Kumwail me Pwulopwul kan—Ia Amwail Mehn Akadei Ngehnin kan?
1 Siohwa kin wehwehki ia uwen kesempwal doadoahk katapan kan oh mehn akadei kan me ke kin lelong kin wahdo peren. (Kilang Senesis 1:28; 2:15, 19.) Rahnwet, Siohwa kihong sapwellime aramas doadoahk ehu—doadoahk en kalohk oh padahkiong aramas me mehlelo. Kitail pil anehki mehn akadei kaselel ehu—en ale mour soutuk nan paradais. Sang met kohla, kitail anahne wiahda mehn akadei kan me pahn sewese kitail en kekeirada ni pali ngehn pwe met pahn sewese kitail en dehr doadoahngki atail kehl ong mehkot me mwahl.—1 Korint 9:26.
2 Mehn Akadei kan me Irail me Pwulopwul kan Kak Kapwaiada: Me pwulopwul kan anahne wiahda mehn akadei ngehnin kan me irail kak kapwaiada. Emen emen wukpeseng, eri, e anahne kasawiada pein eh irair kan pwehn kilang soangen mehn akadei kan me pein ih kak wiahda oh pein ih kak kapwaiada. (1 Tim. 4:15) Mwohn arail ese wadawad, ekei pwulopwul kan kapwaiadaier arail mehn akadei en wadlikihla pwuhk kan en Pwuhk Sarawi. Oh pil, sang arail peneinei kin onoppene Pwuhk Sarawi oh sawaspen Pwuhk Sarawi kan, irail me pwulopwul kan kak sukuhliki en kaunopada ong mihding kan oh met kin sewese irail en kaunopada arail pasepeng kan oh kaunopada arail padahk kan nan Theocratic Ministry School. Ni ahnsou me seri kan kin iang arail pahpa oh nohno kan nan kalohk, irail kak kalohk ong mehteikan oh akadeiong wiahla sounkalohk men me saikinte pepdais. Pahpa oh nohno kan pahn nantiong en sewese neirail seri kan en akadeiong inoukihong arail mour ong Koht oh pepdaisla.
3 Ma kowe emen mwahnakapw de peinakapw, ia ahmw mehn akadei ngehnin kan? “Tamanda Sounwiepomw” ni ahmw kin medemedeweong ahmw mehn akadei kesempwal kan nan mour. (Eklesiasdes 12:1; Melkahka 71:17) Dahme ke soh auxiliary pioneer ansoun kommoal en sukuhl? Mie pak ke medemedewe duwen doadoahk en regular pioneer? Iaduwen sukuhliki ehu lokaia tohrohr pwehn sewese pwihn kan me kin kalohk ong aramas me lokaiahki lokaiahn sahpw liki kan de mwomwohdiso nan ahmw wasa de pil ehu wasa tohrohr? Pali moron en irail me doadoahk nan Bethel de doadoahk en soundoulik kan de doadoahk en misineri kan kin men iang doadoahk pwukat sangete ahnsou me irail pwulopwul oh kin wie sukusukuhlte. Dahme ke soh pil akadeiong soahng pwukat?
4 Ni ahnsou me ke pwulopwulte, song en idawehn mehn kalemeng en Sises. Edetehn eh sounpahr 12te, e kin koasoi ni saledek duwen ire ngehnin kan. (Luk 2:42-49, 52) Wiahda mehn akadei mwahu kan ong pein uhk duwehte wia pein ahmw onop, wadek Paipel rahn koaros, werekiong iengatail me mah kan ni pali ngehn ahnsou koaros nan mihding kan oh pil nan kalohk pwe ren sewese uhk en koahiekla ni ahmw kin padahkiong mehteikan duwen Wehin Koht duwehte me Sises kin wia.