Papah Siohwa, Kaidehn Sehdan

Kitail koaros anahne wiahda pilipil ehu. Kitail pahn papah Siohwa de papah Sehdan oh nah ngehn saut akan. Kitail sohte kak papah irail koaros. E uhdahn mwahu en papah Siohwa!

Siohwa Uhdahn Mwahu

Nin duwen me kitail kilangehr, ngehn saut akan kin perenki kamedekih oh pitih aramas. Siohwa sohte kin ketin wia met. E ketin poakohng aramas akan duwehte pahpa men eh kin poakohng nah seri kan. E kin ketikihong aramas “kisakis mwahu koaros.” (Seims 1:17) E kin ketikihong aramas soahng mwahu koaros, e pil ketin poaronehdo sapwellime Ohl nin sampah pwehn pwoukihla aramas koaros.​—Episos 2:4-7.

Medewehla soahng kan me sapwellimen Koht Ohl Sises ketin wiahda nin sampah. E ketin kamwahwihala me lohteng kan oh me maskun kan. E ketin kamwahwihala me tokutok kan oh me mwoator kan. E ketin kausasang ngehn saut akan sang rehn aramas oh kamwahwihala soangsoangen soumwahu koaros. Ni eh ketin doadoahngki sapwellimen Koht manaman, e pil ketin kaiasada me melahr akan.​—Madiu 9:32-35; 15:30, 31; Luk 7:11-15.

Koht sohte kin ketin likamw pwehn pitih kitail, ahpw e kin ketin ahnsou koaros mahsanih dahme mehlel. E sohte kin ketin widinge emen.​—Nempe 23:19.

Soikala Wiewia Samin kan

Duwehte loahng men eh kin tengala nan pesen likan, aramas tohto kin pil tengala nan kihlenwo oh pil soahng likamw kan. Irail kin masak me melahr akan. Irail kin masak ngehn saut akan. Irail kin masak aramas de winihiraildi. Irail kin pwunodki kahpwal kan de lelohng irail kahrehda ahnsou koaros re kin anahne mehn silasil kan. Irail kin tengala nan padahk oh tiahk kan me kohsang likamw kan me Sehdan me Tepilo wiahda. Sapwellimen Koht ladu kan sohte kin tengala nan soahng pwukat.

Siohwa ketin kehlail douluhl sang Sehdan. Ma ke kin papah Siohwa, e pahn ketin pereiukasang ngehn saut akan. (Seims 4:7) Mehnda ma aramas pahn winiuhkedi, met sohte pahn pweida. Karasepe, nan ehu sahpw nan Aperika, sounwunahni silimen winiehdi emen Sounkadehdehn Siohwa pwehn kemehla ih pwehki eh sohte men kohkohlahsang wasao. Ahpw met sohte pweida, oh emen rehn sounwunahni ko eri masepwehkada. Ih eri kohla rehn Sounkadehdeo oh pekmahk.

Ma ngehn saut akan kin lidere iuk, ke kak likwerih mwaren Siohwa oh e pahn ketin pereiukala. “Mwaren Siohwa iei wasahn doulik kehlail ehu. Wasa me aramas pwung kan kin tangala oh rukula ie.” (Lepin Padahk 18:10, NW) Ahpw pwe ken ale sapwellimen Koht mehn perepe, ke anahne kesehla soahng koaros me pidada wunahni oh kaudok ong ngehn saut akan. Tohnkaudok en Koht akan nan Episos kin wia met. Irail kihpene neirail pwuhken wunahni kan koaros oh isikala. (Wiewia 19:19, 20) Sapwellimen Koht ladu kan rahnwet pil anahne wia met. Kesehla mehn silasil kan, pwuhken wunahni kan, oh soahng koaros me pidada tiahk en wunahni.

Wia Kaudok Mehlel

Ma ke men kaperenda Koht, ke anahne wia laudsang ihte kesehla kaudok likamw oh uhdihsang wia me suwed. Ke anahne iang kaudok mehlel. Paipel kin kasalehda dahme ke anahne wia:

Patehng Sounkadehdehn Siohwa kan

Mie nein Sehdan oh ngehn saut akan neirail aramas akan me kin padahngki oh wia soahng suwed kan. Ahpw pil mie sapwellimen Siohwa aramas akan. Irail iei Sounkadehdehn Siohwa kan. (Aiseia 43:10) Mie Sounkadehdehn Siohwa tohtohsang meh isirar nin sampah pwon. Irail koaros kin nantihong wia me mwahu oh padahkihong aramas akan padahk mehlel. Nan sahpw tohto, ke kak tuhwong irail nan arail Wasahn Kaudok kan. Re pahn perenki kasamwo iuk.

Arail doadoahk iei en sewese meteikan ren papah Koht. Irail pahn onopki Paipel rehmw nan imwomw oh sewese iuk ken sukuhlki ia duwen omw pahn kaudokiong Siohwa ni ahl pwung. Ke sohte anahne pwain irail ong kasukuhl wet. Sounkadehdehn Siohwa kan kin perenki padahngki padahk mehlel pwehki arail limpoak ong aramas oh pil Siohwa Koht.