Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • w07 8/1 pp. 23-27
  • Pwulopwul Kan—En Rapahki Mehn Akadei Kan Me Kin Kawauwih Koht

Sohte kasdo ong met

Kupwurmahk, mehkot sapwung en kihda kasdo

  • Pwulopwul Kan—En Rapahki Mehn Akadei Kan Me Kin Kawauwih Koht
  • Kahn Iroir Pakpakairki Wehin Siohwa—2007
  • Sawaspen Oaralap kan
  • Ire kan me Duwehte Met
  • Ahn Timoty Irair en Keirada
  • Kamwahu Sang Sawas Kangoang kan
  • Onopki “Pwuhk Sarawi”
  • “Weirentang en Pwoson”
  • Kolokol Mehn Akadei kan en Pali Ngehn
  • Kapai kan Ahnsouwet oh Pil Ahnsou Kohkohdo
  • Timoty Men Sewese Aramas kan
    Padahki Noumw Seri
  • Pohl oh Timoty
    Mehn Kasukuhl kan me Ke Kak Sukuhlkihsang Paipel
  • Wiahda oh Lel Mehn Akadei kan ni Omw Papah Siohwa
    Kahn Iroir Pakpakairki Wehin Siohwa (Ong Onop)—2022
  • Ohl kan me Idihdida—Sukuhlkihsang Timoty
    Kahn Iroir Pakpakairki Wehin Siohwa (Ong Onop)—2018
Kilang Pil Ekei
Kahn Iroir Pakpakairki Wehin Siohwa—2007
w07 8/1 pp. 23-27

Pwulopwul Kan—En Rapahki Mehn Akadei Kan Me Kin Kawauwih Koht

“Usehlahte kaiakaiahnih pali ngenomw pwe omw mouren [Kristian] en mwahu.”—1 TIMOTY 4:7.

1, 2. (a) Dahme kahrehda Pohl kin kapinga Timoty? (b) Iaduwen me pwulopwul kan rahnwet kin ‘usehlahte kaiakaiahnih pali ngenarail pwe arail mouren Kristian en mwahu’?

“IHETE me duwehte ngehi me kin nsenohkin kumwail. . . . Pwe se kin doadoahkpene pwehki rongamwahu, rasehng pahpa oh nah pwutak.” (Pilipai 2:20, 22) Wahnpoaron Pohl kapatahiong koasoi en kaping mwahu wet nan nah kisinlikou ong Kristian kan en keieun senturi nan Pilipai. Ong ihs me e kin koaskoasoia? Ong ienge me pwulopwul Timoty, me kin iang ih seiloakseli. Medewehla ia uwen kamehlelpen en Pohl ah limpoak oh likilik eh kin kansenamwahuwih mohngiong en Timoty!

2 Irail me pwulopwul kan me kin nsenohki arail pali ngehn duwehte Timoty kin ahnsou koaros wia ekei me inenen kesempwal nanpwungen sapwellimen Siohwa aramas kan. (Melkahka 110:3) Rahnwet, sapwellimen Koht pwihn kin paiekihda irail me pwulopwul tohto me kin wia doadoahk en pioneer, misineri, me kin toukihda arail ahnsou en kauwada ihmw, oh pil wia tohn doadoahk kan nan Bethel. Kaping laud pahn pil kohwong irail kan me kin ngoangki iang wia pwukoahn mwomwohdiso kan oh pil ahnsowohte ahneki pwukoa teikan. Irail pwulopwul pwukat kin perenki nsenamwahu mehlel me re alehdi sang arail kin rapahki mehn akadei kan me kin kawauwih Samatail nanleng Siohwa. Irail kin ni mehlel “usehlahte kaiakaiahnih pali [ngenarail] pwe arail mouren [Kristian] en mwahu.”—1 Timoty 4:7, 8.

3. Mehnia peidek kan me kitail pahn tehkpene nan artikel wet?

3 Nin duwen emen me pwulopwul, ke kin nantihong en lel ehu ehu ahmw mehn akadei kan? Ia wasa ke pahn diar sawas oh kangoang pwe ken kak wia met? Iaduwen ke kak pelianda kasongosong kan en sampah noahrok wet? Soangen kapai dah kan ke pahn dolung ma ke pahn rapahki mehn akadei kan me kawauwih Koht? Kitail en rapahki pasapeng en peidek pwukat ni atail pahn tehkpene duwen mouren Timoty oh duwen ah doadoahk.

