Kasalehda Ahmw Kekeirada Ni Pali Ngehn
“Pwerisekiong oh poadidiong wiewia soahng pwukat, pwe aramas koaros en kak kilang omw kekeirada.”—1 TIMOTY 4:15.
1. Iaduwen ke pahn ese ma wahn tuhke ieu matehr oh kakehr mwenge?
SONG medewehla wahntuhke me ke keieu iouki—kehngid, orens, sei, de pil soangen wahntuhke tohrohr. Ke ese iahd e kin mahla oh mat oh mwahu en mwenge? Uhdahn! Pwowe, pohn kili oh ma e mwuterek—mehpwukat koaros pahn kasalehong uhk ma e iouehr oh pilen ewemw pahn kerkihpene. Ni ahmw pahn kihong nan ewemwen, ke mwein pahn wiahda ngilen ioukihda. Ia uwen mem! Met kin kihong uhk peren oh nsenamwahu laud.
2. Iaduwen mahla ah kin sansal, oh dahme e kin wiahiong ehupene nanpwungen aramas?
2 Irair kaperen wet kin pahrekiong irair teikan en mour. Karasepe, duwehte matalahn wahntuhke ieu kin sansalada ni soangen ahl tohto—aramas emen me mah ni pali ngehn kin pil sansalada ni soangen ahl tohto. Kitail kak ese ma aramas emen mah sang ni ah elen madamadau, wehwehki soahng kan, ah erpit oh soahng teikan. (Sohp 32:7-9) E inenen wia mehkot kaperen en patehng oh doadoahk rehn aramas me kin kasalehda irair pwukat nan arail tiahk oh wiewia kan.—Lepin Padahk 13:20.
3. Dahme sapwellimen Sises kawehwehpen aramas akan en sapwellime ahnsou kasalehda duwen mahla?
3 Ahpw, pil aramas emen kak keirada ni paliwar, ahpw sang ah koasoi oh wiewia kan kak kasalehda me e saikinte mahla ni palien pepehm oh pali ngehn. Karasepe, Sises mahsanihki dih suwed en sapwellime ahnsouwo oh mahsanih: “Sohn kohdo oh sohte ewen mwenge oh nim sakau, ahpw aramas akan kin nda, ‘Ngehn saut mih reh’; ah Nein-Aramas kohdo oh kang oh nim, a aramas akan pil nda ‘Kilang! Ih aramas kapehden mwenge oh kamamsakau.’ ” Edetehn aramas pwuko mah ni paliwar, Sises mahsanih me arail wiewia rasehng “seri pwulopwul”—saikinte mahla. Ih eri pil kapataiong: “Erpit kin sansaliki pwung sang ni ah doadoahk kan.”—Madiu 11:16-19, New World Translation.
4. Ni ahl dah kan me kekeirada oh mahla ni pali ngehn kin sansal?
4 Sang ni mahsen en Sises kan, kitail kak kilangki ma aramas emen kin ahneki erpit mehlel de soh—pwe ahneki erpit kin wia kilel ehu en emen me mah ni pali ngehn—me sansaliki doadoahk kan me e wiahda iangahki imwilahn doadoahk. Ni ahlohte, tehk kaweid en Pohl ong Timoty. Mwurin Pohl kasalehda soahng kan me Timoty uhdahn pahn akadeiong, e mahsanih: “Pwerisekiong oh poadidiong wiewia soahng pwukat, pwe aramas koaros en kak kilang omw kekeirada.” (1 Timoty 4:15) Ei, ahn Kristian emen ah kekeirada ong mahla ni pali ngehn en “sansalada,” de sansal ong aramas koaros. Emen me kin mah ni pali ngehn pahn duwehte lingan marain—wehwehki e kin sansal ong koaros—e sohte kin mihmihte ni mahs loalen aramas de rukuruk loale. (Madiu 5:14-16) Eri, kitail pahn tehkpene iren kaweid kesempwal riau me keirada oh mahla ni pali ngehn kak sansaliki: (1) keirada en loalokong, wehwehki oh erpit; (2) kasalehda wahn ngehn akan.
Ehupene ni Minimin en Pwoson oh Loalokong
5. Ia wehwehn mahla?
5 Pali laud en diksineri kan kin kawehwe mahla me iei irair ieu en keirada, oh laudla oh alehdi kaimwiseklahn irair de dakehn mehn kaweidpen mour. Wahntuhke ieu, duwen atail koasoiahier mwowe, kin mahla de mat ni ah kanekehlahr ah irair en keirada oh mwomwe, poh, pwowe, oh neme kin lelehr irair me aramas keieu mwahuki. Kahrehda, mahla kin wia ehu lokaia me pahrekiong dahme keieu mwahu, kanekehla, unsek, de pil unsekla.—Aiseia 18:5; Madiu 5:45-48; Seims 1:4.
