Ngoangkihte Omw Doadoahk en Kalohk

KALOHKI rongamwahwo iei doadoahk me keieu kesempwal me wiewiawi nin sampah rahnpwukat. Nin duwen emen sapwellimen Siohwa ladu, ke uhdahn kin wiahki met pwais kaselel ehu en iang wia doadoahk en katohnpadahk. Ahpw ke uhdahn pahn pwungki me pioneer kan oh sounkalohk kan kin ekei pak lelohng kahpwal kan ni arail kin nantihong kolokol arail ngoang nan doadoahk en kalohk.

Ekei sounkalohk kin apwalki rapahkihda emen me re pahn kak koasoakoasoiong nan kalohk en ihmw lel ihmw. Mehlel, pali laud en tohnihmw kan ele sohte kin mi ni imwarail. Ahpw ni atail kin tuhwong irail, ele re sohte pahn men rong rongamwahu en Wehio de re pil kin lemei. Ekei sounkalohk pehm me arail wasahn kalohk nohn laud oh me tohto kin men rong, ahpw re pwunodki me re sohte pahn kanekehla arail doadoahko. Oh ekei tohnmwomwohdiso kin kalokalohk erein sounpar tohto, wereisang me re kasik, oh re kin mworuskihla met.

Ia duwe, e kapwuriamwei me koaros sapwellimen Siohwa aramas akan kin lelohng kahpwal kan me kak katikala arail ngoangki doadoahk en kalohk? Soh. Sohte emen rehtail kin kasik me e mengei en kalohki sapwellimen Koht padahk mehlel duwen komour nan sampah ehu me mi pahn manaman en “Me Suwedo,” Sehdan me Tepil.​—1 Sohn 5:19.

Sohte lipilipil soangen kahpwal dah me ke lelohng ni omw kin kalohki rongamwahwo, kamehlele me Siohwa kak ketin seweseiuk ken powehdi. Ahpw dahme ke kak wia pwehn kalaudehla omw ngoang nan kalohk? Kitail tehkpene ekei sawas kan.

SEWESE ME SOHTE NOHN KOAHIEK

Sounpar koaros, me tohtohie papidaisla nin duwen Sounkadehdehn Siohwa kan. Ma kowe emen me ahpwtehn inoukihong Siohwa omw mour oh papidaisla, ke pahn uhdahn paiekihda soahng kan me lelohng irail kan me kin wia doadoahk en kalohk wereisang uhk. Oh ma ke wia emen sounkalohk en Wehio sounpar tohto, e seu pahn mwahu oh pil wia kapai ehu en sewese kaiahnehda me kapw kan?

Sises mwahngih me sapwellime tohnpadahk ko anahne kaweid pwe ren wiahla sounkalohk koahiek kei oh e ketin kasalehda ia mwomwen doadoahk wet anahne wiawi. (Luk 8:1) Rahnpwukat pil mie anahn en kaiahnehda meteikan pwe ren wiahla sounkalohk koahiek kei.

Kitail en dehr leme me sounkalohk kapw men pahn koahiekla nan padahk ihte sang ni eh kin iang kalohk. E anahne emen me pahn kaiahne ih ni kadek oh limpoak. Soangen kasukuhl wet pahn iangahki en kasalehiong me sohte nohn koahieko ia duwen eh pahn (1) kaunopada oh kamwomwada ehu wiepen padahk, (2) koasoiong tohnihmw men de emen me e tuhwong nanial, (3) kihla pwuhk, (4) pwurala rehn irail kan me men rong, oh (5) tapiada onop en Paipel. Met ele pahn imwila mwahu ma tohnsukuhlo kin kilang oh alasang wiepe kan me me kasukuhliho kin doadoahngki nan kalohk. (Luk 6:40) Sounkalohk kapwo uhdahn pahn perenki emen me kak rong oh sewese ih ma mie anahn pwarada. Sounkalohk me sohte nohn koahieko pahn pil paiekihda kaping oh sawas kan me kohwong ih.​—Ekl. 4:9, 10.

