Iren Mehn Kasukuhl 10

Wiewia kan me Koht kin Tateki

Iaduwen omwi pepehm ohng mehkan me Koht mahsanih me suwed? (1)

Soahngen tiahk dah me pid wia nsen pwopwoud me sapwung? (2)

Ia madamadau en Kristian men me pahn pid likamw? (3)

pilein mwohni? (3) pirap? (3) mwersuwed? (4)

wunani? (5) kamamsakau? (6)

Iaduwen emen kak pitsang wiewia suwed akan? (7)

1. Sapwellimen Koht ladu kan kin poakohng dahme mwahu. Ahpw re pil anahne sukuhliki en tateki me suwed. (Melkahka 97:10) Met wehwehki en liksang ekei wiewia kan me Koht kin tateki. Ia ekei wiewia pwukat?

2. Nenek: Nsen pwopwoud mwohn ira pahn inou sarawi, kamwahl, wiahda dihp rehn mahn akan, ngengngersuwed, oh ohl mwahuki ohl oh lih mwahuki lih iei dihp toutou kei mwohn Koht. (Lipai 18:6; Rom 1:26, 27; 1 Korint 6:9, 10) Ma emen ohl oh emen lih kin kousoanpene ahpw saikinte inou sarawi, ira anahne katohrorpeseng de ma soh ah ira en wiahda inou sarawi nin duwen kosonned en sahpwo.—Ipru 13:4.

3. Likamw, Pilein mwohni, Pirap: Siohwa Koht sohte kak likamw. (Taitus 1:2) Ma aramas akan mwahuki Siohwa en kupwurki irail, re anahne liksang wia likamw. (Lepin Padahk 6:16-19; Kolose 3:9, 10) Soangen pilein mwohni koaros kin poahsoanda pohn irairen noahrok. Eri Kristian akan sohte kin iang wia soahngen pilein mwohni kan koaros, duwehte lotteries, weirin tang en mahn oahs, oh pingko. (Episos 5:3-5) Oh Kristian akan sohte kin pirap. Irail sohte kin pwainda dipwisou kan me re ese me aramas pirapala de irail sohte kin kihsang dipwisou kan me re sohte peki en doadoahngki.—Eksodus 20:15; Episos 4:28.

4. Lingeringer, Tiahk Lemei: Lingeringer me daulihlahr pahn kak imwikihla tiahk lemei. (Senesis 4:5-8) Aramas men me kin tiahk lemei sohte kak wiahla koampoakepahn Koht. (Melkahka 11:5; Lepin Padahk 22:24, 25) Ma mehteikan pahn wiahiong kitail me suwed, e sapwung kitail en dupungkihong me suwed.—Lepin Padahk 24:29; Rom 12:17-21.

5. Wunani: Ekei aramas kin kehliki manaman en ngehn suwed kan pwen kamwahuiahla soumwahu kan. Mehteikan kin wunanih arail imwintihtih kan pwen kasoumwahuda irail de kamehla irail. Manamano en wiewia pwukat kin kohsang rehn Sehdan. Eri, Kristian akan sohte pahn iang kisehn wiewia pwukat. (Deuderonomi 18:9-13) Karanih Siohwa wia perepe me keieu mwahu ohng kitail ma aramas teikan pahn wunanih kitail.—Lepin Padahk 18:10.

6. Kamamsakau: E sohte sapwung en nim ekis wain, pihru, de sakau en wai teikan. (Melkahka 104:15; 1 Timoty 5:23) Ahpw kamamsakau me sapwung mwohn silangin Koht. (1 Korint 5:11-13; 1 Timoty 3:8) Kamamsakau pahn kak kawehla omw roson mwahu oh pil kawehla onopek en omw peneinei. E pil kak kahrehong kowe en mwadangete lohdi pahn kasongosong teikan.—Lepin Padahk 23:20, 21, 29-35.

7. Aramas akan me kin wiewia mehkan me Koht kin suwediki sohte pahn iang “sohsohki Wehin Koht.” (Kalesia 5:19-21) Ma ke uhdahn poakong Koht oh men kaperenda ih, ke pahn kak powehdi wiewia pwukat. (1 Sohn 5:3) Sukuhliki ken kak tateki dahme Koht mahsanih me suwed. (Rom 12:9) Werekiong aramas akan me kin wia tiahk mwahu. (Lepin Padahk 13:20) Werekiong Kristian mah kan kin wia elen sawas mwahu. (Seims 5:14) Pohnangin mehkoaros, liki sapwellimen Koht sawas ki kapakap.—Pilipai 4:6, 7, 13.

[Kilel kan nan pali 20, 21]

Koht kin tateki kamamsakau, pirap, pilein mwohni, oh tiahk lemei