Paradais Kerendohr!

Wiewia suwed akan me kin wiawi nan sampah ahnsou wet kin kasalehda me Paradais kerendohr. Paipel mahsanih me kitail pahn kilang ahnsou apwal akan mwohnte Paradais pahn leledo. Kitail mihmi nan ahnsou apwal akan met! Iet ekei wiewia kan me Paipel kohpadahr pahn wiawi:

Mahwen lapalap akan. “Ehu sahpw pahn uhwong ehu sahpw, ehu wehi pahn mahweniong ehu wehi.” (Madiu 24:7) Kokohp wet pweidaehr. Sang nan pahr 1914 lel met, mahwen en sampah riau wiawiher iangahki mahwen tikitik tohto. Aramas rar kei mehkihla mahwen pwukat.

Soumwahu kan wasa koaros. “Soumwahu lusulus laud pahn wiawi wasa koaros.” (Luk 21:11) Kokohp wet pweidaehr? Ei. Soumwahu en kanser, soumwahu en mohngiong, limengimeng, malaria, AIDS, oh soumwahu teikan kemehlahr aramas rar kei.

Duhpek. Wasa koaros nan sampah, mie aramas me sohte itar kanarail mwenge. Aramas rar kei kin mehkihla duhpek ni ehu ehu sounpar. Met wia pil ehu kilel me Paradais kerendohr. Paipel mahsanih: “Lehk lapalap pahn mie.”​—Mark 13:8.

Rerrer en sahpw. “Wasa koaros rerrer en sahpw pahn wiawi.” (Madiu 24:7) Met pil kin pweida nan atail ahnsou. Aramas rar samwa mehkihla rerrer en sahpw sang nan pahr 1914 lel met.

Aramas suwed akan. Aramas akan pahn “poakohng mwohni” oh pahn “roporop ong pein irail.” Re pahn “inengieng pein arail peren laud sang kupwuren Koht.” Seri kan “sohte pahn peikiong arail pahpa oh nohno kan.” (2 Timoty 3:1-5) Ke soh pahn pwungki me diren soangen aramas pwukat rahnwet? Re sohte kin wauneki Koht, oh re kin wiahda kahpwal akan ong irail me kin nantihong sukuhliki duwen Koht.

Tiahk suwed. Pil “me suwed pahn paraparala wasa kan.” (Madiu 24:12) Mwein ke pil pahn pwungki me tiahk suwed kin suwed sang sounpar kei samwalahr ako. Aramas akan wasa koaros kakete lelohng kahpwal en aramas teikan kak pirapa irail de pitihiraildi de re kak lelohng ohla en paliwar.

Mepwukat koaros kin kasalehda me Wehin Koht kerendohr. Paipel mahsanih: “Ni amwail pahn kilang mepwukat ar pahn wiawi, kumwail pahn esehki me Wehin Koht kerendohr.” (Luk 21:31) Dahkot Wehin Koht? Wehin Koht iei sapwellimen Koht koperment en nanleng me pahn kaparadaisiala sampah wet. Wehin Koht pahn kihsang wehin aramas akan.​—Daniel 2:44.