Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • w09 5/1 pp. 13-17
  • Me Pwulopwul Kan—Kasalehda Amwail Kekeirda

Sohte kasdo ong met

Kupwurmahk, mehkot sapwung en kihda kasdo

  • Me Pwulopwul Kan—Kasalehda Amwail Kekeirda
  • Kahn Iroir Pakpakairki Wehin Siohwa—2009
  • Sawaspen Oaralap kan
  • Ire kan me Duwehte Met
  • Ia Wehwehn Kekeirda?
  • Powehdi Kahpwal kan ki “Madamadau Pwung”
  • Kaunopada ong Pwopwoud me Pweida
  • Kapwaiada Omw Pwukoa en Kalohk
  • Kekeirda Kin Wahdo Nsenamwahu Mehlel
  • Kasalehda Omw Kin Kekeirda
    Kahn Iroir Pakpakairki Wehin Siohwa—2009
  • Kasalehda Ahmw Kekeirada Ni Pali Ngehn
    Kahn Iroir Pakpakairki Wehin Siohwa—2002
  • Ohl kan me Idihdida—Sukuhlkihsang Timoty
    Kahn Iroir Pakpakairki Wehin Siohwa (Ong Onop)—2018
  • En Kekeirda nan Ahmw Doadoahk en Kalohk
    Atail Doadoahk ong Wehio—2008
Kahn Iroir Pakpakairki Wehin Siohwa—2009
w09 5/1 pp. 13-17

Me Pwulopwul Kan—Kasalehda Amwail Kekeirda

“Pwerisekiong oh poadidiong wiewia soahng pwukat, pwe aramas koaros en kak kilang omw kekeirda.”—1 TIM. 4:15.

1. Dahme Koht kupwurki ong me pwulopwul kan?

SOLOMON, nanmwarki erpit en Israel mahs, ntingihdi: “Mwahnakapw akan, kumwail pereperenki amwail pwulopwul. Kumwail pereperen nindokon amwail pwulopwul.” (Ekl. 11:9) Mahsen pwukat kohsang rehn Siohwa Koht, me kin kupwurki kumwail me pwulopwul kan en peren, kaidehn ihte nindokon amwail pwulopwul ahpw pil ahnsou me kumwail pahn mahla. Ahpw soangen ahnsou kan me irail wie pwulopwulte, re kin kalapw sapwungala oh kak kawekihla arail mour en ahnsou kohkohdo. Ohl lelepek Sohp pil kin pahtoula ‘pwehki dihp akan me e wiadahr ni eh pwulopwul.’ (Sohp 13:26) Nindokon arail pwulopwul oh pil nan sounpar kante mwurin mwo, Kristian pwulopwul men anahne en kin wiahda pilipil kesempwal kan. En wiahda pilipil sapwung kan kak kihong ih nan pahtou laud oh pil kak kahrehda kahpwal kan me kak kawekila eh mour mwuhr.—Ekl. 11:10.

2. Mehnia kaweid en Paipel me irail me pwulopwul kan kak doadoahngki pwehn dehr wiahda pilipil sapwung laud kan?

2 Me pwulopwul kan anahne doadoahngki madamadau pwung. Tehk duwen kaweid me wahnpoaron Pohl kihong mehn Korint kan. E ntingihdi: “Kumwail dehr kin mwomwen seri. . . . ni amwail lamalam, kumwail en kin duwehte ohl mehlel koahiek men.” (1 Kor. 14:20) En kapwaiada kaweid wet en alehdi koahiek en madamadau duwehte ohl mehlel koahiek men, pahn sewese me pwulopwul men en dehr wiahda pilipil sapwung laud kan.

3. Dahme ke kak wia pwehn koahiekla?

3 Ma kowe emen me pwulopwul, tamataman me ke anahne nannanti pwe ken koahiekla. Pohl padahkihong Timoty: “Ke dehr mweidohng emen en mwamwahlikin uhk pwehki omw pwulopwul, ahpw ke en wia mehn kahlemengih ehu ong irail kan me pwoson, ni omw koasoi, ni omw tiahk, ni omw limpoak, ni omw pwoson oh mwakelekel. . . . nantihong wadewadek pwuhk Sarawi ong aramas akan, oh padapadahkih oh panapanawih irail. . . . Pwerisekiong oh poadidiong wiewia soahng pwukat, pwe aramas koaros en kak kilang omw kekeirda.” (1 Tim. 4:12-15) Kristian pwulopwul kan anahne nannanti pwe aramas koaros en kak kilang arail kekeirda.

