Iaduwen Ahmw Pahn Kak Diarada Kaudok Mehlel

Ma ke men kompoakepahnki Koht, ke anahne kaudokiong ih ni ahl me e kin ketin kupwurki. Sises mahsanih me “tohn kaudok mehlel kan” pahn kaudokiong Koht ki “mehlel.” (Sohn 4:23, 24) Ahl ehute me pwung en kaudokiong Koht. (Episos 4:4-6) Kaudok mehlel kin kahluwalahng mour soutuk, oh kaudok likamw kin kahluwalahng mehla.​—Madiu 7:13, 14.

Ke kak kasawihada kaudok mehlel sang ni ahmw pahn kilang tohn kaudok kan. Pwehki Siohwa me mwahu, irail tohn kaudok mehlel kan kin wia aramas mwahu kei. Duwehte tuhkehn karer mwahu me kin wiahda wahn karer mwahu, kaudok mehlel kin wiahda aramas mwahu.​—Madiu 7:15-20.

Kompoakepahn Siohwa kan kin wauneki Paipel. Re ese me Paipel kohsang rehn Koht. Re kin mweidong audepe kan en kahluwa arail mour, powehdi ahr kahpwal akan, oh sewese irail en sukuhliki duwen Koht. (2 Timoty 3:16) Re kin nantihong kapwaiada dahme re kin kalohki.

Kompoakepahn Siohwa kan kin kasalehda limpoak nanpwungarail. Sises kasalehda limpoak ong aramas akan sang ni eh kin padahkiong irail duwen Koht oh kamwahuwihala me soumwahu kan. Irail tohn kaudok mehlel kan kin pil kasalehda limpoak ong meteikan. Duwehte Sises, re sohte kin mwamwahliki irail akan me semwehmwe de irail me kin kohsang ehu wehi tohrohr sang pein arail wehi. Sises mahsanih me aramas akan pahn esehki irail sapwellime tohnpadahk kan, pwe irail kin limpoakpene nanpwungarail.​—Sohn 13:35.

Kompoakepahn Koht akan kin kawauwih mwaren Koht, Siohwa. Ma aramas men kahng doadoahngki edomw, ke kak nda me ih aramas emen me kin wia kompoakepahmw keren? Soh! Ni atail kin kompoakepahnki emen, kitail kin doadoahngki ede oh ndaiong aramas teikan soahng mwahu kan duwen ih. Eri, irail akan me men kompoakepahnki Koht anahne doadoahngki mware oh koasoiaiong meteikan duwen Ih. Siohwa kin kupwurki kitail en wia met.​—Madiu 6:9; Rom 10:13, 14.

Duwehte Sises, kompoakepahn Koht akan kin padahkiong aramas akan duwen Wehin Koht. Wehin Koht iei koperment en nanleng me pahn kaparadaisihala sampah wet. Kompoakepahn Koht akan kin padahkiong meteikan duwen Rongamwahu en Wehin Koht.​—Madiu 24:14.

Sounkadehdehn Siohwa kan kin nantihong en wia kompoakepahn Koht akan. Re kin wauneki Paipel oh limpoakpene nanpwungarail. Re pil kin doadoahngki oh kawauwih mwaren Koht oh padahkiong meteikan duwen Wehin Koht. Sounkadehdehn Siohwa kan kin wia tohn kaudok mehlel kan nan sampah rahnwet.