6, 7. (a) Dahme kin kasalehda me Siohwa kin nsenohki sapwellime tohnkaudok kan en keirada oh mahla ni pali ngehn? (b) Mahla nan irair en Kristian oh alehdi dahieu kin pahrekpene?
6 Siohwa Koht kin ketin nsenohki sapwellime tohnkaudok kan en keirada oh mahla ni pali ngehn. Ihme kahrehda E ketikihda kisakis mwahu kan nan mwomwohdiso en Kristian. Ong Kristian en Episos akan, wahnpoaron Pohl ntingihdi: “E wiaiong ekei en wia wahnpoaron akan, ekei soukohp akan, ekei sounkalohk akan, a ekei sounapwalih kan oh sounpadahk kan, pwehn koasoansapahlih irail me sarawi kan ong doadoahk en kalohk, oh ong kauwada paliweren Krais, lao kitail koaros alehdi irair en ehupenehn pwoson oh loalokong pwung ong sapwellimen Koht Ohl oh wiahla ohl mah ong mehn songepen mahla me duwehte me mih rehn Krais, pwe kitail en solahr wia seri pwelel kan, me ilok kan kin wekiwekid seli, oh kin pengpengkihseli kisinieng en padahk me kin kohsang rehn aramas mwersuwed akan, me kin widing nan arail wiewia sapwung kan.”—Episos 4:11-14.
7 Nan iretikitik pwukat, Pohl kawehwehda me kisehn kahrepe kan me kahrehda Koht ketikihda kisakis kaselel pwukat nan mwomwohdiso pwe aramas koaros en lel irair en ‘ehupene nan pwoson oh ohng wehwe mehlel,’ oh wiahla “aramas mah,” oh ‘duwehla Krais.’ Iei ahnsowo me kitail sohla pahn “pwumpwupwseli” pwehki lamalam oh padahk sapwung kan duwehte seri pwelel ni pali ngehn. Kahrehda kitail kak kilang me mahla nan irair en Kristian oh alehdi irair en “ehupene nan pwoson oh ahneki loalokong pwung me pid duwen sapwellimen Koht ohl” kin pahrekpene. Mie ire kesempwal tohto nan sapwellimen Pohl kaweid me kesempwal kitail en wehwehkihla mwahu oh kapwaiada.
8. Dahme aramas emen anahne wia ma e men “ehupene” nan pwoson oh ahneki loalokong pwung?
8 Keieu, pwehki “ehupene” a nohn kesempwal, Kristian mah kan anahne ehuiong oh miniminiong iangarail me pwoson akan ong irair en pwoson ahnekipene soangen loalokong tehieu. E dehr ngidingidki de idingki meteikan en alehda pein ah madamadau de kolokol pein ah kawehwe ong iren Paipel kan. Ahpw, en likih mehlel padahk pwung nin duwen ah kawehwehda sang sapwellimen Siohwa Koht Ohl, Sises Krais, oh “ladu lelepek oh loalokong.” Sang ni atail kin alehdi mwengehn ngehn akan “ni ahnsou me konehng”—sang ni pwuhk kan, mihding en Kristian akan, kapokon akan—kitail kolokol “ehupene” ong iangatail Kristian akan nan pwoson oh loalokong.—Madiu 24:45.
9. Kawehwehda ia wehwehn lepin lokaia “pwosono” me Pohl doadoahngki nan sapwellime kisinlikou ong mehn Episos kan.
9 Keriau, lepin mahsen “pwosono” sohte kin wehwehki poadidi me emenemen Kristian kan nda me e ahneki, ahpw e kin wehwehki kamehlele unsek me mih rehtail me pid “uwen tehlap, reirei, oh ile oh loal” en atail pwoson. (Episos 3:18; 4:5; Kolose 1:23; 2:7) Ni mehlel, iaduwen Kristian emen ah kak ehuiong ienge me pwoson akan me ihte e pwoson de kamehlele ekeite irair en “pwosono” a ekei soh? Met pahn wehwehki me kitail sohte pahn itarkihte esehlahte tepin padahk kan sang nan Paipel de pil ese semwenehte audepen padahk mehlel. Ahpw, dahme kitail en wia, kitail en nsenohki oh isaneki ahnsou mwahu en ale sapwellimen Siohwa kisakis sapan me e ketikihda nan sapwellime pwihn kasawih kanahieng sapwellime mahsen. Kitail en wia uwen me kitail kak koaros en alehdi wehwe pwung oh esehla mehlel duwen kupwuren Koht oh pil sapwellime koasoandi kan. Met pahn pidada kitail en kihong ahnsou en wadek oh onop Paipel oh pil pwuhk kan me kin kawehwe Paipel, oh pil kin kapakap oh peki sawas oh kaweid sang Koht, pwehn kaukaule iang towehda mihding en Kristian akan oh iang towehda doadoahk en kalohki Wehin Koht oh wia doadoahk en katohnpadahkih aramas.—Lepin Padahk 2:1-5.
