Kompoakepahn Koht akan kin Liksang Tiahk Suwed

Sehdan kin kasonge aramas akan pwe ren wia tiahk suwed. Emen me men wiahla kompoakepahn Koht pahn anahne tateki dahme Siohwa kin kalahdeki. (Melkahka 97:10) Iet ekei wiewia kan me kompoakepahn Koht akan anahne en liksang:

Dipen Nenek oh Kamwahl. “Kumwail sohte pahn kamwahl.” (Eksodus 20:14) E sapwung en wia nsenen pwopwoud mwohn emen pwopwoudla.​—1 Korint 6:18.

Kamamsakau. “Irail me kin kamamsakau . . . sohte pahn iang sohsohki Wehin Koht.”​—1 Korint 6:10.

Kamaramas, Kaiohla. “Kumwail sohte pahn kemehla aramas.”​—Eksodus 20:13.

Pirap. “Kumwail sohte pahn pirap.”—Eksodus 20:15.

Lokaia Likamw. Siohwa kin kalahdeki “lokaia likamw.”​—Lepin Padahk 6:17, NW.

Tiahk Lemei oh Lingeringer. “[Siohwa] kin kalahdeki irail aramas akan me kin perenki tiahk lemei.” (Melkahka 11:5, NW) “Eri, wiewia kan nin duwen ahnepen aramas me sansal . . . lingeringer.”​—Kalesia 5:19, 20.

Pilein Mwohni. “Kumwail dehr pil kin patehng irail . . . me kin . . . noahrok.”​—1 Korint 5:11, NW.

Kailongki Wehi de Keinek Teikan. “Kumwail poakohng amwail imwintihti kan oh kapakapki me kin kalokei kumwail.”​—Madiu 5:43, 44.

Soahng kan me Koht kin mahsanih ong kitail kin wia pein kamwahupatail. E sohte kin ahnsou koaros mengei en liksang tiahk suwed kan. Ahpw, ma ke ale sawas sang rehn Siohwa oh sapwellime Sounkadehde kan, ke pahn kak liksang wiewia kan me kin kansensuwedihala Koht.​—Aiseia 48:17; Pilipai 4:13; Ipru 10:24, 25.