Iren Mehn Kasukuhl 15

Sewese Mehteikan en Kapwaiada Kupwuren Koht

Dahme kahrehda ken padahkiong mehteikan duwen dahme ke sukuliki? (1)

Ihs me ke kak koasoiong duwen rongamwahu-o? (2)

Ni ahl dah omw tiahk kan kak kamwekidih mehteikan? (2)

Iahd ke kak tepida iang mehteikan nan mwomwohdiso kalohk? (3)

1. Lelehr ahnsou wet ke sukuhlkihier padahk mwahu tohto sang Paipelo. Loaloakong wet pahn anahne kahre iuk en kakairada omwi irairen Kristian. (Episos 4:22-24) Soangen loalokong wet kesempwal, ong kowe en alehdi mour soutuk. (Sohn 17:3) Ahpw, mehteikan pil anahne rohng rongamwahu pwe re pil kak kamourala. Kristian mehlel kan koaros anahne kalohk ong mehteikan. Met iei kehkehlik en Koht ieu.—Rom 10:10; 1 Korint 9:16; 1 Timoty 4:16.

2. Ke kak tepida koasoiaiong mehteikan me kin karanih iuk duwen padahk mwahu kan me ke kin sukuliki. Koasoaiong omw peneinei, koampoakepomw kan, iengomw tohnsukuhl akan, oh tohndoadoahk kan. Kin kasalehda kadek oh doadoahngki kanengamah ahnsou me ke koasoaiong irail. (2 Timoty 2:24, 25) Tamataman me aramas kin kalapw tehk duwen ahn emen wiewia laudsang dahme re rong ni koasoai. Eri omw tiahk mwahu ele mwein pahn kahrehong mehteikan en rong duwen dahme ke pahn koasoiaiong irail.—Madiu 5:16; 1 Piter 3:1, 2, 16.

3. Mwurin ahnsoukis, ele mwein ke pahn kakehr iang wiahla sounkalohk nan mwomwohdiso en Sounkadehdehn Siohwa kan. Met ewen kahk kesempwal ehu ong omw kekeirada. (Madiu 24:14) Ia uwen kaperen ma ke kak seweseiong emen en kak wiahla laduhn Siohwa men oh ahneki mour soutuk!—1 Deselonika 2:19, 20.