Ohl Pwopwoud Kan, Kahlemengih Sapwellimen Krais Limpoak!
PWOHNG mwohnte eh pwoula, Sises mahsanihong sapwellime wahnpoaron lelepek kan: “I pahn kihong kumwail kosonned kapw ehu: kumwail en poakpene nanpwungamwail. Duwen ei poakohng kumwail, iei duwen kumwail en poakpene. Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:34, 35) Eri, Kristian mehlel kan anahne en kin limpoakpene.
Wahnpoaron Pohl kin kaweidih ohl pwopwoud Kristian akan: “Kumwail ohl pwopwoud kan, kumwail poakohng amwail werek kan duwehte Krais eh ketin poakohng mwomwohdiso oh ketin pangala pein ih pwehki mwomwohdiso.” (Ep. 5:25) Ia duwen ohl pwopwoud Kristian emen kak kapwaiada kaweid wet nan eh pwopwoud, mehlel ma eh pwoud inoukihdahier eh mour ong Siohwa?
Krais Ketin Kesempwalki Mwomwohdiso
Paipel mahsanih: “Ohl akan uhdahn pahn poakohng ar werek kan duwehte ar kin poakohng pein paliwararail kan. Ohl me kin poakohng eh werek, kin poakohng pein ih. (Sohte me kin kailongki pein paliwere. Pwe e kin kamwenge oh e kin kanai, duwehte Krais eh kin ketin apwalih mwomwohdiso).” (Ep. 5:28, 29) Sises ketin poakohng sapwellime tohnpadahk kan oh kesempwalki irail. Mendahki re soh unsek, e kin ketin kadek ong irail. “Pwe en ketin kasalehiong pein ih mwomwohdiso ehu me lingan,” e kin mahsanihte irair mwahu kan en sapwellime tohnpadahk kan.—Ep. 5:27.
Duwehte en Krais kin ketin kasalehda sapwellime limpoak ong mwomwohdiso, ohl pwopwoud men anahne kasalehda eh limpoak ong eh pwoud ni eh lokaia kan oh wiewia kan. Ma ohl pwopwoud men kin kalapw kasalehda eh limpoak ong eh pwoud, liho pahn nsenamwahu pwehki e pehm me eh pwoud kin kesempwalki ih. Ahpw ma ohl men sohte kin kesempwalki eh pwoud, liho pahn uhdahn nsensuwed mehnda ma e mi nan ihmw kaselel oh diren eh kepwe.
Ia duwen ohl pwopwoud men kak kasalehda me e kin kesempwalki eh pwoud? Mwohn aramas, e kin kasalehda wahu oh kin kapinga eh pwoud. Ma eh pwoud kin sewese peneinei en pweida mwahu, ohlo pahn perenki nda met ong meteikan. Ni ahnsou me ira kin kelehpwla, liho kin pehm en eh pwoud limpoak. En koledi peh, pohkomwokomw, pwoalehdi, oh lokaiahn kaping mwomwen mehkan me tikitik, ahpw soahng pwukat inenen kesempwal ong liho.
“Sises Sohte Ketin Namenengki Kahdanekin Irail Rie”
Sises Krais “sohte ketin namenengki kahdanekin [sapwellime tohnpadahk me keidi kan] rie.” (Ipru 2:11, 12, 17) Ma kowe emen ohl pwopwoud Kristian, tamataman me omw pwoud pil wia riomw Kristian men. Eh inou ong Siohwa kesempwal sang eh inou en pwopwoud, sohte lipilipil ma e papidaisla mwohn de mwurin amwa kapwopwoud. Ma kowe brother men me kin wia mihting en Kristian oh ke pahn likwerih omw pwoud ong pasapeng, e pahn konehng ken likweriki “Sister —.” Omw pwoud lih wia sister men kaidehn nan Wasahn Kaudokte ahpw pil nan imwamwa. E kesempwal en kin kadek oh kasalehda wahu ong ih nan ihmwo duwehte nan Wasahn Kaudok.