10. Ia wehwehn lepin mahsen pwukat: “lao kitail koaros alehdi” nin duwen Episos 4:13 kin kasalehda?
10 Kesiluh, Pohl kawehwehda mwomwen patpenehn mehn akadei siluh ni mahsen pwukat “lao kitail koaros alehdi.” Me pid lepin mahsen ko “kitail koaros,” ehu pwuhk en kawehwehn Paipel kawehwehda duwe met: “kaidehn koaros, ni pein emenemen en kelepw wia, ahpw koaros en patkihpene.” Me wehwehki: emenemen kitail en nantihong akadeiong wiahla Kristian mah ni pali ngehn oh iang riatail kan koaros wia met. Pwuhk ehu me oaralap koasoia The Interpreter’s Bible kawehwehda: “Unseklahn keirada en ngehn sohte kak alahldi ki aramas kelepw, duwehte kisehn paliwar ehu sohte kak laudila ma paliwar unsek sohte pahn keirada ni roson unsek.” Pohl katamaniki Kristian en Episos kan me ki “irail me sarawi kan koaros” me irail en miniminiong pwehn alehdi loalokong unsek en pwosono.—Episos 3:18a.
11. (a) Dahme keirada en pali ngehn sohte wehwehki? (b) Dahme kitail anahne wia ma kitail men kekeirada mwahu ni pali ngehn?
11 E sansal mwahu nan sapwellimen Pohl mahsen kan me keirada en pali ngehn sohte wehwehki ihte en audehkihda atail madamadau ki loalokong oh sukuhl laud. Kristian mah ni pali ngehn sohte kin men suweikiong meteikan ah loalokong. Ahpw, Paipel mahsanih: “Elen me pwung kan kin duwehte marain lingaling me kin wia maramarainla lao rahno dakerada wasa.” (Lepin Padahk 4:18, NW) Ei, met “ahl ehu” kaidehn aramas emen, me wie “maramarainla.” Ma kitail kin kaukaule nantihong peipeian maramarainla en wehwehkihla Mahsen en Koht nin duwen me Siohwa kin ketikihong sapwellime aramas akan, eri, kitail pahn kin wie kekeirada mwahu ni pali ngehn. Nan irair wet, nanti kin wehwehki me kitail kohkohla mwowe, oh iei met mehkot me kitail koaros kak wia.—Melkahka 97:11; 119:105.
Kasalehda “Wahn Ngehn akan”
12. Dahme kahrehda atail kasalehda wahn ngehn akan kin kesempwal ni atail kin keirada ni pali ngehn?
12 E pil mehlel me nantiong alehdi “ehupene nan pwoson oh nan loalokong” mehkot kesempwal, ahpw e pil kesempwal ong kitail en kasalehda wahn ngehn nan irair koaros en atail mour. Pwekihda? Pwehki mahla, nin duwen kitail kilangehr, kaidehn mehkot me mihmi loale de mehkot rir, ahpw e kin dehdehda ki mehkan me aramas kak kilang, oh mehkan me pahn katapan oh kin kakehlailih oh kangoange meteikan. Ni mehlel, atail keirada en pali ngehn kaidehn mehkot me ihte mih ni mwohmw. Ahpw, ni atail kin keirada ni pali ngehn, oh idawehn sapwellimen Koht ngehn sarawi, e pahn kin mie wekidekila laud ni atail mwohmw oh madamadau oh wiewia kan. Pohl mahsanih: “Alialuhki ngehno, kahpw sohte pahn ahneki douluhl ineng en uduk.”—Kalesia 5:16.
