Kokoudahn Kingdom Hall kan iei Ehu Irair Kesempwal en Kaudok
1. Dahme pweidahier nan doadoahk en kokoudahn Kingdom Hall, ahpw dahme anahnte en wiawi?
1 Sang pahr limau samwalahro, Kingdom Hall 633 kokouda, meh 1,193 onohnsapahlda, oh meh 1,785 kamwahula nan United States. Kitail kin kalahnganki doadoahk laud en pwihn en kokou ihmw kan (Regional Building Committee kan) oh irail koaros me kin sewese irail. Mendahki doadoahk laud wiawihdahr, pil laudte me pil anahne wiawi ong kokoudahn Kingdom Hall kan. Iaduwen kitail koaros kak sawas nan irair kesempwal en atail kaudok ong Siohwa?—Kaudiahl 7:15.
2. Iaduwen kitail kak iang pein utungada doadoahk en kauwada Kingdom Hall kan?
2 Nsenkihda en Men Iang Doadoahk: Ma ke wia sounkalohk men me papidaislahr, se men luhke iuk en nantihong iang sewese pwihn en kokou ihmw kan (Regional Building Committee) sang ni ahmw pahn audehda doaropwe en “Kingdom Hall Volunteer Worker Questionnaire. (Melkahka 110:3) Koaros me men iang doadoahk anahne en wia tohndoadoahk me men doadoahk oh ahneki ngenen doadoahkpene. (Melkahka 133:1) Mehnda ma sohte ahmw koahiek tohrohr nan palien kokou ihmw, ke kak iang sawas nan doadoahk en kokou ihmw tohtohie. Ke kak pil alehdi mehn kasukuhl me pahn sewese iuk ken kak iang kalaudehla ahmw doadoahk nan ahnsou kohkohdo kan.
3. Ni soangen ahl dah kan me kitail kak kasalehda atail utungada koasoandi en kauwada Kingdom Hall kan?
3 Ma ke sohte kak iang doadoahk wet, ke kak kasalehda ahmw utuht ni ahmw pahn kangoange meteikan me kak iang doadoahk wet. Ke kak iang sawas ni ahmw pahn wia pwukoa kan en irail akan nan mwomwohdiso me sohte mie pwe irail iang doadoahk en kauwada Kingdom Hall kan. Elder kan kak kaunopada mwahu ni arail pahn koasoanehdi mwowe pwe mwomwohdiso en ale epwel mwahu ni ahnsou me ekei tohnmwomwohdiso kohla iang doadoahk en kauwada Kingdom Hall kan. Ni soh peikasalpe, Siohwa kin peren ni atail kin doadoahkpene oh ehu ong kalaudpen doadoahk en Wehio.—Ipru 13:16.
4. Iaduwen kitail kak kangoange irail kan me kin iang doadoahk en kauwada Kingdom Hall kan?
4 Ahneki Lamalam en Ehi: Kauwada wasahn kaudok kin pidada ahnsou laud oh doadoahk laud. Met wehwehki me irail akan me luhk kohwong irail en iang doadoahk wet pahn kohsang nan pein arail mwomwohdiso ekei pak. Kitail en mwadang en kaping oh kangoange irail me kin toukihda arail ahnsou ong doadoahk wet oh wiahda tounmetei kan pwe “doadoahk kesempwal” wet en kak pweida mwahu.—Wiewia 6:3; Rom 14:19.
5. Iaduwen irail kan me kin pein toukihda arail ahnsou ong kauwada Kingdom Hall kan kin toupahrek?
5 En Toupahrek: Kalohki Wehin Koht iei atail doadoahk me keieu kesempwal. (Mark 13:10) Pwehki met, pwihn en kokou ihmw kan (Regional Building Committees) kin nsenohki en koasoanehdi doadoahk kan me irail me toukihda arail ahnsou sohte pahn anahne kohsang arail mwomwohdiso ahnsou koaros. Me pil duwehte met, irail tohndoadoahk pwukat kin nantihong apwalih arail pwukoa kan. Irail kin pein tiengla oh tehk me arail pwukoa kan nan mwomwohdiso epwelpe en kohieng ni arail sohte pahn mie.
6. Dahme kin pweida ni ahnsou me tohnmwomwohdiso kan kin doadoahkpene pwehn utungada kaudok mehlel?
6 Wahnpoaron Pohl kin kasalehda me tohnmwomwohdiso kin doadoahkpene pwe “paliwar unsek kin keirda oh laudla ni limpoak.” (Episos 4:16) Atail limpoak ong Siohwa oh kaudok mehlel kin kamwekid kitail en doadoahkpene pwehn kalohki Rongamwahu oh utungada doadoahk en kauwada Kingdom Hall kan.