En Kekeirda nan Ahmw Doadoahk en Kalohk
1 Samatail nanleng kin ketin kupwurperenki ni ahnsou me sapwellime ladu kan kin kekeirda nan padahk mehlel. Soangen kekeirda me pidada en kekeirda oh wiahla sounkalohk kehlail oh koahiek men. Pohl kangoange Timoty, me wia sounapwalih men, en nantihong wadewadek pwuhk sarawi oh padapadahkih aramas akan pwe aramas koaros en kak kilang eh kekeirda. (1 Tim. 4:13-15) Kitail koaros anahne nantihong en kamwahwihala atail doadoahk en kalohk, mendahte ma kitail wia sounkalohk kei erein ahnsou reirei ehu.
2 Wiahda Pein Ahmw Mehn Akadei: Pwe ke en kekeirda, ke anahne wiahda pein ahmw mehn akadei. Ia ekei mehn akadei kan me kitail kak wiahda ong pein kitail? Kitail ele kak nantihong kitail en koahiekla ni atail kin doadoahngki neitail kedlahs en ngehn, me iei Paipel. (Ep. 6:17) Ele kekeirda ni atail doadoahngki soangsoangen elen kalohk kan me duwehte en kasalehda nsenohki tohnihmw de en ntingihdi ihmw kan me sohte towe. Mwein kitail kak nantihong en koahiekla nan irair en pwurehng pwurala rehn aramas akan me perenki rong. Pil ehu mehn akadei kaselel iei en kekeirda atail koahiek en tepida wia onop Paipel.
3 Koasoandi kan: Mihding kan en mwomwohdiso, mehlel Theocratic Ministry Sukuhl oh Service Mihding, wia koasoandi kei me kin sewese kitail en kak koahiekla nin duwen sounkalohk. Ma kitail nannanti en kaunopada oh iang towehda mihding pwukat oh doadoahngki kaweid kan me kohwong kitail, kitail uhdahn pahn paiekihda laud.—2 Kor. 9:6.
4 Kitail pil anahne sawaspene nanpwungatail pwe kitail en kak kekeirda. (Lep. Pad. 27:17) Ni atail kin rong kanahieng padahk kan me irail kan me iang kitail nan doadoahk en kalohk kin wia, met pahn sewese kitail en koahiekla. Pil ehu, ele atail sounapwalih en pwuhk study kin wia koasoanehdi en kalohk ni ahl me kitail en kak alehdi sawas. Ia uwen eh wia kapai ehu kitail en iang pioneer koahiek men de sounkalohk koahiek teikan me kak sewese kitail en koahiekla oh ahneki peren nan doadoahk en kalohk! Iaduwen, mie sounkalohk kapw nan atail pwihnen pwuhk study? Ele kitail kak pein tiengla mwowe oh luke ih en iang kitail nan kalohk.
5 Doadoahk me keieu kesempwal nan rahnwet iei doadoahk en kalohk. Ni ahnsou me kitail kin kihong Siohwa atail “meirong en kaping,” kitail kin men kihong ih uwen me kitail kak. (Ipru 13:15) Ma kitail nannanti en kekeirda nan doadoahk en kalohk, kitail pahn wiahla tohndoadoahk “me sohte kin namenengki eh doadoahk, me kin padahkihong aramas akan mahsen en Koht ni mehlel.”—2 Tim. 2:15.