13. Soangen wekidekila dah kan kin kasalehda me aramas emen kekeirada ni pali ngehn?
13 Pohl eri doula oh kairekidi “doadoahk kan en uduk,” me inenen tohto oh “sansal.” Mwohn aramas emen a wehwehkihla kaweid en Koht akan, e kin weweidiki elen sampah kan oh ele pil kin audaudki ekei soahng pwukat me Pohl kasalehda wasaht: “nenek, samin, mour suwed, kaudokiong eni mwahl, wunahni, kouimwintihti, kailok, peirin, luwak, kehlingeringer, akamai, saminimin, liaktohrohr, kamamsakau, kamwoaroang wasa, oh soahng kan me rasehng meteikan.” (Kalesia 5:19-21, NW) Ahpw, ni ahnsou me aramaso kin kekeirada ni pali ngehn, e pahn tepidahr ekis ekis kakehr powehdi ire pwukat me wia “doadoahk kan en uduk” oh kakehr kihong wasa nan kapehde ong “wahn ngehn akan.” Soangen wekidekila sansal wet kin wia kilelepen me aramaso wie kohkohlahngehr wiahla Kristian mah.—Kalesia 5:22.
14. Kawehwehda lepin mahsen pwukat: “doadoahk kan en uduk” oh “wahn ngehn akan.”
14 Kitail en tehk mehn kasansal riau pwukat “doadoahk kan en uduk” oh “wahn ngehn akan.” “Doadoahk kan” kin kohsang dahme aramas emen kin wia, oh e kin wia kasalepen ahn emen wiewia kan. Met wehwehki me mehkan me Pohl kairekidi nan sapwellime kisinlikou me wia doadoahk kan en uduk iei mehkan me ekei pak kin kohsang ni mehkot me emen wia ni ah wehwehki de e kin wia sang ni a ahneki luwet en uduk. (Rom 1:24, 28; 7:21-25) Met weksang met, wiewia en “wahn ngehn akan” kin wehwehki me irair akan me ntingihdi kaidehn e kin kohsang ni koahiek en aramas emen, ahpw en kin pwilisang ni ngehnen Koht a kin doadoahk rehn aramas emen. Duwehte tuhke ieu a kin wah ni a kin epwel mwahu, pil aramas emen pahn kihda wahn ngehn ni ah pahn direkihla ngehn sarawi nan eh mour.—Melkahka 1:1-3.
15. Dahme kahrehda e kesempwal en nantihong kasalehda “wahn ngehn kan” koaros?
15 Pil ehu ire kitail en tehk iei kadoadoahkpen lepin mahsen me Pohl doadoahngki me iei “wah” pwehn kak oarepene irair mwahu kan koaros me e kasalehda. Ngehno sohte wiahda soangsoangen wah tohto me kitail en pilada mehnia me kitail mwahuki. Irair kan koaros me Pohl kileledier—limpoak, peren, popohl, kanengamah, kadek, kamwahu, pwoson, opampap, oh liksang me suwed—irair pwukat koaros soangen kesempwal tehieu, oh ni arail patpene irair kan kak wiahda irair en mour en Kristian kapw. (Episos 4:24; Kolose 3:10) Kahrehda, mendahte ma kitail kak kilang nan atail mour ekei wahn ngehn pwukat laud sang ekei, pwehki ahnapatail, e pil kesempwal kitail en pil nantihong pwe kitail en kak kasalehda wahn ngehn kan koaros me Pohl mahsanih ko. Ni atail pahn wia met, atail mour pahn kasalehda me kitail kahlemengih Krais.—1 Piter 2:12, 21.
16. Ia atail mehn akadei ni atail kin nantihong wiahla Kristian mah ni pali ngehn, oh iaduwen ahmw pahn kak lel mehn akadei wet?
16 Mehn kasukuhl kesempwal me kitail kak alehsang sapwellimen Pohl mahsen iei met: me ni atail kin nantihong wiahla Kristian mah ni pali ngehn, atail mehn akadei kaidehn kitail en alehda loalokong laud pil kaidehn kitail kamwahuwihala douluhl atail wiewia kan. Me kitail rapahki iei en alehda sapwellimen Koht ngehn sarawi en tang mwahu nan atail mour. Ni ahnsou me atail madamadau oh wiewia kan ah kin weidkihwei sapwellimen Koht ngehn sarawi, iei ahnsowo me kitail kin mahla ni pali ngehn. Iaduwen atail pahn kak lel mehn akadei wet? Kitail en ritingohng atail mohngiong oh madamadau pwe sapwellimen Koht ngehn sarawi en kaweid. Met kin pidada laud atail kin loalenohng towehda oh wia kisehn mehkan me wiawi nan mihding en Kristian kan. Kitail en pil kaukaule onop oh doudouloale Mahsen en Koht, oh mweidohng kaweid akan en kahluwa atail wiewia kan ohng meteikan oh pil pilipil akan oh koasoandi kan me kitail wia. Ni mehlel, atail keirada pahn sansal ong meteikan.