Ahn Timoty Irair en Keirada

4. Ni mwotomwot kawehwehda en Timoty mour nin duwen Kristian men.

4 Timoty tikida nan Listra, kisin kahnihmw en Rom nan wasa me adaneki Kalesia. Mwein e tepida esehla Kristian akan ni eh pwulopwul ahnsou me Pohl kin padapadahk nan Listra nan pahr 47 C.E. Timoty kin mwadang en alehdi adamwahu nanpwungen irail Kristian brother kan. Ni ahnsou me e pwurala Listra mwurin sounpar riau, Pohl pilada Timoty en iang ih papah nin duwen ienge misineri men, ni eh rongada duwen eh kin wie kekeirada. (Wiewia 14:5-20; 16:1-3) Ni en Timoty kin kekeirada oh koahiekla, e pil ahnekihdi pwukoa laud kan me iangahki pwukoa kesempwal en kakehlahda brother kan. Ni ahnsou me Pohl ntingda rehn Timoty sang nan imweteng en Rom nan pahr 65 C.E., Timoty kin wie papah nin duwen Kristian elder men nan Episos.

5. Nan 2 Timoty 3:14, 15, ire mehlel riau dah me kamwekid en Timoty pilipil en rapahki mehn akadei kan en pali ngehn?

5 E kin sansal mwahu me Timoty kin pilada en rapahki mehn akadei kan en pali ngehn. Ahpw dahme kin kahrehiong ih en wia met? Nan nah keriau kisinlikou ong Timoty, Pohl koasoiahda ire mehlel riau me kasalehda duwen met. E ntingihdi: “Ke en nantihong ni me mehlelo me ke padahngkiher oh uhdahn kamehlele. Pein kowe ese ihs me omw sounpadahk, oh ke pil ese me sang ni omw kisin seri ke pil kin ese Pwuhk Sarawi.” (2 Timoty 3:14, 15) Keieu kitail en tehkpene pwukoahn emenemen irail Kristian kan me kin sewese kangoange Timoty en wiahda eh pilipil kan.

Kamwahu Sang Sawas Kangoang kan

6. Kasukuhl dahieu Timoty alehdi oh iaduwen e kin mwekidki?

6 Timoty tikida nan ihmw ehu me sohte kin miniminpene pwehki arail palien lamalam. Semeo mehn Krihk oh ah nohno Iunis oh nohno kahlap Lois mehn Suhs. (Wiewia 16:1) Iunis oh Lois kin padahkiong Timoty sang ni eh kisin seri padahk mehlel kan en Pwuhk Sarawi en Ipru. Mwurin ira wiahla Kristian kei, kitail kak kamehlele me ira kakete kin sewese ih en kamehlele padahk kan en Kristian. E sansal me Timoty kin isaneki en alehda kasukuhl inenen mwahu wet. Pohl ntingihdi duwen met: “I tamataman pwoson mehlel me ke ahneki, soangen pwoson me omw nohno kahlap Lois oh omw nohno Iunis pil ahnekier. I uhdahn ese me ke pil ahneki soangen pwosonohte.”—2 Timoty 1:5.

7. Kapai dahieu me pwulopwul tohto kin perenki oh iaduwen met kak wia kamwahu ong irail?

7 Rahn pwukat, tohto irail me pwulopwul kan kin paiekihda pahpa oh nohno kan oh pil pahpa kahlap de nohno kahlap akan me kin lemmwiki Koht, me duwehte Lois oh Iunis me kin wehwehki kesempwalpen ahneki mehn akadei kan en pali ngehn. Karasaras en Samira me kin tamatamante ni ahnsou me e pwulopwul ah kin koasoakoasoi ni ahnsou reirei rehn ah pahpa oh nohno, koasoiahda: “Pahpa oh Nohno kin padahkiong ie en kin ahneki soangen madamadauohte me Siohwa kin sapwellimanki ong duwen soahng koaros oh en kin pil mwohneki doadoahk en kalohk. Ira kin ahnsou koaros kangoange ie en wia doadoahk en kalohk kaukaule.” Samira kin pweida mwahu ni eh mwekidki kangoang sang eh pahpa oh nohno oh ahnsou wet e kin perenki eh pwukoa tohrohr en wia kisehn peneinei en Bethel nan wehi me e kin kousoan. Ma ahmw pahpa oh nohno kin kangoange iuk en kesempwaliki mehn akadei kan en ngehn, ken kin medemedewe mwahu duwen ara kaweid. Ira kin inenen nsenohki pwe ahmw mour en pweida mwahu oh kaperen.—Lepin Padahk 1:5.