KOASOIONG IENGOMW SOUNKALOHKO

Mendahki ke kin wia uwen omw kak pwehn koasoiong tohnihmw kan, ekei rahn koasoakoasoiong iengomw sounkalohko ni ahnsoun kalohk iei me keieu mwahu. Tamataman me Sises ketin kadarala sapwellime tohnpadahk ko “wad riemen” pwehn kohla kalohk. (Luk 10:1) Ni arail doadoahkpene, re kak kangoange emenemen. Eri omw iang iengomw Kristian men nan kalohk kin wia ahnsou mwahu kumwa en “sawaspene” de kangoange emenemen.​—Rom 1:12.

Soahng dah kan me kumwa ele kak koasoiapene? Mie soahng kan me emen kumwa ahpwtehn lelohng nan doadoahk en kalohk me kak kangoange emenemen? Mie ire ehu me ke diarada me ke perenki nan pein omw onop de onop en peneinei? Mie mehkot me ke rong nan ehu atail mihting kan me kangoange iuk? Ekei pak, ele ke iang sounkalohk men me ke sohte kin kalapw iang nan kalohk. Ke ese ia duwen eh iangala padahk mehlel? Dahme kamehlelehiong ih me met iei sapwellimen Siohwa pwihn? Soangen pwais kaselel dah kan me e ahneki de soahng dah kan me e kin lelohng? Ele ke kak pil ehukihong ih duwen ekei soahng kan me ke kin lelohng ni omw papah Siohwa. Sohte lipilipil ia duwen tohnihmw kan ar mwekidki rongamwahwo, omw iang emen nan kalohk kin wia ahnsou mwahu en “kakehlakahda emenemen.”​—1 Des. 5:11.

WIEWIAHTE OMW KOASOANDI EN ONOP

Pwehn ngoangkihte atail doadoahk en kalohk, e kesempwal kitail en kamwahuiala atail koasoandi en onop oh dehr uhdihsang. “Ladu lelepek oh loalokong” kin wiahda pwuhk kan ni soangsoangen oaralap. (Luk 12:42) Eri mie soangsoangen ire kan me ke kak onopki pwehn alehdi padahk mehlel. Kitail tehkpene ehu ire mwahu me kitail kak doadoahngki nan pein atail onop: Dahme kahrehda doadoahk en kalohki Wehio uhdahn kesempwal? Menlau kilang ekei kahrepe kan nan koakon me oaralap “Dahme Kahrehda Ken Ngoangkihte Doadoahk en Kalohk?”

Atail tehk ire kan nan koakon wet kak kamwakid kitail en ngoangkihte atail kalohk. Ke seu wiahda ehu onop pwehn diarada ia uwen tohtohn kahrepe kan ke kak kilelehdi. Kowe eri doudouloale kahrepe pwukat oh iren Paipel kan me utungada. Omw wia met pahn uhdahn kalaudehla omw ngoangki kalohk.

EN DOADOAHNGKI SAWAS KAN

Sapwellimen Siohwa pwihn kin kaukaule kihda sawas kan me wiawihda pwehn sewese kitail en kamwahuiala atail doadoahk en kalohk. Karasepe, patehng atail kalohk ihmw lel ihmw, kitail ele kin ntingihada kisinlikou kan, doadoahngki delepwohn, kalohk nanial de nan wehi pokon, wasahn pesines kan oh ehukihong aramas akan rongamwahwo ni ahnsou sohte lipilipil. Ele kitail pil kak wiahda atail koasoandi pwe kitail en kak kalohk ni wasa kan me kalohk sohte kin kalapw wiawi.

Ke men ese oh doadoahngki sawas pwukat? Ke songehr doadoahngki ekei soahng pwukat? Me tohto me wiahier met kin perenkihda imwilahn met. Kitail kilang karasepe siluh.