Kekeirada Kin Wahdo Lingan oh Kaping Ong Koht
17. Iaduwen atail kekeirada kin wahdo lingan oh kaping ong Samatail nanleng?
17 Ni imwio, atail kasalehda atail kekeirada kin wahdo lingan oh kaping, kaidehn ohng pein kitail, ahpw ong Samatail nanleng, Siohwa, me ketin wiahiong kitail en mahla ni pali ngehn. Pwong mwohn Sises a matala, e mahsanih ong tohnpadahk ko: “Semeio ketin linganikihla met, me kumwail kin wonoweite oh kihda wah ah kadehdehda me kumwail nei tohnpadahk.” (Sohn 15:8) Sang ni wahn ngehn kan me re kasalehda oh pil wahn kalohk en Wehio, tohnpadahk kan wahdohng Siohwa lingan oh kaping.—Wiewia 11:4, 18; 13:48.
18. (a) Soangen doadoahk kaperen en dondol rahk wiawi rahnwet? (b) Pwehki kitail memour nan ahnsoun rahk, soangen irair dah kan kin pwarada?
18 Rahnwet, kapai en Siohwa mih pohn aramas akan ni ahnsou me re kin wia arail doadoahk en dondol en pali ngehn nan sampah pwon. Erein sounpahr tohto sang mahs leledo met, mpen aramas 300,000 nan pahr koaros kin inoukihong Siohwa arail mour oh papidaisla nan pihl. Met kin wahdohng kitail peren oh ni mehlel kin kaperenda mohngiong en Siohwa. (Lepin Padahk 27:11) Ahpw, pwe met en kaukaule wahdo peren oh kaping ohng Siohwa, irail me kapw pwukat koaros en “nantihweite weweidki [Krais] ni arail miniminiong ih. Mourarail en poadidiong reh, en pil kekeirkihda ih, oh tengediong nan pwoson.” (Kolose 2:6, 7, NW) Met kin kahrehda irair riau en pwarada ohng sapwellimen Koht aramas akan. Ma ke ahpwtehn papidais, ke kak toukihda pein kowe pwe “ahmw kekeirada en sansal ong aramas koaros”? A ma ke ekis wereilahr nan pwoson, ke kak alehiong uhk pwukoa en sewese meteikan me kapw kan ni pali ngehn? E sohte lipilipil mehnia me ke pahn wia, ahpw anahnepen nantihong wiahla Kristian mah ni pali ngehn me sansal mwahu.—Pilipai 3:16; Ipru 6:1.
19. Soangen kapai dah kan ke kak ahneki ma ke pahn kasalehda ahmw kekeirada ni pali ngehn?
19 Kapai kaselel kan wie awiawih irail koaros me doadoahk laud pwe ren kasalehda ong meteikan arail kekeirada. Tamanda sapwellimen Pohl mahsen en kangoang kan mwurin e kangoange Timoty en kasalehda kekeirada: “Kanakanahieng pein kowe oh pil kanahieng omw padahk kan. Nantihong wiewia soahng pwukat, pwe ma ke pahn wia, ke pahn doarehla pein kowe oh pil irail kan me kin rong uhk.” (1 Timoty 4:16) Sang ni ahmw pahn kasalehda omw kekeirada ni pali ngehn, ke kak iang kisehn wiewiahn kalinganahda mwaren Koht oh perenki sapwellime kapai kan.
Ke Tamataman?
• Ni ahl dah kan kekeirada ni pali ngehn kin sansalada?
• Soangen loalokong oh wehwehki dah kan kin kasalehda me aramas emen mah ni pali ngehn?
• Iaduwen atail kasalehda “wahn ngehn akan” kin kasalehda atail kekeirada ni pali ngehn?
• Soangen irair dah kan kin pwarada ni atail men kekeirada ni pali ngehn oh men wiahla aramas mah ni pali ngehn?
[Kilel nan Pali 27]
Mat de mah kin sansal mwahu
[Kilel nan Pali 28]
Kitail kak kekeirada ni pali ngehn ni ahnsou me kitail kin nantihong wehwehkihla Mahsen en Koht nin duwen me Siohwa ketikihong sapwellime aramas akan
[Kilel nan Pali 30]
Kapakap kin sewese kitail en kasalehda “wahn ngehn akan”