Ia Wehwehn Kekeirda?

4. Ia wehwehn en kekeirda nin duwen Kristian?

4 En kekeirda iei “en wiahda wekidekla kan pwehn mwahula.” Pohl kangoange Timoty en nantihong en kamwahwihala eh koasoi, tiahk, limpoak, pwoson, mwakelekel oh doadoahk en kalohk. E anahne en nantihong wiahla mehn kahlemeng mwahu. Ihme kahrehda Timoty anahne en kekeirda irair pwukat nan eh mour en Kristian.

5, 6. (a) Iahd me Timoty tepida kasalehda eh kekeirda? (b) Me pid duwen kekeirda, ia duwen me pwulopwul kan kak alasang Timoty?

5 Ni ahnsou me Pohl ntingihdi kaweid pwukat nanpwungen pahr 61 lel 64, Timoty wialahr emen elder. Met kaidehn ahnsou me e ahpwtehn pahn wie kekeirda nin duwen Kristian. Nan pahr 49 de 50, ni ahnsou me Timoty ele sounpar 19 de 20 samwa, e “keniken rehn me pwoson akan koaros en nan Listra oh Aikoniomw.” Re kin kilang eh kekeirda nin duwen Kristian men. (Wiewia 16:1-5) Ni ahnsowo, Pohl kahre Timoty en iang ih nan eh seiloak en misineri. Mwurin e kasawih en Timoty kekeirda erein sounpwong kei, Pohl kadarala ih Deselonika pwehn kamweit oh kakehlaka irail Kristian en kahnimwo. (Wadek 1 Deselonika 3:1-3, 6.) E sansal me Timoty tepida kasalehda ong meteikan eh kekeirda ni eh pwulopwul.

6 Kumwail me pwulopwul kan nan mwomwohdiso, nantihong kakairada irair en Kristian kan me anahn ahnsou wet, pwe amwail kekeirda nin duwen Kristian oh amwail koahiek en padahngki duwen padahk mehlel en Paipel en sansalda. Mendahki eh sounpar 12 te, Sises “ketin kekeirda oh kupwurokongla.” (Luk 2:52) Eri, kitail pahn tehk ia duwen ke kak kekeirda nin duwen Kristian men nan wasa siluh nan omw mour: (1) ni ahnsou me ke lelohng kahpwal akan, (2) ni omw kaunopada en pwopwoud, oh (3) ni omw nantihong en wiahla “ladu mwahu men.”—1 Tim. 4:6.

Powehdi Kahpwal kan ki “Madamadau Pwung”

7. Dahme kahpwal kak wiahiong me pwulopwul kan?

7 Kristian men ede Carol me mahki sounpar 17 koasoia: “Ekei pak, paliwereiet oh ei madamadau kin pwangada mehlel, kahrehda I sohte men pwourda nimenseng.”a Dahme kahrehda e kin pwangada? Ni ahnsou me Carol sounpar 10, eh peneinei ohkihla mweipeseng en pahpa oh nohno, oh eh anahne mi rehn eh nohno me sohte kin doadoahngki kaweid en Paipel. Duwehte Carol, ele ke mi nan kahpwal kan me mwomwen sohte kak mwahula.

8. Soangen kahpwal dah kan me Timoty ahneki?

8 Erein eh wie kekeirda, Timoty pil lelohng kahpwal kan. Karasepe, e “kin kalap soumwahu” en kapehd. (1 Tim. 5:23) Ni ahnsou me Pohl kadarala ih Korint pwehn apwalihala kahpwal kan me pid ekei me kin uhwong manaman en wahnpoaron ko, Pohl kangoange tohnmwomwohdiso en miniminiong Timoty pwe en “nsenamwahu” rehrail. (1 Kor. 4:17; 16:10, 11) Sansal me Timoty kin namenek.