Karasepe keieu kin pidada dahme ehu oaralap sang nan Atail Doadoahk ong Wehio koasoia ong ia duwen en tapiada onop en Paipel kan. E kamwakid sister men me adaneki April en wia onop en Paipel rehn ienge tohndoadoahk silimen. E uhdahn pwuriamweikihla oh perenkihda ni ahnsou me irail koaros pwungkihda en onop reh oh pil tepida towehda mihting kan en mwomwohdiso.

Karasepe keriau kin pidada atail kin kihla neitail makasihn kan. Kangoang kohwong kitail en rapahki aramas akan me pahn mwekidki soangen oaralap kan nan neitail pwuhk kan. Emen sounapwalih me kin seiloak nan Amerika koasoia me nan ehu wasa, e kihong kaun kan en wasahn netiki de wiahda daia koaros neirail Awake! me kosoaia duwen daia kan. Ih oh eh pwoudo pil kihla Awake! me oaralape “Wehwehki Omw Toahkte” ong toahkte tohtohsang meh 100 wasao. E nda: “At kohla wasa pwukat kin uhdahn wia sawas mwahu ehu pwe tohn wasao en esehla kiht oh pil neitail pwuhk kan. Mwurin at esehla emenemen irail, se kakehr pwurala rehrail pak tohto.”

Karasepe kesiluh kin pidada kalohk doadoahngki delepwohn. Emen sister me adaneki Judy ntinglahng poasen kaun en Sounkadehdehn Siohwa kan pwehn kasalehda eh kalahnganki mehn kangoang duwen en kalohk doadoahngki delepwohn. E koasoia me eh nohno me sounpar 86, me ahneki kahpwal en soumwahu tohto, kin kaukaule iang wiepen doadoahk en kalohk wet oh ahneki peren laud ni eh kin onop Paipel rehn lih emen me sounpar 92.

Sawas en wiepen kalohk kan me mi nan neitail pwuhk kan kin kadoadoahk mwahu. Menlau doadoahngki! Soahng pwukat kak seweseiuk ken kolokol omw peren oh ngoang nan doadoahk en kalohk.

WIAHDA MEHN AKADEI KAN ME KE KAKOHNG

Pweida mwahu nan kalohk sohte kin kohsang ihte ia uwen tohtohn pwuhk me ke kihla, uwen tohtohn aramas me kitail kin onop Paipel rehrail, de uwen tohtohn aramas me kitail sewese en wiahla sapwellimen Siohwa ladu. Meh depe likin eh peneinei me Noha sewese pwe ren wiahla sapwellimen Siohwa tohnkaudok? Mendahte sohte, e uhdahn wia sounkalohk men me pweida mwahu. Dahme kesempwal iei me kitail en papah Siohwa ni lelepek.​—1 Kor. 4:2.

Sounkalohk en Wehio tohto diarada me re anahne wiahda mehn akadei kan me re kakohng pwe ren kakairada arail perenki arail doadoahk en kalohk. Ia ekei soahng pwukat? Menlau kilang ekei sawas nan koakon me oaralape koasoia “Wiahda Mehn Akadei kan me Ke Kakohng.”

Peki sawas sang Siohwa oh rapahki ahl kan me pahn kahrehiong omw papah ih en katingihiuk oh ken pweida mwahu. Ni omw lel omw mehn akadei kan, ke pahn perenki me ke pweida mwahu oh ese me ke kin wiewia uwen omw kak koaros pwehn kalohki rongamwahwo.

Mehlel, kalohki rongamwahwo kak apwal. Ahpw mie soahng kan me ke kak wia pwehn wia emen me ngoangki doadoahk en kalohki Wehio. Ehukihpene mehn kangoang kan rehn iengomw sounkalohko, kakairada oh wiewiahte omw koasoandi en onop, doadoahngki sawas kan en ladu lelepeko, oh wiahda mehn akadei kan me ke kakohng. Laudsang met, tamataman me Koht ketikihonguhkehr pwais inenen kaselel ehu en kalohki rongamwahwo nin duwen sapwellime sounkadehde men. (Ais. 43:10) Ia uwen peren me ke pahn ahneki ni omw pahn pousehlahte ngoangki doadoahk en kalohk!