8. Iaduwen Timoty kin alehdi kamwahu kan sang ahneki kompoakepah kangoang kan en Kristian?

8 E pil kesempwal ong uhk en rapahki rehn riatail Kristian brother kan soangen kompoakepah me pahn kakehlailih iuk. Timoty kin wia emen me Kristian elder kan nan eh mwomwohdiso kin esehla , oh pil irail kan nan Aikoniomw me mihmi dohsang irail ki mwail 20 samwa pil kin esehla ih. (Wiewia 16:1, 2) E kin inenen karanih ong Pohl, emen me kin ngoang oh pwerisek. (Pilipai 3:14) Nein Pohl kisinlikou kan kin kasalehda duwen Timoty eh kin men ale peneu kan oh kin mwadang en idawehn mehn kahlemeng kan en pwoson. (1 Korint 4:17; 1 Timoty 4:6, 12-16) Pohl ntingihdi: “Eri, ke idawehnehr ei padahk, ei wiewia, oh pil kahrepen ei mour nan mour wet; ke kilangehr duwen ei pwoson, ei kanengamah, ei limpoak, ei kin nannanti ni ahnsou apwal akan.” (2 Timoty 3:10) Ei, Timoty kin idawehn en Pohl mehn kahlemeng mwahu kan koaros. Pil duwehte, ma ke kin karanihala emen nan mwomwohdiso me kin kehlail ni pali ngehn, ke pahn alehdi sawas en kekeirada ahmw mehn akadei mwahu kan en pali ngehn.—2 Timoty 2:20-22.

Onopki “Pwuhk Sarawi”

9. Likin pilada werek mwahu kan, dahme ke pahn anahne wia pwe ken ‘usehlahte kaiahne pein ahmw pali ngehn pwe ahmw mour en Kristian en mwahu’?

9 E anahne en pilada soangen werek mwahu te pwe ken lel ahmw mehn akadei kan en pali ngehn? Soh. Duwehte Timoty, ke anahne tehk mwahu “Pwuhk Sarawi.” Mwein onop kin wia mehkot me ke sohte perenki ahpw ke en tamataman me Timoty kin ‘usehlahte kaiahne pein ah pali ngehn pwe eh mour en Kristian en mwahu.’ Soun mwadong kan kin kalap ale kaiahn apwal erein sounpwong kei pwe ren kak lel arail mehn akadei kan. Pil duwehte, en lel mehn akadei en pali ngehn kin anahne ngenen tounmetei oh ngoang en doadoahk laud pwe en pweida. (1 Timoty 4:7, 8, 10) Mwein ke kin idek, ‘ahpw iaduwen onopki Paipel kin sewese ie en lel ahi mehn akadei kan?’ Kitail pahn tehkpene ahl siluh.

10, 11. Dahme kahrehda Pwuhk Sarawi kak kamwekid uhk en lel ahmw mehn akadei en pali ngehn? Kihda karasaras.

10 Keieu, pwuhk sarawi kin ketikihda kaweid kan me kin kamwekid kitail ni pwung. Ire kan kasalehda irair kaselel en Samatail nanleng, sapwellime wiewia en limpoak keieu laud ong kitail, oh sapwellime kapai kaperen kan me e nekinekid ong sapwellime ladu lelepek kan. (Eimwos 3:7; Sohn 3:16; Rom 15:4) Ni ahmw loalokongkihla Siohwa kin lalaudla, iei duwen ahmw limpoak ong ih oh ahmw ineng en inoukihda ahmw mour ong ih pahn pil lalaudla.

