kan uhdahn pahn kilang duwen atail koahiek en koasoi oh ele alasang atail mehn kahlemeng.—Pil. 4:8, 9.

Kahlemeng Mwahu ni Atail Wiewia oh Tiahk Mwakelekel

10. Dahme kahrehda pwoson mehlel kesempwal ong kekeirdahn atail papah Koht?

¹⁰ Kahlemeng mwahu en Kristian men kin laud sang ihte lokaiahn kangoang. En nda dahme pwung ahpw sohte kapwaiada pahn kahrehiong emen en wiahla aramas mwalaun men. Pohl kin wehwehki mehlel mwalaun en Parisi ko oh imwila suwed me re kin kahrehda. Pak tohto e padahkihong Timoty en kin mehlel ni eh wiewia kan. (1 Tim. 1:5; 4:1, 2) Timoty kaidehn aramas mwalaun men. Nan nah keriaun kisinlikou ong Timoty, Pohl ntingihdi: “I tamataman pwoson mehlel me ke ahneki.” (2 Tim. 1:5) Mendahki met, Timoty anahne kasalehiong meteikan eh mour mehlel nin duwen Kristian men. Eh wiewia kan anahne wia mehn kahlemeng mwahu.

11. Dahme Pohl ntingkihlahng Timoty duwen kepwehpwehla?

¹¹ Nan nah kisinlikou riauo ong Timoty, Pohl kihda kaweid kan me pid wiewia. Karasepe, Timoty anahne liksang rapahki en kepwehpwehla. Pohl ntingihdi: “Pwe limpoak ong mwohni, iei tepin soangen suwed koaros. Mie ekei me kin inenen kasikasik en naineki mwohni, eri, re ahpw salongalahsang pwoson oh kauwehkihla mohngiongirail soangen kapahtou tohtohie.” (1 Tim. 6:10) Inengieng kepwehpwehla wia kilelepen atail nanpwungmwahu rehn Siohwa eh kin luwetala. Weksang met, Kristian kan me kin itarki “kisin tungoal akan oh likou” kin kasalehda kekeirda nan arail papah Koht.—1 Tim. 6:6-8; Pil. 4:11, 12; Mel. 121:1, 2.

12. Ia duwen atail kekeirda kak sansalda nan atail mour?

¹² Pohl padahkihong Timoty uwen kesempwal lih Kristian kan arail pahn “tiahk mwahu oh kanahieng arail likou kan, re en likoumwahuda.” (1 Tim. 2:9) Lih akan me kin tiahk mwahu oh kanaiehng mwomwen arail kapwat oh likou, iangahki soahng teikan nan arail mour kin wiahda mehn kahlemeng mwahu. (1 Tim. 3:11) Kaweid wet pil kin kohwohng ohl akan. Pohl kaweidki sounapwalih men en kin “ese dahme e wiewia; kak kaunda nsene, oh ese koasoandi.” (1 Tim. 3:2) Ni atail kin kasalehda soangen irair pwukat nan atail mour en ehuehu rahn, atail kekeirda pahn sansal ong koaros.

13. Duwehte Timoty, ia duwen atail kak wia mehn kahlemeng duwen tiahk mwakelekel?

¹³ Timoty pil anahne wiahda mehn kahlemeng mwahu duwen tiahk mwakelekel. Keieu, eh wiewia kan ong lih kan anahne mwakelekel. E anahne wiahki ‘lih laud kan eh nohno, oh peinakapw akan rie serepein, ni tiahk pwung koaros.’ (1 Tim. 4:12; 5:2) Pil tiahk samin kan me ele sohte sansal met, kin sansal ong Koht oh uhdahn pahn sansalda ong aramas akan. Ahpw e pil mehlel me doadoahk mwahu en Kristian men pahn sansalda mwahu. (1 Tim. 5:24, 25) Koaros nan mwomwohdiso ahneki ahnsou mwahu en kasalehda arail kekeirda nan wiewia oh tiahk mwakelekel.

Limpoak oh Pwoson Kesempwal

14. Ia duwen iren Paipel kan eh kasalehda me kitail anahne limpoakpene?

¹⁴ Ehu irair me uhdahn kesempwal ong Kristian kan iei limpoak. Sises mahsanihong sapwellime tohnpadahk ko: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:35) Ia duwen atail kak kasalehda soangen limpoak wet? Mahsen en Koht kangoange kitail en kin nantihong ‘limpoakpene’ oh “kadekpene oh loallamwahupene, oh mahkpene” oh kin kasamwo emenemen. (Ep. 4:2, 32; Ipru 13:1, 2) Wahnpoaron Pohl ntingihdi: ‘Kumwail limpoakpene nin duwen limpoak en Kristian.’—Rom 12:10.

