Dahme kin Wiawi ni Ahnsoun Emen Mehla?

Mehla iei pelian mour. Mehla kin duwehte emen me kin meir kelik. (Sohn 11:11-14) Aramas melahr kan sohte kak rong, kilang, lokaia, de medemedewe mehkot. (Eklesiasdes 9:5, 10) Kaudok likamw kin padahkiong aramas me irail me melahr kan kin kohla memour rehn arail peneinei kan en mahs mahsie me melahr nan wasa me ngehn kan kin kousoanpene. Ahpw, Paipel sohte kin padahkiong kitail met.

Me melahr akan sohte kak sewese kitail, oh re pil sohte kak lidere kitail. Aramas tohto nan sampah kin wia arail tiahk en pwongih oh wia meirong kan me re lemeleme pahn kaperenda aramas melahr akan. Met sohte kin kaperenda Koht, pwehki wiewia wet kin poahsoankihda padahk likamw me Sehdan wiahda. Met pil sohte kak kaperenda me melahr akan, pwe re sohte kin kehn mehkot. Kitail en dehr masak de kaudokiong me melahr akan. Kitail anahne en kaudokiong Koht kelepw.​—Madiu 4:10.

Me melahr akan pahn iasada. Siohwa pahn kaiasada irail me melahr kan nan paradais sampah. Kaiasada pahn wiawi ni ahnsou kohkohdo. (Sohn 5:28, 29; Wiewia 24:15) Koht kak kamourada me melahr akan duwehte ke kin panginda emen sang meir.​—Mark 5:22, 23, 41, 42.

Padahko me koasoia me kitail sohte kin mehla iei padahk likamw me Sehdan me Tepil kin kapwaraseli. Sehdan oh nah ngehn saut akan kin kahrehong aramas akan en lemeleme me ngehn en aramas melahr kan kin memour oh ngehn pwukat kak kahrehong aramas en soumwahuda oh pil lelohng kahpwal teikan. Ekei ahnsou, Sehdan pil kin doadoahngki ouraman kan oh kasansal kan pwehn pitihdi aramas akan. Siohwa kin kalahdeki irail akan me kin song en koasoiong me melahr akan.​—Deuderonomi 18:10-12.