11 Tohto Kristian pwulopwul kan kin koasoia me e kin kesempwal en wia pein arail onop en Paipel pwe met kin sewese irail en pein alehda padahk mehlel. Karasepe ehu, Adele tikida nan peneinei en Kristian ehu ahpw eh sohte pak ehu kin wiahda mehn akadei en pali ngehn. E kin koasoia, “Ahi pahpa oh nohno kin wahiehla nan Kingdom Hall ahpw I sohte kin wia pein onop de rongorong nan mihding kan.” Mwurin rie serepein laudo papidaisla, e ahpw tepida nsenohkihla onopki padahk mehlel. E koasoia: “I tepida pwe en wadekala Paipel pwon. I kin wadek ekis oh ntingihdi koasoi kan duwen dahme I wadekehr. I kolokolete koaros nei lepin nting kan. I wadekala Paipel pwon nan erein pahr ehu.” Met kahrehiong Adele en inoukihong ah mour ong Siohwa. Mendahki e ahneki kahpwal en paliwar, met e wiahier pioneer men, de me kin wia doadoahk en kalohk kaukaule.

12, 13. (a) Ia wekidekla kan me Paipel pahn kak sewesehki emen me pwulopwul en wia, oh iaduwen? (b) Kihda karasaras en kupwurokong de erpit me mihmi nan Mahsen en Koht.

12 Keriau, Paipel pahn sewese iuk en wia wekidekla anahn kan en ahmw irair kan. Pohl ndaiong Timoty me “Pwuhk Sarawi” kin “mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.” (2 Timoty 3:16, 17) En kin kaukaule medemedewe oh doudouloale mahsen en Koht oh kadoadoahki tiahk mwahu kan me Paipel kaweidki, ke pahn mweidohng ngehn en Koht en kamwahuiala pein ahmw irair. Met pahn sewese iuk en kekeirada irair kaselel kan me duwehte karakarahk, poadidi, pwerisek oh ahneki limpoak mehlel ong iengetail Kristian kan. (1 Timoty 4:15) Timoty kin ahneki irair pwukat koaros oh mepwukat kin kahrehiong ih en wia aramas men me Pohl oh pil mwomwohdiso kan me e kin papah en paiekihda.—Pilipai 2:20-22.

13 Kesiluh, Mahsen en Koht wia wasahn nekinekid kupwurokong de erpit. (Melkahka 1:1-3; 19:7; 2 Timoty 2:7; 3:15) E pahn sewese iuk en pilada werek mwahu kan, mehn kamweit mwahu kan, oh en ese iaduwen en powehdi kahpwal laud kan. (Senesis 34:1, 2; Melkahka 119:37; 1 Korint 7:36) En wiahda pilipil loalokong kan ahnsou wet kin kesempwal ong kapwaiada ahmw mehn akadei kan en pali ngehn.

“Weirentang en Pwoson”

14. Dahme kahrehda e sohte wia ahl mengei ehu en rapahki mehn akadei kan en pali ngehn?

14 En kin mwohneki mehn akadei kan me kin kawauwih Siohwa iei ahl en erpit me keieu mwahu, ahpw e sohte wia mehkot mengei. Ni ahmw pahn wiahda pilipil en doadoahk, ele ke pahn lelong kalokolok kan sang ahmw peneinei kan, iengomw kan oh irail sounpadahk kan me kin kamehlele me ahneki sukuhl laud oh doadoahk pweilaud kan iei ahl en pweida mwahu oh wahdo peren mehlel. (Rom 12:2) Pwe en duwehte Timoty, ke pahn anahne “tangowei uwen omw kak nan weirentang en pwoson,” pwe ke pahn kak “kalowehdiong uhk mour soutuk,” me Siohwa kin ketin kolokol ong uhk.—1 Timoty 6:12; 2 Timoty 3:12.

15. Uhwong dahieu me Timoty mwein lelong?

15 Kasongosong kin inenen apwal ahnsou me tohn ahmw peneinei me sohte pwoson kin sapwungki ahmw pilipil kan. Mwein kakete Timoty pil kin anahne en powehdi soangen uhwongohte. Nan ehu reference koasoia me en Timoty peneinei iang wia soangen aramas me ale “sukuhl laud oh kepwehpwe.” Mwein eh pahpa kin kasik pwe en ale sukuhl laud pwe en kak doula katanga en eh peneinei sohpai.a Medewehla iaduwen en Timoty pahpa ah pepehm ni ahnsou me e diarada me Timoty piladahr en iang Pohl wia doadoahk en misineri, doadoahk ehu me kin keper oh pil sohte kin wahdo elen mwohni tohto!