9. Ia wehwehn madamadau pwung? Ia duwen e weksang irair en masak?

9 Pwehn sewese Timoty, Pohl katamankin ih mwuhr: “Koht kin ketikihong kitail kaidehn irair en masak, ahpw kehl oh limpoak oh madamadau pwung.” (2 Tim. 1:7, NW) “Madamadau pwung” iei en ahneki koahiek en madamadau. E pil kin pid koahiek en kilangwohng soahng nin duwen dahme wiawi ahpw kaidehn nin duwen dahme ke mwahuki en wiawi. Ekei me pwulopwul soakoahiek kan kin kasalehda irair en masak oh song en kihsang kapwunod kan sang arail madamadau ni arail kin meir nohk daulihla de kilang kasdo ahnsou reirei, doadoahngki wini suwed de kalapw sakaula, kalapw iang kamadipw kan, de wia dipen nenek. Kristian kan ale kaweid en “kesehla mouren seupwoson Koht oh ineng suwed en sampah, oh ahneki madamadau pwung, oh momourki mour pwung oh sarawi nin sampah wet.”—Taitus 2:12, NW.

10, 11. Ia duwen madamadau pwung kin sewese kitail en likih Koht me pahn ketikihong kitail kehl?

10 Paipel kangoange me “mwahnakapw akan, . . . en ese kaunda pein irail [“madamadau pwung,” NW].” (Taitus 2:6) En kapwaiada kaweid wet wehwehki me ke anahne kapakap oh likih sapwellimen Koht kehl ni omw pahn lelohng kahpwal kan. (Wadek 1 Piter 4:7.b) Eri, ke pahn kakairada likilik nan kehl “me Koht ketikihong” uhk.—1 Pit. 4:11.

11 Madamadau pwung oh kapakap me sewese Carol. E koasoia: “En dehr werekiong ei nohno me mourki tiahk samin wia mehkot me keieu apwal ong ie. Ahpw kapakap uhdahn sewese ie. I ese me Siohwa ketin ieiang ie, ihme kahrehda I sohte masak mehkot.” Tamataman me kahpwal kan kak kamwahwiukala oh kakehlailiukala. (Mel. 105:17-19; Koul Ked. 3:27) Sohte lipilipil dahme ke lelohng, Koht sohte pahn ketin keseiukala. E pahn ketin ‘sewesei iuk.’—Ais. 41:10.

Kaunopada ong Pwopwoud me Pweida

12. Dahme kahrehda Kristian men me men pwopwoud anahne doadoahngki kaweid me kileldi nan Lepin Padahk 20:25?

12 Ekei me pwulopwul kin mwadang pwopwouda, pwe re kasik me ih me pahn wahdo peren, kihsang sangat, oh kamwahwihala arail kahpwal kan nan peneinei. Ahpw, inou en pwopwoud wia mehkot me uhdahn kesempwal. Ekei irail me momour mahs mwadang wiahda inou sarawi ahpw sohte medewe mwahu dahme inou wet kin pidada. (Wadek Lepin Padahk 20:25.) Ekei ahnsou, me pwulopwul kan sohte kin medewe mwahu soahng kan me ira anahne en nantihong wia pwe ara mouren pwopwoud en pweida. Ahpw mwuhr, ira kin diarada me soahng tohto kin pidada mouren pwopwoud, laudsang dahme ira kin wehwehki.

13. Dahme irail kan me medemedewe en tepida esehla emen me re men pwoudiki anahne idek rehrail? Soangen sawas dah me kohwong irail?

13 Eri, mwohn omw pahn medemedewe en esehla emen me ke men pwoudiki, ke kak idek rehmw: ‘Dahme kahrehda I men pwopwouda? Dahme I kin kasik sang ei pahn pwopwouda? Aramas menet me konehng I en pwoudiki? I onopadahr en kapwaiada ei pwukoa kan nin duwen aramas pwopwoudida men?’ Pwehn sewese iuk kasawih ni loalokong pwe ken wiahda pilipil pwung, “ladu lelepek oh loalokong” wiahda iren onop kan me pid duwen pwopwoud.c (Luk 12:42-44) Kilangwohng sawas pwukat nin duwen kaweid kei me kohsang rehn Siohwa. Tehk kanahieng dahme ntingdi oh doadoahngki. Ken dehr “pweipwei duwehte oahs de ahs.” (Mel. 32:8, 9) Duwehla ohl mehlel koahiek men ni omw lamalam ong soahng kan me ke anahne nantihong wia nan mouren pwopwoud. Ma ke pehm me ke onopadahr en esehla emen me ke men pwoudiki, ahnsou koaros tamataman ken “wia mehn kahlemengih ehu ong . . . mwakelekel.”—1 Tim. 4:12.