15. Dahme kahrehda limpoak kin kesempwal ong Kristian koaros, ahpw ni mehlel irail sounapwalih kan?

¹⁵ Ma Timoty sohte kin kadek ong ienge Kristian akan, eh doadoahk mwahu nin duwen tohnpadahk oh sounapwalih pahn sohte katepe. (Wadek 1 Korint 13:1-3.) Ahpw ni Timoty eh kin nsenohki mehlel rie Kristian akan oh pil kasamwo oh sewese irail kin kasalehda eh kekeirda nan eh doadoahk en papah Koht. Eri e konehng me nan nah kisinlikou ong Timoty, wahnpoaron Pohl kin kasalehda ni oaritik me Timoty anahne wiahda mehn kahlemeng mwahu duwen limpoak.

16. Dahme kahrehda Timoty anahne kasalehda pwoson kehlail?

¹⁶ En Timoty pwoson lelohng kasongosong ni eh koukousoan Episos. Mie ekei wasao me kin wiahda padahk kan me sohte pahrekiong padahk mehlel en Kristian. Ekei kin lohkiseli duwen “poadopoad akan” de rapahkihda madamadau kan me sohte kin sewese kaudok en mwomwohdiso. (Wadek 1 Timoty 1:3, 4.) Pohl kin kawehwe me irail pwukat ‘me aklapalap oh sohte ese mehkot. Re ahneki ineng suwed en akupwung oh akamaiki duwen lepin lokaia kan.’ (1 Tim. 6:3, 4) Ia duwe, Timoty pahn kak mweidohng soangen madamadau keper pwukat en pidelong nan mwomwohdiso? Soh, pwe Pohl kangoange Timoty en ‘tangowei uwen eh kak nan weirentang en pwoson’ oh kaleke wia “koasoi kan me kin uhwong Koht, oh akamai mwahl akan me ekei aramas kin kahdaneki ‘Loalokong.’” (1 Tim. 6:12, 20, 21) Kitail kak kamehlele me Timoty idawehn en Pohl kaweid.—1 Kor. 10:12.

17. Ia duwen atail pwoson ele kak lelohng kasongosong rahn pwukat?

¹⁷ Timoty kin rong me “ekei aramas pahn kesehla arail pwoson ni imwin ahnsou kan; irail pahn peikiong ngehn likamw akan oh idawehn padahk en ngehn suwed kan.” (1 Tim. 4:1) Koaros nan mwomwohdiso iangahki irail akan me ahneki pwais kan anahne duwehte Timoty me kin kasalehda pwoson kehlail. Ni atail kin koasoanehdi teng en pelianda padahk en irail kan me kin uhwong padahk mehlel, kitail kak kasalehda atail kekeirda oh wia mehn kahlemeng mwahu duwen pwoson.

Nantihong Kasalehda Omw Kekeirda

18, 19. (a) Ia duwen omw kak kasalehong koaros omw kekeirda? (b) Dahme kitail pahn koasoiapene nan iren onop en mwuhr?

¹⁸ E sansal me en Kristian mehlel men eh kekeirda sohte kin pidada mwomwe, eh koahiek kan, de eh ndand. E pil sohte sansalda sang uwen werei en emen eh kin papah nan mwomwohdiso. Ahpw, en kekeirda ni atail papah Siohwa kin sansal sang atail kin peikiong ih ni madamadau, koasoi oh wiewia. (Rom 16:19) Kitail anahne kapwaiada koasoandi en limpoak ong emenemen oh kakairada pwoson kehlail. Kitail anahne medemedewe duwen en Pohl kaweid kan ong Timoty oh kin kapwaiada pwe atail kekeirda en kak sansalda ong koaros.

¹⁹ Ehu irair me pahn kasalehda atail kekeirda oh koahiekla nin duwen Kristian akan iei peren, me wia kisehn wahn sapwellimen Koht manaman. (Kal. 5:22, 23) Iren onop en mwuhr pahn koasoia ia duwen atail pahn kakairada oh kolokol peren ni ahnsoun apwal akan.

Ia Duwen Omw Pahn Sapeng?

• Dahme meteikan kak sukuhlki sang atail koasoi?

• Ia duwen atail kekeirda kin sansalda sang atail wiewia oh tiahk mwakelekel?

• Dahme kahrehda Kristian akan kin wia mehn kahlemeng duwen limpoak oh pwoson?

[Kawehwehpen kilel kan nan ehu ehu pali 13]

Timoty kasalehda kekeirda ni eh pwulopwul

[Kawehwehpen kilel kan nan ehu ehu pal

15]

Omw kekeirda kin sansalda ong koaros?