Koht Iei Kompoakepahmw me Keieu Mwahu

En kompoakepahnki Koht kin wia mehkot me keieu mwahu me kak wiawi nan ahmw mour. Koht pahn padahkiong uhk iaduwen ke kak ahneki peren oh meleilei nan ahmw mour; e pahn pil kasaledek uhk sang padahk sapwung tohto iangahki wiewia keper kan. E pahn ketin karonge ahmw kapakap akan. E pil pahn sewese iuk en ahneki popohl oh likilik sang nan kapehdomw. (Melkahka 71:5; 73:28) Koht pahn sewese iuk nan ahnsou apwal akan. (Melkahka 18:18) Oh pil, Koht ketin ritingadahng uhk sapwellime kisakis en mour soutuk.​—Rom 6:23.

Ni ahmw pahn kin karanih Koht, ke pil pahn karanihla sapwellimen Koht kompoakepah kan. Re pahn pil kompoakepahnki uhk. Ni mehlel, re pahn wiahla riomw kan. Re pahn perenki padahkiong uhk duwen Koht oh re pil pahn sewese oh kangoange iuk.

Kitail sohte pahrekiong Koht. Nin doken ahmw pahn rapahki ken kompoakepahnki Koht, ke anahne wehwehki ire kesempwal wet. Kompoakepahnki Koht sohte kin wehwehki me kumwa pahrekpene. Koht me uhdahn mah sang oh loalokong sang oh pil kehlail sang kitail. Ih me kin sapwellimanki pwung en wiahla Kaun en koaros. Eri, ma kitail men kompoakepahnki Koht, kitail anahne rong oh kapwaiada dahme e kin ketin padahkiong kitail en wia. Ma kitail pahn wia met, e pahn keieu mwahu ong atail mour.​—Aiseia 48:18.