14. Ia duwen kakairada irair kan en Krais kak sewese iuk ma ke pwopwoud?

14 Koahiekla nin duwen Kristian men pil kak kahrehiong mouren pwopwoud en pweida mwurin kapwopwoud. Kristian men me ahneki nanpwungmwahu rehn Siohwa kin nantihong en lel “idin deilahn Krais unsek.” (Ep. 4:11-14) E kin nantihong kakairada irair kan me Krais sapwellimaniki. Nin duwen atail mehn kahlemeng, “Krais sohte ketin kupwurohkihte pein ih.” (Rom 15:3) Ni ahnsou me ohl oh lih pwopwoud men kin rapahki kamwahupen meteio ah kaidehn pein ah, mouren peneinei pahn meleilei oh nsenamwahu. (1 Kor. 10:24) Ohl pwopwoud men pahn kasalehda limpoak me tounmetei, oh lih pwopwoud men pahn koasoanehdi en uhpah eh pwoud duwehte Sises kin ketin uhpahiong Tapwi.—1 Kor. 11:3; Ep. 5:25.

Kapwaiada Omw Pwukoa en Kalohk

15, 16. Ia duwen ke kak kasalehda omw kekeirda nan doadoahk en kalohk?

15 Pwehn kasalehda kesempwalpen en Timoty pwukoa, Pohl ntingihdi: “I pangenkin uhk mwohn silangin Koht oh Krais Sises . . . ke en kalohkiseli mahseno, ke en nantihong koasoakoasoia duwe, . . . oh wia omw pwais en sounkadehde en Rongamwahu, oh pil kapwaiada omw pwukoa nin duwen me konehng ladun Koht men.” (2 Tim. 4:1, 2, 5) Pwehn kapwaiada pahngok wet, Timoty anahne ‘katungoalehki ih mahsen kan en pwoson.’—Wadek 1 Timoty 4:6.

16 Ia duwen ke kak ‘katungoalehkin uhk mahsen kan en pwoson’? Pohl ntingihdi: “Nantihong wadewadek pwuhk Sarawi ong aramas akan, oh padapadahkih oh panapanawih irail. Pwerisekiong oh poadidiong wiewia soahng pwukat.” (1 Tim. 4:13, 15) Pwehn kamwahwihala pein kitail, kitail anahne en kaukaule wia pein atail onop. Lepin lokaia wet “poadidiong” kin wehwehki en loalohng doadoahk ehu. Ia iren omw koasoandi en onop? Ke kin poadidiong nan “wasa rir kan en kupwur en Koht”? (1 Kor. 2:10) De ke sohte kin nohn nantihong? Pwerisekiong dahme ke onopki pahn kamwakid uhk en kekeirda nan doadoahk en kalohk.—Wadek Lepin Padahk 2:1-5.

17, 18. (a) Soangen irair dah kan me ke anahne nantihong kakairada? (b) Ia duwen omw pahn kahlemengi Timoty pahn sewese iuk nan doadoahk en kalohk?

17 Pioneer pwulopwul men me ede Michelle koasoia: “Pwehn pweida mwahu nan doadoahk en kalohk, I anahne wiahda koasoandi mwahu ong ei onop Paipel, oh kaukaule towehda mihting kan. Pwehki met, I kin kekeirda nin duwen Kristian men.” Papah nin duwen pioneer men pahn sewese iuk en kamwahwihala omw koahiek en doadoahngki Paipel nan kalohk oh koahiekla nin duwen Kristian men. Nantihong kamwahwihala omw koahiek en wadawad oh kaunopada mwahu pasapeng kan ong mihting en Kristian kan. Pwehn kasalehda omw kekeirda nan padahk mehlel, ke anahne kaunopada padahk kan nan Sukuhl ong Sapwellimen Koht Doadoahk oh doadoahngki sawaspen Paipel kan me kohwong uhk.

