Iaduwen Ahmw Kak Lel Ahmw Mehn Akadei kan en Pali Ngehn
1. Soangen mehn akadei en pali ngehn dah kei me pwulopwul kan kin ahneki?
1 Nin duwen Kristian pwulopwul men, e sansal me ahmw mehn akadei kan nan mour kin pidada ahmw limpoak ohng Siohwa oh sapwellimen Sises mahsen kan ohng Kristian koaros en ‘rapahki mahs Wehio.’ (Madiu 6:33) Ele mwein ahmw mehn akadei iei en kalaudehla ahmw ahnsoun kalohk sang ni ahmw pahn papah nin duwen pioneer men de kohla sawas wasa kan me mie anahn laud. Ekei ele kin medemedewe en pein toukihda arail ahnsou en iang pwihn en international construction work me kin wia doadoahk en kauwada ihmw sarawi kan nan sampah pwon, de ekei kin men iang doadoahk nan Branch Ohpis de wia doadoahk en misineri. Ia uwen mehn akadei pwukat arail kin pweida mwahu oh wia mehn kaping!
2. Dahme kak sewese iuk en lel ahmw mehn akadei kan ni pali ngehn?
2 Mehn sawas me kak sewese iuk en lella ahmw mehn akadei kan ni pali ngehn iei en ntingihdi ahmw mehn akadei kan. Watchtower (lokaiahn wai) en July 15, 2004 koasoia: “Elen madamadau soh sansal ehu kin sansalda mwahu oh wehwe mwahu ni ahmw pilada mwahu lokaia kan pwehn kawehwehda elen madamadau wet. Mwein ke pahn men mehlel ohng ahmw mehn akadei kan oh ntingihdi nan doaropwe ahl akan me ke pahn kak lel ahmw mehn akadei kan.” Pil patehng met, mehn akadei ohng kisin lepin ahnsou kis kak sewese iuk en kekeirada ni pali ngehn oh dadaur pwe ke en kak uhd kilangwohng mehn akadei ohng ahnsou werei kan.
3. Kasalehda ekei mehn akadei ohng ahnsou mwotomwot kan me pahn kak sewese iuk en kaunopada ong papidaisla.
3 Mehn Akadei kan ohng Ahnsou Mwotomwot: Ma ke saikinte papidais, medewe dahme ke kak wia pwehn kak lel mehn akadei wet. Mwein ke pahn anahne sukuhliki oh wehwehkihla padahk mengei kan en Paipel. Ma ke men wia met, ke kak akadeiong onop pwuhken Bible Teach oh wadek iren Paipel kan loale. (1 Timoty. 4:15) Wiahda ahmw mehn akadei en wadekala Pwuhk Sarawi pwon tepida sang nan pwuhken Senesis lel Kaudiahl, duwehte me irail tohn Bethel oh tohnsukuhl en Gilead kan kin wia. Mwurin met, kaukaulehte wia ahmw wadawad. (Melkahka 1:2, 3) Medewehla ia uwen met ah pahn sewese iuk en kekeirada ni pali ngehn! Tepikihda oh kaimwisekihla ahmw wadawad en Paipel de onop ki kapakap sang nan mohngiong, oh ahnsou koaros rapahki ahl akan en kapwaiada dahme ke sukuhliki.—Seims 1:25.
4. Soangen mehn akadei ohng ahnsou mwotomwot dah kan me Kristian men me ah mehn akadei en ahnsou reirei iei en kohla Bethel de wia misineri anahne en wiahda?
4 Ma ke papidaislahr, ia ekei mehn akadei kan me ke kak nantihong en lel? Ke anahne kamwahuwihala mwomwen ahmw kin padahk? Karasepe, ke kak wiahda ahmw mehn akadei en kak koahiekla ni ahmw pahn kin doadoahngki Mahsen en Koht nan doadoahk en kalohk? (2 Timoty 2:15) Iaduwen ahmw pahn kak kalaudehla ahmw ahnsoun kalohk? Wiahda ni oaritik mehn akadei kan ohng ahnsou mwotomwot me pahn pwungiong ahmw sounpahr oh irair oh me pahn sewese iuk en lel ahmw mehn akadei en ahnsou werei kan.
5. Iaduwen wiahda mehn akadei en ahnsou mwotomwot kan sewese emen brother en lel ah mehn akadei en ahnsou reirei me iei en iang pahpa nan Bethel?
5 Koasoi Duwen Pweida: Ni ahnsou me Tony, emen pwutak me sounpar 19 mwemweitla ni ehu Branch Ohpis en Sounkadehde en Siohwa kan, e ahnekihda pepehm en men papah nan Bethel ehu rahn. Mendahki met, ah elen mour sohte pwung oh e saikinte pil inoukihong Koht ah mour. Tony eri koasoanehdi en kawekila ah mour pwe en pwungiong kupwuren Siohwa oh e wiahda ah mehn akadei en papidaisla. Mwurin ah lelehr ah mehn akadei wet, e uhd iang doadoahk en Auxiliary Pioneer oh mwuri Regular Pioneer oh e kin ntingihdi nan nah calender rahn akan me e men tepida wia mehn akadei pwukat. Medewehla duwen peren laud me e ahneki ni ahnsou me luhk kohwong ih en iang doadoahk nan Bethel mwurin ah iangehr doadoahk en pioneer erein ahnsou ehu.
6. Dahme kak sewese iuk en lel ahmw mehn akadei kan en pali ngehn?
6 Ke pil kak lel ahmw mehn akadei ni pali ngehn ni ahmw pahn mwohneki mahs Wehin Koht. Kolokol “ahmw doadoahk mwahu” mwohn Siohwa ki kapakap oh nantihong en lel ahmw mehn akadei kan.—Lepin Padahk 16:3; 21:5.
[Peidek en Onop]