16. Iaduwen emen me pwulopwul powehdi uhwong sang e Pahpa?

16 Kristian pwulopwul en rahnwet kin pil lelong soangen kahpwal kan me duwehte. Matthew, me kin wia sounpapah nan branch ohpis en Sounkadehdehn Siohwa kan, katamanda met: “Ahi pahpa inenen nsensuwedkihla ahnsou I tepida wia emen pioneer. E pehm me I kauwehla mwahl ahi sukuhl ni ahi alehdi doadoahk en kamwakel pwehn apwalih ie nan ahi doadoahk en kalohk. E kin kapailoke ie, katakatamankin ie ia uwen tohto en mwohni I kak ale ma I ahneki doadoahk en awa 8 rahn koaros (full-time).” Iaduwen Matthew powehdi uhwong wet? “I kin kolokol teng ahi koasoandi en wadek Paipel oh kin kalap kapakap, ahpw mehlel ni ahnsou kan me mengei ong ie en mwakarada.” Kating mwahu Matthew kin alehdi pwehki ah kin tengediong eh koasoandi. Ni ahnsou dower powe, nanpwungen ih oh ah pahpa kin mwamwahula. Matthew pil karanihala Siohwa. Matthew koasoia: “I kilangehr en Siohwa kin apwalih ie ketikihong dahme I anahne, kangoange ie oh pere ie sang pilipil kan me pahn suwed ong ie. I sohte pahn dehdehkihla pepehm pwukat ma I sohte rapahki mehn akadei kan en pali ngehn.”

Kolokol Mehn Akadei kan en Pali Ngehn

17. Iaduwen ekei kakete katikala en emen ineng en wia doadoahk en kalohk kaukaule? (Madiu 16:22)

17 Apwal me kin pwarada ni soh sansal ni ahmw raparapahki mehn akadei kan en pali ngehn ele kak kohsang emen iengetail nan pwoson. Ele re kin idek: ‘Mehnda wiahla pioneer? Ke kak ahneki mour me duwehte koaros oh pil ahnsowohte iang doadoahk en kalohk. Alehdi ehu doadoahk pweimwahu pwe ken kak apwalihala mwahu ahmw anahn en mwohni.’ Mwein kaweid wet pil katapan, ahpw ke pahn kak en usehlahte kaiahne ahmw pali ngehn en wiahla Kristian mwahu ma ke pahn idawehn kaweid wet?

18, 19. (a) Iaduwen ke kak kilikilangwohngete mehn akadei en pali ngehn kan? (b) Nin duwen emen me pwulopwul, kawehwehda soangen tounmetei dah kan ke wiahda pwehki wehio.

18 Ekei Kristian en mwein Timoty ahneki soangen lamalam kan me duwehte met. (1 Timoty 6:17) Pwe en sewese Timoty kilangwohng ah mehn akadei en ngehn kan, Pohl kin kangoange ih ki met koasoia: “Sounpei men me kin pwahtiet nan eh doadoahk kin men kapwaiada nsenen eh kaun, oh e sohte kin pingkihda wiewiahn irail kan me kaidehn sounpei.” (2 Timoty 2:4) Sounpei me mihier nan ah pwukoa en mahwen sohte mwahu en pwunodki ekei doadoahk likin eh pwukoa en sounpei. Eh kin onopada mwahu en kapwaiada eh pwukoah sang eh kaun en mahwen pwe en kak doarehla eh mour oh mouren meteikan. Nin duwen sounpei men me mih pahn kaundahn Krais, ke anahne en ahneki madamadauohte oh dehr mweidong uhk en tengala nan ineng soh katepe kan en men kepwehpwehla me kakete kerempwa ahmw pahn kapwaiada koaros ahmw pwukoahn komourala aramas nan doadoahk en kalohk.—Madiu 6:24; 1Timoty 4:16; 2 Timoty 4:2, 5.

