Pwutak Eimah Men me Pohl Pahn Naineki

Kitail pahn sukuhlki duwen pwutak men me kauhdi aramas en dehr kemehla ohl emen me e pahn pahpahki. Ohlo iei wahnpoaron Pohl. Kitail sehse eden pwutak menet, ahpw kitail ese me e wia mehkot me uhdahn eimah. Ke men rong duwen dahme e wia?—

Pohl mihmi nan kalapwuhs nan Serusalem. E selidi pwehki e kin kalohkiseli duwen Sises. Ohl suwed kei kailongki Pohl, eri re wiahda pilahn mwersuwed ehu. Irail koasoia: ‘Kitail pahn peki rehn kaun en sounpeio en padahkihong nah sounpei kan en wahla Pohl ni mwoalen kopwung. Kitail pahn rukula limwahn ahl, oh ni ahnsou me Pohl pahn keid wasao, kitail pahn kemehla ih!’

Pwutak me Pohl pahn nainekio rongada duwen pilahn wet. Dahme e pahn wia? E kohla ni kalapwuhso oh padahkihong Pohl duwen met. Ni ahnsowohte, Pohl ndahng en padahkihong kaunen sounpeio duwen pilahn mwersuwed wet. Ke leme e mengei ong pwutak menet en koasoiong kaunen sounpeio?— Soh, pwe kaunen sounpeio ohl kesempwal men. Ahpw pwutako eimah oh koasoiong ohl menet.

Kaunen sounpeio ese dahme e pahn wia. E ale sounpei 500 pwehn pere Pohl! E padahkihong irail en wahlahng Pohl Sesaria pwongohte. Ia duwe, Pohl pitila?— Ei, ohl suwed ko sohte kak kemehla ih! Arail pilahn mwersuwedo sohte pweida.

Dahme ke kak sukuhlki sang met?— Ke pil kak eimah duwehte pwutak me Pohl pahn nainekio. Kitail anahne eimah ni ahnsou me kitail kin koasoiaiong meteikan duwen Siohwa. Ke pahn kin eimah oh koasokoasoia duwen Siohwa?— Ma ke wia met, mwein ke pahn kapitala ahn emen eh mour.