Ia Duwen Atail Kak Sewese me Kapw akan en Kalohk?
1. Ia omw pepehm nin omw tepin iang kalohk?
1 Ke taman tepin ahnsou me ke iang kalohk en ihmw lel ihmw? Sansal me ke saloh. Ma ke iang me kin onop rehmw de emen sounkalohk, sansal me ke perenki eh sawas. Ahpw met ke koahieklahr nin duwen sounkalohk men, ke kakehr sewese me kapw kan nan kalohk.
2. Dahme sounkalohk kapw kan anahne esehla?
2 Sounkalohk kapw kan anahne esehla ia duwen arail pahn tepihada arail koasoi rehn tohnihmw kan, doadoahngki Paipel, pwurehng pwurala rehn tohnihmw kan, oh tepihada oh wia onop en Paipel kan. Irail pil anahne esehla wiepen kalohk teikan me duwehte kalohk nanial oh wasahn doadoahk kan. Ke kak sewese irail en koahiekla nan wasa pwukat sang ni omw mehn kahlemeng oh sawas kan.
3. Ia duwen atail kak sewese sounkalohk kapw kan sang atail mehn kahlemeng?
3 Wia Mehn Kahlemeng Mwahu: Sises ketin kasalehiong sapwellime tohnpadahk ko ia duwen arail pahn kalohk. (Luk 8:1; 1 Pit. 2:21) Ni omw pahn koasoanehdi en iang sounkalohk kapw men, kaunopada ehu padahk mengei me sounkalohko kak idawehn. Mwein ke kak doadoahngki ehu sawas sang neitail sawaspen Paipel kan. Ke kak kalohk ni tepin ihmwo de pil mehn mwurio pwe sounkalohko en kak kilang mwomwen omw padahk. Mwurin ehuehu ihmw, ke kak idek ia eh madamadau duwen omw padahko. Met pahn sewese ih en kilang kesempwalpen iang meteikan kalohk oh e pahn pil mengei ong ih en ale sawas kan me ke pahn kihong mwurin e wia eh padahk.
4. Ia duwen atail kak sewese sounkalohk kapw men mwurin atail rong eh padahk?
4 Kihda Sawas: Sises pil ketikihong sapwellime tohnpadahko kaweid kan duwen kalohk. (Mad. 10:5-14) Ke pil kak sewese emen sounkalohk kapw ni ahlohte. Ni ahnsou me e pahn koasoi, rong kanahieng. Mwurin eh padahk, kapinga ih ni mehlel mehnda ma mie wasa kan me e anahne kamwahwihala. Mwohn ke pahn kihong ih sawas, ke kak kilang ma e pahn kamwahwihala wasa kan me konehng ni eh pahn pwurehng wia eh padahk. Mwein e salohda. Pil tamataman me kaidehn sounkalohk koaros kin ahneki soangen koahiek tehieu oh me mie soangen wiepe mwahu teikan me kak kadoadoahk nan kalohk.—1 Kor. 12:4-7.
5. Dahme kitail kak nda ni atail kin kihda sawas?
5 Ekei pak sounkalohk kapw men pahn idek omw sawas. Ahpw ma e sohte wia met, sewese ih. Ia duwen omw kak wia met ni ahl me konehng? Ekei sounkalohk koahiek kan kin nda, “I kak nda mehkot?” de “Ia iren padahko?” Pil ehu iei, “Ni ahnsou me I ahpwtehn iang kalohk, I diar me e apwal en . . . , ahpw dahme sewese ie iei . . .” Ekei pak e mwahu en kilangpene pwuhk en Reasoning (lokaiahn wai) de Atail Doadoahk ong Wehio. Kihda ehute sawas duwen eh padahko pwe ke dehr kansensuwedihala ih.
6. Me pid duwen kalohk, ia duwen “mete eh kin edehda mete”?
6 Mete Eh Kin Edehda Mete: Timoty me wia sounkalohk koahiek men, ale kangoang sang Pohl en nantihongete kamwahwihala eh padahk oh kekeirda. (1 Tim. 4:13, 15) Mehnda ma sounparehr tohto ke iang kalohk, ke dehr uhdihsang omw nantihong kamwahwihala omw koahiek. Sukuhl sang sounkalohk kan me ke iang mehnda ma re kapw sang uhk oh nantihong sewese meteikan ni kadek ahpw keieu me kapw kan en wiahla sounkalohk koahiek kei en rongamwahwo.—Lep. Pad. 27:17.