Kahpwal en Paliwar Ahpw Perenki Papah Koht

MA KE pahn tepin tuhwong Leonardo, ke sohte pahn medewe me ih soun wiahda ihmw men. Sohte peh kan pwehki aksident ehu me wiawi nan eh doadoahk en mahs. Ahpw mendahki met, Leonardo kin doadoahk en wia ihmw nan Acajutla, El Salvador, me sansalda nan kilel wet.

Pwehn kak iang doadoahko, mie me sewesehki Leonardo en wiahda nah dipwisoun doadoahk kan. E kin kihlong peh palimaun nan ehu mete pwonopwon me katengdi ni imwin sapwel ehu oh e kin sapwelih pwehl ong nan ehu wheelbarrow. E kin kihong mete pwonopwon ehu ong wheelbarrow pwe ih en kak pwuhs. Dahme kin kamwakid ih en iang doadoahk wet?

Leonardo men iang doadoahk en kauwada Wasahn Kaudok en mwomwohdiso en Sounkadehdehn Siohwa kan. Mie kahrepe tohto ong ih en dehr iang doadoahko. Mie eh doadoahk mwahu, mie eh kahpwal en paliwar, oh e kin ahneki pwukoa en soun sawas men nan eh mwomwohdiso. Ahpw, e men wia uwen eh kak pwehn papah Koht nan wasahn doadoahk wet.

Ke pil kin perenki papah Koht? Leonardo sohte medewe me e sohte kak iang doadoahko pwehki eh kahpwal en paliwar. E doadoahngki eh loalokong pwehn wiahda dipwisoun doadoahk kan pwe ih en kak wia doadoahk ehu me mwomwen apwal ong ih. E kin papah Koht ‘sang ni eh lamalam koaros unsek.’ (Madiu 22:37) Sohte lipilipil ma irail ahneki kahpwal en paliwar de soh, tohndoadoahk kan me kin kauwada Wasahn Kaudok en Sounkadehdehn Siohwa kan nan sampah pwon kin men toukihda pein irail. Aramas koaros kak iang towehda arail mihting kan oh ke pil kak iang towehda.