18 En “wia omw pwais en sounkadehde en Rongamwahu” kin wehwehki nantihong omw kalohk en pweida mwahu oh sewese meteikan en ale komour. Ke anahne kamwahwihala wiepen omw “padahk.” (2 Tim. 4:2) Ni omw pahn koasoanehdi en iang irail kan me koahiek nan kalohk, ke pahn sukuhlki sang wiepen arail padahk kan, duwehte Timoty eh sukuhlki sang Pohl. (1 Kor. 4:17) Ong irail kan me Pohl sewese, e koasoia me kaidehn rongamwahuohte me e kihong irail ahpw ‘pein eh mour’ pwehki reh wialahr kompoakepah mehlel kei. (1 Des. 2:8) Pwehn idawehn mehn kahlemeng en Pohl nan doadoahk en kalohk, ke anahne ahneki soangen irair me Timoty ahneki. E kin nsenohki mehlel meteikan oh ‘kin doadoahk pwehki rongamwahu.’ (Wadek Pilipai 2:19-23.) Ke kin kasalehda soangen irair en tounmetei wet nan omw kalohk?

Kekeirda Kin Wahdo Nsenamwahu Mehlel

19, 20. Dahme kahrehda kekeirda nin duwen Kristian kin wahdo peren?

19 Ke anahne nantihong pwe ken kak kekeirda nin duwen Kristian men. Ahpw ni omw pahn kanengamah pwehn kakairada wiepen omw padahk kan, kedekedeo ke pahn alehdi kapai en “kakepwehpwehla me tohto” sang ni omw padahkihong irail padahk mehlel, oh re pahn wiahla omw ‘peren, oh kahrepen omw pahn suweiki’ irail. (2 Kor. 6:10; 1 Des. 2:19) Fred emen pioneer, koasoia: “Ei ahnsoun sewese meteikan kin laud sang mahs. E mehlel me kihkihwei kin kaperen sang ale.”

20 Pioneer pwulopwul men me ede Daphne kasalehda duwen peren oh nsenamwahu me e alehdi ni eh kekeirda nin duwen Kristian men. E koasoia: “Ni ei sukuhlki laud duwen Siohwa, I kakairada nanpwungmwahu reh me kehlail sang mahs. Ni omw pahn kaperenda Siohwa ni uwen omw kak koaros, ke pahn inenen peren oh nsenamwahu!” Mendahki aramas sohte kin kalapw pohnese omw kekeirda nin duwen Kristian, Siohwa kin ahnsou koaros mwahngih oh kesempwalki. (Ipru 4:13) Kumwail me pwulopwul kan uhdahn kak kalinganahda oh kapinga Samatail nanleng. Pousehlahte kaperenda ih ni omw pahn nantihong kasalehda omw kekeirda.—Lep. Pad. 27:11.

[Nting tikitik me mi pahs]

a Ekei eden aramas akan nan iren onop wet weksang uhdahn ederail.

b 1 Piter 4:7 (NW): “Eri, imwin mehkoaros kerendohr. Kumwail en ahneki madamadau pwung oh mwasamwasahn pwe kumwail en kin kapakap.”

c “Aramas Menet me Konehng I en Pwoudiki?” mi nan pwuhk en Peidek Sang me Pwulopwul kan—Pasapeng kan me Kin Pweida, II (Questions Young People Ask—Answers That Work, Volume 2); “Kaweid Sang Rehn Koht Ong Pilada Ihs Me Ke Pahn Pwoudiki,” nan Kahn Iroir en November 1, 2001; oh “Ia Uwen Loalokong en Pwopwoudida ni Omw Pwulopwul?” nan Awake! en September 22, 1983.

Dahme Ke Sukuhlki?

• Ia wehwehn en kekeirda nin duwen Kristian men?

• Ia duwen omw kak kasalehda omw kekeirda nin duwen Kristian men . . .

ni omw lelohng kahpwal?

ni omw kaunopadahng pwopwoud?

ni omw doadoahk en kalohk?

[Kawehwehpen kilel kan nan ehu ehu pali 15]

Kapakap kak sewese iuk en powehdi kahpwal kan

[Kawehwehpen kilel kan nan ehu ehu pali 16]

Ia duwen sounkalohk pwulopwul men kak kamwahwihala wiepen eh padahk?

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share