Kalaudehla Atail Koahiek nan Doadoahk en Kalohk—Kaiahnehda me Kapw kan

Dahme Kahrehda Kesempwal: Sapwellimen Sises tohnpadahk kapw kan anahne sukuhlki en peikiong “mehkoaros” me e ketin kehkehlingki, iangahki padahkihong meteikan padahk mehlel. (Mad. 28:19, 20) Tohto me kapw kan warohng en iang Sukuhl ong Sapwellimen Koht Doadoahk oh ele re pil kin kalohk ong arail peneinei kan de kompoakparail kan. Ahpw, ni arail kakairada arail kalahnganki mehkan me re sukusukuhlki oh wehwehkihla me Siohwa ketin kupwurki aramas koaros en rong rongamwahwo, ele re pahn men iang doadoahk en kalohk. (Rom 10:13, 14) Ni ahnsou me irail me kapw kan pilipilda en wiahla sounkalohk kan me saikinte papidais, kaiahn mwahu pahn sewese irail en kak eimah ni ar wia kahk kesempwal wet en deila nan arail nanpwungmwahu rehn Siohwa.—Luk 6:40.

Ia Duwen Omw Pahn Wia Met:

Sewese sounkalohk kapwo en ale pwuhk kan me e pahn anahne nan kalohk oh katohnpadahk. Kasalehiong ih ia mwomwen omw kin koasoanehdi omw kopwoun kalohk, oh kawehwehda kahrepen omw kin doadoahngki ehuehu pwuhk me ke wahda.
Pilada ehu kisin wiepen padahk kan sang nan Atail Doadoahk ong Wehio oh kumwa ehupene oh praktis. Kangoange me kapwo en doadoahngki pein eh lokaia ni eh wia kamwomwada. Kamwomwada dahme kin kalapw wiawi nan omw wasahn kalohk, ni omw doadoahngki iren sawas kan sang pwuhken Ministry School nan pali 82. Kasansalehda kesempwalpen likou oh kapwat me konehng.—2 Kor. 6:3, 4.
Kihda kaiahn me kak kakairada sounkalohk kapwo. Kasalehiong sounkalohk kapwo kisin doaropwehn wasahn kalohk kan oh padahkihong ih ia mwomwen eh pahn ntingihedi eh doadoahk en kalohk en ihmw lel ihmw. Kamwomwada ia duwen eh pahn kin ntingihedi oaritik kan me pid irail kan me men rong. Padahkihong ih mwomwen eh pahn doadoahngki jw.org nan doadoahk en kalohk pil iangahki kisin pwuhk Good News for People of All Nations. Sewese ih en kalaudehla ahn aramas akan me e tuhwong me perenki rong en kekeirda.—1 Kor. 3:6.
En kin kanengamahiong oh kapinga ih ni ahnsou me konehng. (Lep. Pad. 15:23) Kasalehda mehn kahlemeng mwahu. Omw ngoang oh kasalehda nsenohki ih pahn kangoange ih erein ahnsou werei.

Song Wia Met Erein Sounpwongo:

Iang noumw tohnsukuhlo nan doadoahk en kalohk en ihmw lel ihmw oh kahre ih ni omw pwurehng pwurala rehn me perenki rong de ni ehu omw onop en Paipel. Ma sohte noumw tohnsukuhl en Paipel men, luke emen sounkalohk me sohte nohn koahiek en iang uhk nan kalohk.