19 En kin kekeirada ineng en tounmetei ahpw kaidehn en ahneki mehn akadei en rapahki mour nsenamwahu. “Eri, ale pwaisomw nan kamakam, nin duwen sounpei loalopwoat emen en Krais Sises.” (2 Timoty 2:3) Ni e kin werekiong Pohl, Timoty koahiekla ahl mwahu ehu en nsenamwahuki eh mour mendahki e kin lelong irair kan me kin pil kak inenen apwal. (Pilipai 4:11, 12; 1 Timoty 6:6-8) Ke kak pil wia duwehte. Ke pahn kak tounmeteikihla soahng kan pwehki Wehio?

Kapai kan Ahnsouwet oh Pil Ahnsou Kohkohdo

20, 21. (a) Kawehwehda ekei kapai kan me kohsang rapahki mehn akadei kan en pali ngehn. (b) Dahme ke koasoanehdier ken wia?

20 Erein sounpar 15, Timoty kin ieiang Pohl ahnsou koaros. Timoty iang tepin kilang wiawihda en mwomwohdiso kapw kan ahnsou me rongamwahuo lelahng kereniong wasa koaros en palimese en Mediderenien. E kin ahneki mour kaperen oh pweida mwahu sang ma e pilada ahneki “mour mwahu me pahn duwehte koaros.” Ke pahn pil dolung kapai kaselel kan en ngehn me sohte mwohni kak pwainda ma ke pahn rapahki mehn akadei en ngehn kan. Ke pahn karanihala Siohwa oh alehdi soangen limpoak oh wahu me pahn kohsang iengomw Kristian kan. Ke pahn nsenamwahuki peren mehlel me kohsang kihkihwei ni soh roporop, ahpw kaidehn medek oh kapwunod kan me kohsang rapahki ahl en kepwehpwehla. Me keieu kesempwal sang koaros, ke pahn kak ahnekihda “mouro me uhdahn mour mehlel”—mour soutuk nan paradais nin sampah.—1 Timoty 6:9, 10, 17-19; Wiewia 20:35.

21 Ma ke saikinte pahn wia met, se men kangoange iuk en tepida mwadang kaiahne pein uhk ong akadei en mour loalopwoat ong Koht. Karanihala irail kan nan mwomwohdiso me kak sewese iuk en kapwaiada ahmw mehn akadei kan en pali ngehn oh peki rehrail arail kaweid kan. Wiahkihla onop en Mahsen en Koht kaukaule keieu kesempwal. Koasoanehdi pwe ken pelianda ngehn en sampah wet me men kepwehpwehla. Ken kin tamataman me Koht “me kin sapankihong kitail soahng koaros pwe kitail en peren” inouki me ke kak ahneki kapai tohto kan ahnsou wet oh pil ahnsou kohkohdo ma ke pilada mehn akadei kan me kawauwih ih.—1 Timoty 6:17.

[Nting tikitik me mi pah]

a Mehn Krihk kan kin kesempwaliki ale sukuhl laud. Plutarch, emen me kin memour ni ahnsou me Timoty memour ntingihdi met: “Utupen oh tepin mwahu koaros iei en alehdi sukuhl laud. . . . Iei met me I nda me pahn alehda oh kahluwalahng mour kaselel oh nsenamwahu. . . . Soahng teikan koaros iei aramas akan, mehkan me sohte katepe oh sohte anahne kitail en pwunodki.”—Moralia, I, “Kasukuhldahn Seri Kan.”

Ke Tamataman?

• Iawasa me pwulopwul kan kin rapahki sawas pwehn lel arail mehn akadei kan en pali ngehn?

• Dahme kahrehda e kesempwal en tehk mwahu ahmw onop en Paipel?

• Iaduwen me pwulopwul kan kak pelianda ngehn en sampah wet en men kepwehpwehla?

• Soangen kapai dahkei kohsang en raparapahki mehn akadei kan en pali ngehn?

[Kawehwehpen kilel kan nan ehu ehu pali 23]

Timoty rapahki mehn akadei mwahu kan

[Kawehwehpen kilel kan nan ehu ehu pali 25]

Mehnia mehn kangoang mwahu kan me sewese kamwekid Timoty?

[Kawehwehpen kilel kan nan ehu ehu pali 24]

Ke kin raparapahki mehn akadei kan en pali ngehn?

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share