Pohl oh Timoty

Timoty wia Kristian pwulopwul men nan mwomwohdisohn Listra. Eh pahpao mehn Krihk, oh eh nohno mehn Suhs. Eh nohno Iunis, oh eh nohno kahlap Lois me kin padahkihong ih duwen Siohwa sangete ni ahnsou me e tikitik.

Erein keriaun eh seiloak en misineri, Pohl mwemweitla Listra oh e tehkada me Timoty uhdahn kin poakohng Kristian kan oh kin ngoangki sewese irail. Pohl luke Timoty en iang ih seiloak. Kedekedeo, Pohl kaiahnedahr Timoty en wiahla sounpadahk koahiek men oh sounpadahk en rongamwahwo.

Sapwellimen Koht manaman kin kaweid Pohl oh Timoty wasa koaros me ira kin kohla ie. Ehu pwohngo, nan kasansal ehu, ohl emen ndaiong Pohl en kohla Masedonia oh sewese irail. Eri Pohl, Timoty, Sailas, oh Luk kohla wasao pwehn kalohk oh wiahda mwomwohdiso kan.

Nan kahnimw en Deselonika me mi nan Masedonia, ohl oh lih tohto wiahla Kristian kei. Ahpw ekei mehn Suhs kan kin peirinki Pohl oh ienge ko. Irail wiahda pwihn ehu oh wurahdekiei Kristian ko oh wahla rehn kaun akan en kahnimwo oh weriwerki: ‘Ohl pwukat wia imwintihti ong wehin Rom!’ En Pohl oh Timoty mour mi nan keper, eri erein nipwongo ira tangala Peria.

Aramas akan nan Peria ngoangki sukuhlki rongamwahwo, oh mehn Krihk oh Suhs kei ahpw pwosonla. Ahpw ni ahnsou me mehn Suhs kei kohdohsang Deselonika oh tepida kapingada aramas ako, Pohl kohkohla Adens. Timoty oh Sailas mihmihte nan Peria pwehn kakehlaka Kristian ko. Kedekedeo, Pohl pwurehng kadarala Timoty nan Deselonika pwehn sewese Kristian ko ren powehdi uhwong laud kan wasao. Mwuhr, Pohl kadarala Timoty pwehn mwemweitla rehn mwomwohdiso tohto teikan oh kangoange irail.

Pohl eri ndaiong Timoty: ‘Irail akan me men papah Siohwa pahn lelohng uhwong kan.’ Timoty lelohng uhwong oh selidi pwehki eh pwoson. Ahpw e kin perenki pwehki met kin wia ahnsou mwahu en kak kasalehda eh loalopwoat ong Siohwa.

Pohl ndaiong mehn Pilipai kan: ‘I pahn kadarewei Timoty rehmwail. E pahn padahkihong kumwail ia wehwehn en mourki padahk mehlel, oh e pahn kaiahne kumwail nan doadoahk en kalohk.’ Pohl ese me e kak koapworopworki Timoty. Ira kin doadoahkpene nin duwen kompoakepah kei oh ehupene papah Koht erein sounpar tohto.