Koasoanehdi Mehn Akadei Ngehnin kan
1 E pahn wia pwais kaselel ieu en kapinga Siohwa kohkohlahte! Pwehn sewese kitail en lel mehn akadei wet, kitail anahne koasoanehdi ong pein kitail mehn akadei kan me kitail kak lel ni ahnsou keren kan oh kitail en nantihong lel mehn akadei pwukat. Met kin sewese kitail en doadoahngki atail kehl ni loalokong. (1 Kor. 9:26) Mehnia mehn akadei kan pahn mwahu ong uhk?
2 Onop Paipel: Ke kin kaunopada ong mihding kan koaros? Ma iei, ke kin koasoanehdi ahnsou ong research oh doudouloale ahnsou me ke onop? Karasepe ieu, ni ahnsou me ke kin kaunopada ong Onop en Kahn Iroir oh pil Pwuhk Study en Mwomwohdiso me kin wiawi wihk koaros, ke kin ihte lain pasapeng kan de ke kin kilang iren Paipel kan oh doudouloale duwen kahrepe kan me kawehwe kan kin kohda? Ke kak wiahda ahmw mehn akadei en research ekei ire kan sang nan wadawad en Paipel erein wihk kan ong Theocratic Ministry Sukuhl? Mehlel, wia research kin duwehte “weir nan pwehl” ni pali ngehn pwe e kin wehwehki kitail pahn wia doadoahk laud oh doadoahngki atail ahnsou laud, ahpw kitail pahn dolung kapai tohto ni pali ngehn.—Lepin Padahk 2:4, 5.
3 Mihding kan en Mwomwohdiso: Pil ehu mehn akadei iei en kaukaule iang towehda mihding limau koaros. Ken mwadang lel Kingdom Hall mwohn mihding pwehn kak miniminiong tohnmwomwohdiso teikan oh iang mwomwohdiso koulki tepin koul oh kapakap pwe met kin kakehlailih tohnmwomwohdiso kan. Kitail pil kak akadeiong iang pasapeng ni ehuehu mihding oh nantihong kamwahuwihala atail pasapeng kan. Mwein ke kak kasalehda iaduwen iren Paipel ehu me mihmi nan parakrap kin pid duwen mour en parakrapo de iaduwen kitail kak doadoahngki ireo nan atail mour.—Ipru 10:24, 25.
4 Kalohk: Ma kitail wiahda mehn akadei kan, kitail pil kak kamwahuwihala atail kalohk. Ke kin koasoanehdi ekei awa kan pwehn iang kalohk ehuehu sounpwong? Ekei kin diarada me wiahda mehn akadei kan ong kalohk kin wia sawas laud. De ke kak kamwahuwihala ehu wiepen kalohk, duwehte: ke kak kalaudehla ahmw doadoahngki noumw Paipel nan kalohk en ihmw-lel-ihmw, de ke kak wia return visit kan me katapan, de ke kak tepida Paipel study kapw, de ke kak koahiekla ni ahmw pahn padahk ni ahnsou me ke kin onop rehn aramas akan?
5 Kumwail pahpa oh nohno kan, kumwail kin kangoange noumw seri kan en koasoanehdi mehn akadei kan pwehn papah Siohwa? Sewese irail en wehwehki me papah Siohwa nin duwen pioneer men, de misineri men de emen me kin iang peneinei en Bethel iei ahl akan me irail kak kasalehda uwen loal en arail kalahngan ong Siohwa.—Ekl. 12:1.
6 Ni atail kin kasawihada atail wiewia kan, kitail en koasoanehdi mehn akadei ngehnin kan, oh doadoahk pwehn kak lel mehn akadei pwukat, kitail pahn kak ahnekihda peren laud nan atail kalohk oh kitail pahn kangoange meteikan.—Rom 1:12.