Ma mie omw pwukoa kan nan mwomwohdiso, ele ekei ahnsou ke kin apwalki kapwaiada omw pwukoa kan koaros iangahki omw pwukoahn peneinei. Sawaspene nanpwungen elder kan oh soun sawas kan oh kaiahnehda meteikan en apwalih ekei pwukoa kan nan mwomwohdiso pahn kihong uhk ahnsou ong sister men me keieu anahne iuk, iei omw pwoud. Tamataman me mie brother teikan me kak wiliandi uhk en wia omw pwukoa kan nan mwomwohdiso, ahpw kowehte me kak pwukoahki omw pwoud.
Kapatahiong met, kowe me tapwin omw pwoud. Paipel mahsanih: “Duwen Krais eh tapwin aramas koaros, duwen ohl pwopwoud eh moangen eh pwoud.” (1 Kor. 11:3) Ia duwen ke pahn kapwaiada omw pwukoa wet? Ke pahn wia met ni elen limpoak ahpw kaidehn omw pahn kapwurehiong iren Paipel wet oh ndaiong omw pwoud en wauneki iuk. Ke anahne kapwaiada omw pwukoa en tapwi ong omw pwoud ni omw kin kahlemengih Sises Krais.—1 Pit. 2:21.
“Kumwail Iei Kompoakepahi”
Sises ketin wiahki sapwellime tohnpadahk kan kompoakepah kan. E mahsanihong irail: “I solahr pahn kahdanekin kumwail ladu, pwehki ladu sohte kin ese dahme eh soumas kin wia. Ahpw I pahn kahdanekin kumwail kompoakepahi, pwehki ei padahkihongkumwailehr soahng koaros me I rongasangehr rehn Semei.” (Sohn 15:14, 15) Sises oh sapwellime tohnpadahk kan kin kapehse mwahu nanpwungarail. Irail pil kin ehupene. “Sises oh sapwellime tohnpadahko ko” iang kapwopwoud nan Kena. (Sohn 2:2) Mie wasa kan me re kin kalapw kohla duwehte mwetuwel en Kedsemeni. Paipel mahsanih me wasao, “pak tohto Sises oh sapwellime tohnpadahk ko kin tuhpene ie.”—Sohn 18:2.
Lih pwopwoud men anahne en pehm me e wia kompoakepah me keieu keren ong eh pwoud. Ia uwen kesempwal kumwail ohl pwopwoud kan oh lih pwopwoud kan en ehupene nan amwail mour! En kin ehupene papah Koht. Ehupene onop Paipel. Ehupene mwemweit, koasoakoasoipene oh mwengepene. Wia laud sang en wia aramas pwopwoudte ahpw en wiahla kompoakepah mwahu kan.
“E Ketin Loalloale Irail Lel ni Imwi”
Sises ‘ketin loalloale sapwellime tohnpadahk kan lel ni imwi.’ (Sohn 13:1) Ekei ohl pwopwoud kan sohte kin kahlemengih Krais me pid ire wet. Irail kakete kesehla ‘lih me re pwoudikidahr ni ar pwulopwul’ pwehn pwoudikihda emen me pwulopwul sang arail pwoud.—Mal. 2:14, 15.
Meteikan duwehte Willi kin kahlemengih Krais. Eh pwoud luwetala ni paliwar oh anahne sawas erein sounpar tohto. Ia en Willi pepehm duwen met? E koasoia: “I kin ahnsou koaros wiahki ei pwoud duwehte kisakis ehu sang rehn Koht oh kesempwalki ih. Patehng met, sounpar 60 samwalahro I inoukihda me I pahn apwalih ih ni ahnsou mwahu kan oh pil ni ahnsou apwal akan. I sohte pahn manokehla ei inou wet.”
Kumwail ohl pwopwoud Kristian akan, kahlemengih sapwellimen Krais limpoak. Kesempwalki omw pwoud me kin lemmwiki Koht, pwehki ih riomw Kristian oh kompoakepahmw men.
[Kawehwehpen kilel kan nan ehu ehu pali 19]
Omw pwoud wia kompoakepahmw me keieu keren?
[Kawehwehpen kilel kan nan ehu ehu pali 19]
“Kumwail poakohng amwail werek kan”